_________________________________________

ချင်းချိုး၊ လျို့ဝှက်နယ်ပယ်အတွင်း၌။

အုပ်စုသည်မင်ချီလိုအပ်သည့်ဆေးပင်များကိုရရှိလာကြပြီး သူတို့အားလုံးပျော်ရွှင်နေခဲ့ကြကာ လမ်းတလျှောက်လှည့်ပြန်လာခဲ့ကြ၏။ ဤလျို့ဝှက်နယ်မြေထဲတွင်ရုတ်တရက်ပေါက်ကွဲမှုဖြစ်ပွားပြီး ပြိုကျလာလိမ့်မည်ဟု မည်သူမျှမထင်ထားမိကြပေ။

ရွှယ်ရုန်နှင့်ရွှယ်ထိုင်ကား အစကတည်းကသခင်လေးကိုကာကွယ်ဖို့ရန် ချန်းနဥ်ကပို့လိုက်ခြင်းပင်။ သူတို့ထိုလှုပ်ရှားမှုကိုမြင်လိုက်ရသော် သူတို့ပြိုင်တူနောက်လှည့်ကြည့်လိုက်မိရာ အနောက်တွင်ကျောက်တုံးကျောက်စနှင့်မီးခိုးငွေ့များသာလျှင်ကျန်ရစ်တော့သည်ကိုမြင်လိုက်ကြရပေသည်။ နောက်ဆုံးကလျှောက်နေခဲ့သောရှုလင်ကျားမှာမရှိတော့ပေ။

သူတို့နှစ်ဦးသားထိတ်လန့်သွားကြကာ အခြားသောမြေခွေးလူသားတို့နှင့်အတူ အပြေးအလွှားသွားရောက်စစ်ဆေးမိကြသည်။

ရှုလင်ကျားသည်မြေခွေးမျိုးနွယ်စု၏သခင်လေးဖြစ်ရာ သူကားသာမန်ထက်ထူးခြားပေ၏။ ခုနကအပြုအမူများဟာသူ့ကိုယုံကြည်သွားလောက်စေသည်။ သူတစ်ခုခုဖြစ်သွားကြောင်းသိလိုက်ရသောအခါ မြေခွေးမျိုးနွယ်စုကလူများပင်စိုးရိမ်သွားရုံတင်မက လက်ရှိရှိနေသည့်အခြားလူများမှာလည်း ထိတ်လန့်သွားကြကာ စိုးရိမ်သောကရောက်စွာဖြင့်ပတ်ပတ်လည်၌ရှာဖွေမိကြသည်။

"သခင်လေး! သခင်လေး!"

ရွှယ်ရုန်မှာအလွန်စိတ်ပူနေမိသဖြင့် ငိုချမိလုနီးပါးပင်။

သူသည်လက်နှစ်ဖက်ဖြင့်ကျောက်တုံးအနည်းငယ်ကိုဖယ်လိုက်ရာ အောက်ခြေ၌ကျဥ်းမြောင်းသောအဟလေးကိုမြင်လိုက်ရသည်။

အောက်ဖက်တွင်မှင်ရည်ပမာနက်မှောင်လွန်းလှပြီး မှော်စွမ်းအင်ခပ်ဖျော့ဖျော့ရှိနေပေမဲ့ ထိုနေရာတွင်လူတစ်ယောက်မျှရှိမနေပေ။ ကျောက်တုံးကျောက်ခဲများကနေရာအနှံ့ပျံ့ကြဲနေပေကာ နေရာလွတ်တစ်ခုမျှပင်မရှိ။

ယင်းကားသူ့ကိုရှာဖွေရန်အခက်အခဲဖြစ်စေပေမဲ့ သူ့ဦးခေါင်းထက်၌ကျယ်လောင်သောတချွင်ချွင်မြည်သံအနည်းငယ်ကိုသူကြားလိုက်ရပြီး သူ့ဘေးရှိကျောက်တုံးအများစုမှာဓားများဖြင့်ပစ်ထုတ်ဖယ်ရှားခံလိုက်ရတော့သည်။

ထို့နောက် အစောပိုင်းတုန်းကရှုလင်ကျား၏ကယ်တင်ခြင်းခံခဲ့ရသော လင်ရှောင်းဂိုဏ်းတပည့်မုန့်ခုန်သည် စကားတစ်ခွန်းမဆိုဘဲ ခုန်ဆင်းလာကာ ရွှယ်ရုန်အားကူညီပြီး တစ်စုံတစ်ယောက်ကိုကူရှာပေးလာ၏။

ကျန်းရွေ့မှာအစတုန်းကမျက်နှာထက်တွင်စိတ်ပူသောအကြည့်ရှိနေပေမဲ့ သူနှင့်အတူလာခဲ့သောမုန့်ခုန်ကရှုလင်ကျားအတွက်အရမ်းကိုစိုးရိမ်နေသည်ကိုမြင်လိုက်ရသောအခါ သူ့မျက်နှာထားမှာတစ်အောင့်မျှအေးစက်သွားပေမဲ့ ထို့နောက်ပုံမှန်ပြန်ဖြစ်သွားချေသည်။

ဤလင်ရှောင်းဂိုဏ်းသားများသည်သူနှင့်နှစ်နှစ်နီးပါးအတူရှိလာခဲ့ကြပေမဲ့ သူနှင့်စိတ်တူကိုယ်တူဖြစ်မနေသေးပေရာ ယင်းတို့နှင့်မိတ်ဆွေဖြစ်ဖို့ရာခက်ခဲသွားချေ၏။

"မင်းတို့တွေအရမ်းစိတ်ပူမနေကြပါနဲ့။ မင်သခင်လေးရဲ့အစွမ်းအစနဲ့ဆိုရင် ကျောက်တုံးနဲ့အရိုက်ခံရဖို့မဖြစ်နိုင်ပါဘူးလေ။"

ကျန်းရွေ့ကဆိုသည်။

"သူသေချာပေါက်အဆင်ပြေမှာပါဗျာ။ ဒါပေမဲ့သူအချိန်ခဏလောက်ပြန်လာနိုင်မှာမဟုတ်ဘူးဆိုတော့ အချင်းချင်းကူညီဖေးမကြရအောင်ပါ။ တစ်ယောက်ယောက်ကတော့ရှာတွေ့မှာပေါ့။"

ဤလင်ရှောင်းဂိုဏ်း၏ဉာဏ်ကြီးရှင်ဆိုသည့်တစ်ယောက်က ကြွားဝါပြောဆိုရသည်ကိုနှစ်ခြိုက်သည်ဟု ရွှယ်ထိုင်းခံစားမိပေမဲ့ သူကတော့ဘာပဲဖြစ်ဖြစ်စိတ်အားထက်သန်သောသူဖြစ်ပေရာ သူအရမ်းကိုဂုဏ်ယူမိပြီး ပြောလိုက်သည်။

"ကျေးဇူးတင်ပါတယ်၊ ကျန်းတောက်ကျန့်။"

ကျန်းရွေ့အသာပြုံးလိုက်သည်။

ရှုလင်ကျားကကျောက်တုံးကြောင့်ဒဏ်ရာရမည်မဟုတ်ပေမဲ့ အောက်ဖက်ရှိမိစ္ဆာမျက်လုံးဂူကားအစကတည်းကအလွန့်အလွန်အန္တရာယ်များသောနေရာတစ်ခုဖြစ်ကာ ထိုဂူအတွင်း၌အမည်မသိကျွမ်းကျင်သူတစ်ဦးရှိနေကြောင်းကို သူ့နှလုံးသားထဲတွင်သိနေပေသည်။

ခုနတုန်းကသူသည်မတော်တဆခြေလှမ်းတစ်ဝက်လှမ်းလိုက်မိရာ ထိုလူ၏ဖိအားကြောင့်သေလုနီးပါးဖြစ်ခဲ့ရသည်။ ရှုလင်ကျားတစ်ယောက်ကတော့ဖြင့်ထိုကဲ့သို့ကြီးမားသောလှုပ်ရှားမှုမျိုးဖြင့်တိုက်ရိုက်အောက်ကျသွားပေရာ တစ်ဖက်လူမှာသေချာပေါက်စိတ်ပျက်သွားလိမ့်မည်ပင်။

နှစ်ဖက်စလုံးစတင်တိုက်ခိုက်ကြလျှင် အကောင်းဆုံးအကျိုးအမြတ်မှာ ရှုလင်ကျားကထိုပုဂ္ဂိုလ်သတ်တာခံလိုက်ရခြင်းပင်။ ဤမျှော်လင့်ချက်မဖြစ်မြောက်ခဲ့ပင်လျှင် ကျန်းရွေ့မှာဆုံးရှုံးစရာတစ်ခုမျှမရှိ။ ယင်းကားဓားတစ်လက်နှင့်လျို့ဝှက်လူသတ်သမားတစ်​ယောက်သာ။

ကျောက်တုံးများမှာတစ်နေရာတွင်စုပုံခံထားရပြီး သူတို့ဟာလျိို့ဝှက်နယ်မြေထဲတွင်ရှိနေသောကြောင့် နောက်ထပ်ပြိုကျမှုဖြစ်ပေါ်လာမည်ကိုကြောက်နေမိကာ လက်ရှိလူတိုင်းမှာတစ်ကိုယ်လုံးကိုစိတ်ဝိညာဥ်စွမ်းအားများဖြင့်လွှမ်းခြုံထားမိပေမဲ့ ယင်းကိုလက်လွတ်စပယ်အသုံးမပြုရဲကြပေ။ တစ်စုံတစ်ယောက်ကိုရှာဖွေနေသည့်လုပ်ငန်းစဥ်ကို ပိုမိုခက်ခဲအောင်လုပ်မိသွားမည်စိုးသောကြောင့်ပင်။

ရွှယ်ရုန်မှာသခင်လေးကိုဆက်ခေါ်နေပေမဲ့ မည်သူကမျှပြန်မဖြေလာသဖြင့် သူငိုချမိတော့မည်။

ထိုစဥ်၊ မြေခွေးမျိုးနွယ်စုကလူနှစ်ယောက်မှာအရှေ့မှအလျင်စလိုတဟုန်ထိုးပြေးလာပြီး အော်လိုက်သည်။

"အားရုန်၊ အားထိုင်း!"

ရွှယ်ထိုင်းခပ်မြန်မြန်ပြောလိုက်သည်။

"မင်းတို့ကဒီမှာပဲ! သခင်လေးတစ်ခုခုဖြစ်သွားတယ်။ အကြီးအကဲရောဒီအကြောင်းသိပြီးပြီလား။ သူဘာလုပ်ဖို့ပြောလဲ။"

မြေခွေးမျိုးနွယ်စုကဆိုသည်။

"အကြီးအကဲကသခင်လေးကိုကိုယ်တိုင်ကိုယ်ကျချက်ချင်းလာရှာလိမ့်မယ်။ မင်းကဧည့်သည်တွေကိုအပြင်အရင်ခေါ်သွားလိုက်ပါ။ ဒီကိစ္စကိုငါတို့နဲ့အပ်ထားခဲ့လိုက်တော့။ မဟုတ်ရင် လူအရမ်းများနေတော့ သခင်လေးကိုရှာရခက်သွားလိမ့်မယ်။"

သူတို့သည်မတိုင်ခင်ကလျို့ဝှက်နယ်မြေကိုလာခဲ့ဖူးကြသော မြေခွေးမျိုးနွယ်စု၏စီနီယာများဖြစ်သည်မို့ ရွှယ်ရုန်နှင့်ရွှယ်ထိုင်းမှာစိတ်ပူမိသော်လည်း သူတို့မှာရွေးချယ်စရာမရှိပါဘဲ နာနာခံခံဖြင့်သွားလိုက်ကြရ၏။

လျို့ဝှက်နယ်မြေအပြင်ဘက်ကိုသူတို့ရောက်ရှိသွားသော် အခြားလူများမှာစောစီးစွာထွက်လာကြပြီး မြေခွေးမျိုးနွယ်စုခေါင်လိုအပ်သောဆေးပင်သုံးပင်ကိုလည်းရှာတွေ့ခဲ့ပြီးဖြစ်ကြောင်းတွေ့ရှိလိုက်ကြရသည်။

ဤလျို့ဝှက်နယ်မြေထဲတွင် ရတနာများစွာရှိလေရာ လူတိုင်းမှာလည်းရစရာရှိတာရလာကြသဖြင့် စိတ်အခြေအနေကောင်းမွန်နေကြသည်။

ယင်းကား ကျန်းရွေ့နှင့်အခြားသူများရောက်လာပြီး မြေခွေးမျိုးနွယ်စုသခင်လေးတစ်ခုခုဖြစ်သွားကြောင်းပြောလာသည်ကိုမကြားရခင်အထိပင်။ လူတိုင်းအံ့အားသင့်မိကြသည်။

အချိန်မသင့်တော်သေးသည်ကိုမြင်လိုက်ရရင်း ချန်းနဥ်ကအချိန်အတော်ကြာထွက်မလာခဲ့ပေ။ မည်သူကမျှရှာမတွေ့ခဲ့ဘဲ စာတစ်စောင်ပင်မပို့နိုင်ခဲ့လျှင် တစ်ခုခုဖြစ်သွားတာဖြစ်ပေလိမ့်မည်။

ဤသားတော်ကကပ်ဘေးအပြီးတွင်မွေးဖွားလာခဲ့သော်လည်း မျိုးနွယ်စုခေါင်မင်ချီကဤတစ်ဦးတည်းသောသားကိုလွန်စွာချစ်မြတ်နိုးပြီး မြေခွေးမျိုးနွယ်စုတစ်စုလုံးဟာလည်း လမင်းကိုဝန်းရံထားကြသောကြယ်ပွင့်များပမာ သူ့ကိုအလိုလိုက်ခဲ့ကြသည်ဟုဆို၏။ မင်ချီ၏ဖခင်မည်သူဖြစ်ကြောင်းတစ်ယောက်မျှမသိပေမဲ့ သူကားအလွန်ထူးခြားဆန်းကြယ်ပြီး မြင့်မြတ်သောပုဂ္ဂိုလ်တစ်ဦးဖြစ်ပုံရသည်။

ထိုအခြင်းအရာကြောင့် မြေခွေးမျိုးနွယ်စုသခင်လေးပျောက်ဆုံးသွားသည်ကလက်ရှိလူတိုင်းနှင့်ဘာမှမဆိုင်ရင်တောင်မှ ဤဘိုးဘေးလေးတစ်ခုခုဖြစ်သွားခဲ့သည်ရှိသော် မြေခွေးမျိုးနွယ်စုကမလွဲမသေပရမ်းပတာဖြစ်လာလိမ့်မည်ဖြစ်ကာ ယင်းကသူတို့အတွက်ကောင်းသောအရာမဟုတ်လှ။

တိတ်တိတ်လေးပျော်ရွှင်နေမိသည်မှာ ကျန်းရွေ့တစ်ယောက်သာလျှင်ဖြစ်လောက်မည်။

ဤအခိုက်လူကြားထဲတွင်ရပ်နေရင်းဖြင့် သူ၏စိတ်လှုပ်ရှားမှုကိုခက်ခဲစွာထိန်းချုပ်နေရသည်။

အရာအားလုံးကချောချောမွေ့မွေ့ဖြစ်သွားလိမ့်မည်ဟု သူမထင်ထားခဲ့မိပေ။

ဖြစ်ကောင်းဖြစ်နိုင်တာက အနာဂတ်တွင် သူသည်ရှုလင်ကျားကိုဘယ်သောအခါမျှမြင်တွေ့စရာမလိုလောက်တော့ပေ၊ တစ်ဖက်လူကသူ့ကိုကျော်တက်ပြီး ကိုယ့်ကိုယ်ကိုဖော်ထုတ်ပြကာ သူ၏အဆင့်အတန်းနှင့်စိတ်ဝိညာဥ်ပါရမီစွမ်းရည်ကိုပြန်ယူသွားမည်ကို သူစိုးရိမ်နေစရာမလိုလောက်တော့ပေ။

တစ်ခဏကြာသော် ချန်နဥ်သည်လျို့ဝှက်နယ်မြေထဲမှတည်ငြိမ်သောမျက်နှာထားဖြင့်ထွက်လာ၏။

လူတိုင်းစိုးရိမ်ပူပန်စွာဖြင့်သူတို့ဆီပြေးသွားမိကြသည်။ တစ်ယောက်ကမေးလာသည်။

"အကြီးအကဲချန်နဥ်၊ မင်သခင်လေးကိုရှာမတွေ့သေးဘူးလား။"

ချန်နဥ်ကခေါင်းခါသည်။

"အရိပ်အယောင်တောင်မရှိဘူး။"

ကျန်းရွေ့ဟာလည်းမျက်မှောင်ကြုတ်မိကာ သူ့ကိုမြင်ချင်နေမိသည်။ လူတစ်ယောက်သေသွားလို့ရှိရင် အလောင်းကျန်ခဲ့ရမည်ဖြစ်ကာ အရိပ်အယောင်တောင်မရှိဘူးဆိုတာကဘာကိုဆိုလိုတာများလဲ။

သူကဆိုသည်။

"လျို့ဝှက်နယ်မြေထဲကနေရာလွတ်ကအကန့်အသတ်ရှိတယ်။ ဘာပဲဖြစ်နေပါစေ လူတစ်ယောက်ပျောက်သွားဖို့ဆိုတာလုံးဝမဖြစ်နိုင်ဘူး။ မပြောပလောက်တဲ့အရာတစ်ခုခုများဖြစ်နေမလား။ အကြီးအကဲယုံကြည်တယ်ဆိုရင် လင်ရှောင်းချီဇုန်ဂိုဏ်းသားတွေကကူညီဖို့ဆန္ဒရှိပါတယ်။ ဒီတော့တစ်ချက်သွားဝင်ကြည့်ကြတာအောင်လေ။"

ကျန်းရွေ့၏စိုးရိမ်နေသောလေသံကား သူဟာရှုလင်ကျား၏တည်နေရာနှင့်ပတ်သတ်၍ မည်သူ့ကိုမျှရှာမတွေ့ဘဲ လမ်းတစ်ဝက်မှာတင်အရှုံးပေးခဲ့သောချန်နဥ်ထက်ပို၍စိတ်ပူနေသည့်နှယ်။ ပတ်ဝန်းကျင်ရှိတခြားဂိုဏ်းမှဂိုဏ်းသားများမှာလည်း သက်ပြင်းခိုးချမိကြကာ သူနှင့်အတူရှာဖွေရန်ဆန္ဒရှိနေကြသည်။

ချန်နဥ်သည်ကျန်းရွေ့အားနက်နဲသောအကြည့်တစ်ချက်ပေးကာ ပြောလိုက်၏။

"ကျန်းသခင်လေး၊ စိတ်မရှည်မဖြစ်ပါနဲ့။ ကျွန်တော်လူတစ်ယောက်မှရှာမတွေ့ခဲ့ပေမယ်လို့ ဒီနေရာမှာသဲလွန်စတချို့ကိုရှာတွေ့ခဲ့ပါတယ်။"

သူပြောလိုက်သည့်စကားမှာအနည်းငယ်ထူးဆန်းပုံပေါ်သည်ဟု ကျန်းရွေ့ခံစားမိလိုက်ပြီး တစ်အောင့်မျှကြောင်အမ်းသွားရကာ ထို့နောက်ချန်နဥ်ပြောလာသည်ကိုကြားလိုက်ရပေသည်။

"လျို့ဝှက်နယ်မြေထဲမှာဂူပြိုကျမှုကမတော်တဆမှုတစ်ခုမဟုတ်ဘူး။ ဒါပေမဲ့ ဒါကိုကြည့်ရတာလူလုပ်ပေါက်ကွဲမှုနဲ့တူတယ်။"

လေထုကားရုတ်​ခြည်းတင်းမာသွားတော့၏။

ရှင်းဇုန်၏ဂိုဏ်းသားခေါင်းဆောင်ကမေးလာသည်။

"ချန်နဥ်အကြီးအကဲခင်ဗျ၊ တစ်ယောက်ယောက်ကမင်သခင်လေးကိုတမင်သက်သက်ထိခိုက်အောင်လုပ်လိုက်တယ်လို့ပြောချင်တာလား။"

ချန်နဥ်ကဗြောင်ကျကျဆိုသည်။

"အမှန်ပဲ။"

အဆုံး၌မူ သူကားလျို့ဝှက်နယ်မြေထဲသို့ဝင်သွားခဲ့ရုံသာ။ လူတိုင်းမှာသံယယဝင်နေကြပြီး သံသယအရှိဆုံးကား သဘာဝကျကျပင် ရှုလင်ကျားနှင့်အတူလမ်းလျှောက်သွားခဲ့သည့်လူစုပင်ဖြစ်ချေ၏။

ကျန်းရွေ့၏နှလုံးသားမှာအနည်းငယ်ပြာယာခတ်သွားမိသည်။ ယင်းကားသူ၏အပြစ်ရှိစိတ်ကြောင့်ဟုတ်မဟုတ်မသိပေ။ ချန်နဥ်စကားပြောသည့်အခါ၌ သူ့မျက်လုံးများမှာသူ့ကိုအမြဲကြည့်နေပုံပေါက်သည်။

တစ်ဖက်လူကဘာမှရှာမတွေ့ဘူးဆိုသည်မှာမဖြစ်နိုင်ပေ။ သူလုပ်ခဲ့တုန်းကဘာသဲလွန်စမျှမချန်ရစ်ခဲ့မိသည်မှာ ကျိန်းသေသည်။ သို့ပေမဲ့ လက်ရှိတွင် ရှုလင်ကျားဘယ်မှာရှိနေမှန်းမသိရပေရာ သူ့ဖက်တွင်ပြောင်းလဲမှုဖြစ်သွားမှာစိုးသည်။

ထိုစဥ်၊ လျို့ဝှက်နယ်မြေနှင့်သိပ်မဝေးသောနေရာ၌ဆူညံပွက်လောရိုက်လာကာ ထို့နောက်၌တစ်စုံတစ်ယောက်ကကျယ်လောင်စွာအော်လာသည်။

"အကြီးအကဲ! အကြီးအကဲ! သခင်လေးရဲ့အလောင်းကိုရှာတွေ့ပြီ!"

လူတိုင်းစိုးရိမ်ထိတ်လန့်သွားကြပြီး ချန်နဥ်ပင်လုံးဝမမျှော်လင့်ထားပေရာ အသံပျောက်သွားရသည်။

"ဘာ?"

အညိုရောင်မြေခွေးလေးကခြေလေးချောင်းဖြင့် ယင်ကောင်ပမာပြေးလာပေသည်။ သူကဆိုသည်။

"အကြီးအကဲ၊ ကျွန်တော်တို့တွေသခင်လေးရဲ့အလောင်းကို လျို့ဝှက်နယ်မြေအပြင်ဘက်ကတောင်အနောက်မှာရှာတွေ့ခဲ့တယ်။"

"လင်၊ လင်...သခင်လေး?"

ကိစ္စများကဤသို့ဖြစ်လာမည်ဟုချန်နဥ်လုံးဝမထင်ထားမိရာ သူ့ခြေဖဝါးပျော့ပြောင်းသွားရပြီး အပေါ်ခုန်တက်ကာ အလောင်း၏နံဘေးတွင်ဒူးတစ်ဖက်ထောက်၍စစ်ဆေးလိုက်မိသည်။

သူအလွန်ကြောက်လန့်နေမိသဖြင့် သူ့လက်များတုန်ရီလျက်ရှိကာ ထိုလူကားရှုလင်ကျားမဟုတ်ဘဲ အရင်တုန်းကမြေခွေးမျိုးနွယ်စုသခင်လေးယောင်ဆောင်ခဲ့သောမင်ရှောင်းဖြစ်နေသည်ကိုမြင်လိုက်ရပေသည်။

ချန်နဥ်သည်တစ်ဖက်လူ၏ရင်ဘတ်ပေါ်လက်တင်ကာ မျက်မှောင်ကြုတ်လိုက်မိ၏။

မင်ရှောင်းထံမှသူသတင်းမကြားတာအတော်ကြာပြီဖြစ်ပေမဲ့ တစ်ဖက်လူကတစ်ခုခုဖြစ်နေမည်ဟုသူမထင်ထားခဲ့မိပေ။

ဤကလေးကားမိဘမဲ့တစ်ယောက်ဖြစ်ပြီး မျိုးနွယ်စု၏အကြီးအကဲများ၏စောင့်ရှောက်ခြင်းခံခဲ့ရသည်။

ဤကဲ့သို့စရိုက်မျိုးဟာ ချန်နဥ်ကသူ့ကိုမြေခွေးမျိုးနွယ်စုသခင်လေးယောင်ဆောင်ဖို့ရွေးချယ်ရသည့် အကြောင်းရင်း၏တစ်စိတ်တစ်ပိုင်းလည်းဖြစ်သည်။

မင်ရှောင်း၏အစွမ်းအစကားမကြီးမားပေမဲ့ သာမန်လူများနှင့်ယှဥ်လျှင် သူ့ကိုယ်သူကာကွယ်ဖို့ကျိန်းသေပေါက်လုံလောက်ပေသည်။

သူကသူ့အသက်ကိုဘယ်လိုလုပ်ပြီးဆုံးရှုံးသွားတာလဲ။ အလောင်းကဒီနေရာမှာဘယ်လိုလုပ်ပေါ်လာတာများလဲ။

ဒါတွေအားလုံးကကျန်းရွေ့စီစဥ်ခဲ့တာများလား!

ချန်နဥ်ရုတ်ခြည်းခေါင်းမော့ကာ သူ့မျက်လုံးများကလျှပ်စီးပမာ ကျန်းရွေ့ကိုကြည့်လိုက်မိသည်။

ချန်နဥ်ကဲ့သို့မဟုတ်ဘဲ ကျန်းရွေ့တစ်ယောက်ကတော့ဖြင့် ဤကမ္ဘာပေါ်မှာမင်ရှောင်းရှိသည်ကိုသိပင်မသိပေ။ ထိုအလောင်းကရှုလင်ကျားဖြစ်သည်ဟုတကယ်ထင်နေမိသည်။ ဤမျှလွယ်လင့်တကူအောင်မြင်သွားလိမ့်မည်ဟု သူမထင်ထားမိပေရာ မရယ်မောမိအောင်သူ့ကိုယ်သူကြိုးစားထိန်းနေရသည်။

သူသည်သူ့မျက်နှာပေါ်ရှိအကြည့်ကိုဖုံးကွယ်ကာ ခေါင်းငုံ့၍ သူ့လက်ကောက်ဝတ်ပေါ်ကပုတီးစေ့ကြိုးမျှင်ကိုကြည့်လိုက်မိပေမဲ့ မှေးမှိန်သွားသောကျောက်ပုတီးစေ့က ယင်း၏မူလအစိမ်းရောင်ပြန်မဖြစ်သွားသည်ကိုမြင်လိုက်ရရာ အနည်းငယ်စိတ်ပျက်သွားမိသည်။

ဤသည်ကားရှုလင်ကျား၏သေဆုံးမှုကသူ့စွမ်းအားကိုကြီးမားစွာမတိုးလာရုံသာမက မတိုင်ခင်ကသူဆုံးရှုံးသွားခဲ့သောစွမ်းအားကိုလည်းပြန်မရလာကြောင်းပြသနေပေ၏။ ကြည့်ရတာတော့ တစ်ဖက်လူ၏တန်ဖိုးဟာလုံးဝကျဆင်းသွားပုံပင်။

ထိုအခိုက်၊ သူ့စိတ်ထဲတွင်တီးတိုးပြောသံတစ်သံကို ကျန်းရွေ့ရုတ်ခြည်းကြားလိုက်ရသည်။

"မင်းအစွမ်းပိုထက်လာချင်လား။"

ကျန်းရွေ့တောင့်တင်းသွားရကာ ထိုနောက်အလွန်ပျော်ရွှင်သွားသည်။

ထိုအသံကားသူ့ကိုသာမန်ထက်ထူးကဲသောပါရမီစွမ်းရည်နှင့် မရေတွက်နိုင်သောကံကောင်းမှုတို့ကိုယူဆောင်လာပေးခဲ့ပေမဲ့ ယင်းမပေါ်လာသည်မှာအချိန်အတော်အတန်ကြာပြီဖြစ်သည်။

တစ်ဖက်လူပျောက်သွားမှာစိုးသဖြင့် သူ့စိတ်ထဲတွင်လျင်မြန်စွာပြန်ဖြေလိုက်ရသည်။

"ခင်ဗျား​နောက်ဆုံးတော့ပြန်ရောက်လာပြီပဲ! သေချာပေါက်ကိုကျွန်တော်လိုချင်တာပေါ့! ကျွန်တော်ကအခုဉာဏ်ကြီးရှင်ဖြစ်နေပေမဲ့လည်း ကျွန်တော့်ကိုမလေးစားဘဲ နေရာတိုင်းမှာလိုက်ဖိနှိပ်နေတဲ့လူတစ်သိုက်ရှိနေတုန်းပဲ၊ ကျွန်တော်ပိုသန်မာလာလို့ရှိရင် သူတို့ဒီလိုထပ်လုပ်ရဲမတဲ့လား!"

အသံကဆိုသည်။

"မြေခွေးမျိုးနွယ်စုကိုအနိုင်ယူပြီး သူတို့ကိုအားနည်းအောင်လုပ်။ ပြီးရင်သူတို့ကိုအသုံးချပြီးတော့ မင်းရဲ့နာမည်ကောင်းကိုတည်ဆောက်ပြီး မင်းရဲ့တန်ဖိုးကိုမြှင့်လိုက်စမ်းပါ။ ဒီလောကကြီးရဲ့စွမ်းအားကိုတစ်လှမ်းချင်းချနင်းပြီးရင် မင်းကသေချာပေါက်ကိုအသန်မာဆုံးလူတစ်ယောက်ဖြစ်လာမှာပဲ။"

"သွားတော့၊ ဒါကရှားပါးတဲ့အခွင့်​ကောင်းပဲ။ မြန်မြန်သွားလုပ်လိုက်တော့။"

ချန်နဥ်သည်ကျန်းရွေ့၏မျက်နှာအတုကိုဒီကနေ့ခွာချရန် အလုံးစုံပြင်ဆင်ထားပြီးသားပင်။ ရှုလင်ကျားအဆင်ပြေနေမှန်းသူသိသည်။ ကျန်းရွေ့ကိုတကယ်အရှုံးမပေးမှန်းသူသိသည်။ ဤအခွင့်အရေးကိုအသုံးချကာ ရှုလင်ကျားကိုမှတ်မိနေစေချင်သည်။ ဤကောက်ကျစ်စဥ်းလဲကာ စက်ဆုပ်ဖွယ်ကောင်းသောကောင်လေးသည် အမြဲတစေမိစ္ဆာတစ်ကောင်ဖြစ်နေမည်ပင်။

သို့သော် မင်ရှောင်းအလောင်း၏အသွင်အပြင်ဟာ သူ့အစီအစဥ်များကိုသာမက သူ့စိတ်ကိုပါဖျက်ဆီးသွားပေသည်-- မင်ရှောင်းနှင့်သူ၏ဆက်ဆံရေးကား ရှုလင်ကျားနှင့်သူ၏ဆက်ဆံရေးလောက်မနီးကပ်သော်လည်း မင်ရှောင်းဟာလည်းသူ့မျိုးနွယ်စုကပင်ဖြစ်ချေ၏!

"ချန်နဥ်အကြီးအကဲ၊ ကျွန်တော်တစ်ခုလောက်ပြောချင်ပါတယ်။အခုချိန်မှာအရေးကြီးဆုံးအရာက မင်သခင်လေးကိုကယ်လို့ရမရကြည့်ဖို့ပဲ။ ပြီးမှတခြားအကြောင်းပြောကြတာပေါ့။"

ကျင်းဟိုင်ဂိုဏ်း၏သမားတော်တစ်ဦးဖြစ်သောကျန့်ရှန်းကထွက်လာကာဆိုသည်။

"ကျွန်တော်သူ့ကိုစစ်ဆေးကြည့်ပါရစေ။ သေဆုံးရတဲ့အကြောင်းအရင်းကိုလေ?"

ကျင်းဟိုင်ဂိုဏ်းမှလူနည်းစုသာလျှင်ရှိပြီး ရှုလင်ကျား၏အဖွဲ့မှာသူ့ကိုအနည်းငယ်အားကိုးမိကြကာ သူမျက်နှာသာပေးသည်ကိုလက်ခံလိုက်ကြပြီး ယခုအချိန်အဆင်ပြေဖို့သာစိတ်အားထက်သန်စွာဖြင့်မျှော်လင့်မိကြသည်။

ဒါကပထမဦးစားပေးရမည့်အရာဖြစ်သည်ဟု ချန်နဥ်လည်းခံစားမိပေရာ ဘေးကိုရွေ့ဖယ်ပေးလိုက်သည်။

ယင်းအလောင်းကိုကျန့်ရှန်းကြည့်လိုက်အပြီးတွင် ဤလူ၏ခန္ဓာကိုယ်ပေါ်တွင်အမာရွတ်မရှိ၊ မည်းနက်သောဒဏ်ရာမရှိပေမဲ့ ဝိညာဥ်ကတော့ဖြင့်ပျောက်ဆုံးလျက်ရှိကာ သူအလုံးစုံကယ်တင်ပေးလို့မရကြောင်း သိလိုက်ရသည်။

သူခေါင်းခါကာ နောင်တကြီးစွာဖြင့်ပြောလိုက်သည်။

"စိတ်မကောင်းပါဘူး၊ ကျွန်တော်ကယ်ပေးလို့မရဘူး... ဒီသေပုံသေနည်းကတကယ်ထူးဆန်းတယ်။"

ချန်နဥ်သက်ပြင်းချလိုက်မိချိန်တွင် သူ့နောက်ရှိတစ်စုံတစ်ယောက်ကစိတ်လှုပ်ရှားစွာပြောလာသည်ကိုကြားလိုက်ရတော့သည်။

"ဒါဘယ်လိုလုပ်ဖြစ်နိုင်မှာလဲ!"

သူနောက်လှည့်ကြည့်လိုက်သော် ကျန်းရွေ့ကခြေလှမ်းနှစ်လှမ်း၊ သုံးလှမ်းတည်းဖြင့်ပြေးလာကာ မင်ရှောင်း၏လက်ကိုဆွဲ၍ ရိုးသားစစ်မှန်စွာအော်လာပေသည်။

"ရှစ်ရှုန်း!"

ချန်နဥ်: "...မင်းဘာပြောလိုက်တယ်?"

သူကမော့ကြည့်ကာဆိုလာသည်။

"ချန်နဥ်အကြီးအကဲ၊ ကျွန်တော်ပြဿနာမဖြစ်စေချင်ပေမဲ့ ကိစ္စတွေကဒီလောက်ထိဖြစ်လာမှတော့ ကျွန်တော့်မှာခင်ဗျားအတွက်ဖုံးကွယ်ပေးဖို့နည်းလမ်းတကယ်မရှိတော့ဘူး။"

သူသည်မင်ရှောင်း၏အလောင်းကိုလက်ညှိုးထိုးကာ နောက်လှည့်၍ လူအုပ်ကြီးထံပြေးသွားကာပြောလိုက်၏။

"ဒါကမြေခွေးမျိုးနွယ်စုသခင်လေးမဟုတ်ဘူး။ သူကဟန်ဆောင်နေတာပဲ။ သူ့ရဲ့ပုံစံအစစ်အမှန်က ကျွန်တော့်ရဲ့ရှစ်ရှုန်းရှုလင်ကျားပဲ!"

ကျန်းရွေ့ဒါကိုပြောလိုက်ပြီးမကြာမီ၌ လက်ရှိလူတိုင်းမှာဆူညံပွက်လောရိုက်သွားကြသည်။

စုန့်ယွင်ကဆိုသည်။

"ကျန်းရှစ်တိ၊ မင်းဘာတွေပြောနေတာလဲ။"

ကျန်းရွေ့ကပြောသည်။

"ခုနကလျို့ဝှက်နယ်မြေထဲမှာရှိနေတုန်းက သူ့ရဲ့လှုပ်ရှားမှုနဲ့တိုက်ကွက်တွေကိုအစ်ကိုသတိမထားမိဘူးလား။ တကယ်တော့ ဒီမင်ရှောင်းကိုကျွန်တော်လေ့လာထားပြီးသား။ မင်သခင်လေးဆိုတာကအစ်ကိုရှုဟန်ဆောင်နေတဲ့အရာပဲ။ ဒါပေမဲ့ အဲ့ဒီ့အချိန်တုန်းက အစ်ကိုရှုလုပ်ချင်နေတဲ့ကိစ္စကိုကျွန်တော်နှောင့်ယှက်မိမှာစိုးလို့ ကျွန်တော်ပါးစပ်မဟခဲ့တာ။"

သူကားကိုယ့်ကိုယ်ကိုအပြစ်တင်မှုဖြင့်ပြည့်နှက်နေကာ ၎င်းကိုမယုံကြည်နိုင်ပေ။

"ဒါပေမဲ့ ဒီအချိန်ခဏလေးအတွင်းမှာ သူအသတ်ခံလိုက်ရမယ်လို့ကျွန်တော်မထင်ထားခဲ့မိဘူး။"

သူ့စကားများဟာလည်း သူဟာရှုလင်ကျားမည်သူဖြစ်ကြောင်းသိနေသည်မို့ အောင်မြင်ကျော်ကြားမှုအတွက် သူနှင့်မယှဥ်ပြိုင်လိုဟုပြောနေဟန်။ ရှုလင်ကျားကသူ့အတွက်တိတ်တခိုးမျက်နှာအဖက်ဆယ်ပေးသွားခဲ့သည်။

ဒါကိုကြားလိုက်ရရာ ချီဇုန်ဂိုဏ်းသားအများစုမှာထိတ်လန့်သွားကြပြီး အချင်းချင်းကြည့်မိကြကာ မတိုင်ခင်ကလျို့ဝှက်နယ်မြေထဲတွင်မင်ရှောင်း၏အပြုအမူများကိုပြန်စဥ်းစားမိကြသည်။ သူတို့ပိုတွေးကြည့်လေ ယင်းတို့နှစ်ယောက်ပိုတူလေလေပင်။

"ဒါက...တကယ်ပဲရှုရှစ်ရှုန်းဖြစ်နေမလား။ သူကလင်ရှောင်းသိုင်းကွက်တွေကိုမသုံးသွားတော့ ငါမမှတ်မိလိုက်ဘူး!"

ဂိုဏ်းသားတစ်ယောက်ကထိတ်လန့်စွာရေရွတ်ရင်း အလောင်းကိုမယုံကြည်နိုင်မှုများဖြင့်ကြည့်လိုက်မိသည်။

"ဒါ၊ ဒါက...ရှုရှစ်ရှုန်းကဘယ်လိုလုပ်ပြီးသေသွားမှာလဲ!"

သူတို့၏ထိတ်လန့်ကာအမှန်ကိုသိသွားသောမျက်နှာထားများဟာလည်း ကျန်းရွေ့၏စကားများကိုအတည်ပြုလိုက်သည်နှင့်ညီမျှ၏။

ပတ်ဝန်းကျင်ရှိလူများမှာ လျို့ဝှက်နယ်မြေထဲကမင်ရှောင်း၏လုပ်ဆောင်မှုနှင့်ပတ်သတ်၍ တွေးမိကြကာ ဒါဟာကျိုးကြောင်းဆီလျော်သည်ဟု သူတို့လည်းခံစားမိချေသည်။ မြေခွေးမျိုးနွယ်စု၏သခင်လေးကဤကဲ့သို့အစွမ်းအစမျိုးဘာကြောင့်ရှိနေမှန်းသူတို့လည်းသိချင်နေခဲ့မိပေမဲ့ အကယ်၍ ယင်းကရှုလင်ကျားသာဆိုရင်တော့ ဒါကပုံမှန်ပင်ဖြစ်သည်။

ကျန်းရွေ့၏မျက်နှာကဒေါသအပြည့်ပင်။

"ရှုရှစ်ရှုန်းကဘယ်လိုလုပ်ပြီးသေသွားရတာလဲ။ ကျွန်တော်မြေခွေးမျိုးနွယ်စုကိုဒီမေးခွန်းမေးလိုက်မယ်။ ခင်ဗျားတို့ရဲ့သခင်လေးအစစ်ကနှစ်ပေါင်းများစွာပုန်းနေပြီး လူတွေရှေ့မှာတစ်ခါမှမပေါ်လာခဲ့ပေမဲ့ ကျွန်တော်တို့လင်ရှောင်းဂိုဏ်းကတော့ မတော်တဆလို့ပဲယူဆထားခဲ့ကြတယ်။"

"ချန်နျဥ်အကြီးအကဲ၊ ခင်ဗျားကျွန်တော့်ကိုဖြေရှင်းချက်မပေးနိုင်ဘူးလား။"

သူသည်ရှင်းလင်းစွာပင်အရာအားလုံးကိုလုပ်ခဲ့ပေမဲ့ ယခုအခိုက်အတန့်၌မူ ဖြောင့်မတ်မှန်ကန်သောဂုဏ်သိက္ခာအပြည့်နှင့်ဖြစ်နေကာ ပြောင်မြောင်စွာပင်အခြားသူများကိုရှင်းပြစေချင်လေရာ ချန်နဥ်တစ်ယောက်မှာတော့ဖြင့်လေးစားသည်ဟုပြောမိလုနီးပါးပင်။

သူသည်မျိုးနွယ်စုခေါင်အတွက် မြေခွေးမျိုးနွယ်စုကိုတာဝန်ယူခဲ့ပေရာ သူဟာလည်းခက်ထန်သောလေပြင်းနှင့်လှိုင်းများကိုကြုံတွေ့ခဲ့ဖူးသောတစ်စုံတစ်ယောက်ပင်ဖြစ်ကာ ယခုတွင်ကျန်းရွေ့၏ရည်ရွယ်ချက်များကို သူဖောက်မြင်နိုင်ပေသည်။

မြေခွေးမျိုးနွယ်စု၏ခွန်အားကိုထိန်းချုပ်ရန်အလို့ငှာ ချန်နဥ်ကမျိုးနွယ်စုခေါင်၏သားအရင်းယောင်ဆောင်ဖို့ တစ်ယောက်ယောက်ကိုရှာဖွေခဲ့သည်ဟု တစ်ဖက်လူကရှင်းလင်းစွာခံစားမိနေသည်။ ကျန်းရွေ့ကချန်နဥ်နှင့်စတင်ပြီး ရှုလင်ကျား၏သေဆုံးမှုကိုမြေခွေးမျိုးနွယ်စုပေါ်အပြစ်ပုံချကာ မြေခွေးမျိုးနွယ်စုကိုဖိနှိပ်လာသည်။

တကယ့်ကိုရည်မှန်းချက်ကြီးမားလွန်းပါပေတယ်။

ချန်နဥ်ပင့်သက်ရှိုက်ကာပြောလိုက်သည်။

"ကျန်းသခင်လေး၊ ရှင်းပြစေချင်တယ်လား။ ကောင်းပြီလေ၊ ဒါဖြင့်ရင် စာရင်းနည်းနည်းချင်းစီရှင်းကြတာပေါ့။"

သူခေါင်းလှည့်ကာပြောလိုက်သည်။

"ခုနကငါဒီကိုလာစေချင်တဲ့ ဧည့်သည်တွေရောက်လာပြီလား။"

သူ့လက်အောက်ငယ်သားကပြန်ဖြေသည်။

"ဟုတ်ကဲ့၊ အပြင်မှာရောက်နေပါပြီ။"

ချန်နဥ်ပြောလိုက်သည်။

"သွားဖိတ်ခဲ့ချေ။"

လျှောက်ဝင်လာသည့်လူကိုမြင်လိုက်ရသော် ကျန်းရွေ့တစ်ယောက်တောင့်ခဲသွားရပြီး သူ့မျက်နှာပေါ်ကအမူအရာမှာမသိလိုက်မသိဘာသာတည်ငြိမ်သွားသည်။ ထို့နောက်သူထရပ်ကာပြောလိုက်သည်။

"ယင်းရှစ်ရှုန်း။"

ကြည့်ရတာတော့ ယင်းချန်တစ်ယောက်ရှောင်းနဥ်အာနှင့်အခြားလင်ရှောင်းဂိုဏ်းသားများကိုပါ ချင်းချိုးထံခေါ်လာပုံပင်။

ယင်းကားချန်နဥ်စီစဥ်ခြင်းမဟုတ်။ သူလျို့ဝှက်နယ်မြေထဲမှထွက်လာချိန်တွင် လင်ရှောင်းချီဇုန်၏ယင်းချန်ကဂိုဏ်းသားတချို့ခေါ်၍ လာလည်သည်ဟုတစ်စုံတစ်ယောက်ကတင်ပြလာခဲ့သည်။ သို့ပေမဲ့ဘာအတွက်ကြောင့်မှန်းသူမသိပေ။

ဒါကိုချန်နဥ်ကြားလိုက်တုန်းက သူဟာအချိန်ကောင်းမှာရောက်လာသည်ဟုခံစားမိလိုက်သဖြင့် ဤအခိုက်အတန့်၌သူ့ကိုဖိတ်ခေါ်လိုက်ခြင်းပင်။

ယင်းချန်သည်ခေါင်းမာသောအရှင်သခင်တစ်ပါးဖြစ်၏။ ကျန်းရွေ့တစ်ယောက်တောင်ထွတ်ပေါ်တက်လာသည့်ပထမရက်ကတည်းက သူ့ကိုတကယ်ကြီးကြောက်နေမိခဲ့သည်။ ဤအခိုက် သူထိတ်လန့်သွားကာ သံသယဝင်မိပြီးမေးလိုက်သည်။

"အစ်ကိုကဘာလို့ဒီမှာရှိနေတာလဲ။"

ယင်းချန်ကကျန်းရွေ့အပေါ်အမြဲတမ်းအထင်အမြင်သေးသည်။ သူဟာလည်းသူ့ကိုလျစ်လျူရှုလိုက်ပေမဲ့ အနောက်ကလိုက်လာသောရှောင်းနဥ်အာကတော့ခေါင်းလှည့်ကာ ကျန်းရွေ့အားဗလာနတ္ထိအကြည့်တစ်ချက်ပေးလာသည်။

ခုနကဘာဖြစ်နေမှန်း ယင်းချန်မသိပေရာ မင်ရှောင်း၏အလောင်းပေါ်သာမန်ကာလျှံကာဝေ့ဝဲကြည့်လိုက်ပြီး သူ့ကိုသိမသိ အာရုံစိုက်မနေပေ။

သူသည်ချန်နဥ်အားသူ၏ရည်ရွယ်ချက်တိုက်ရိုက်ရှင်းပြလာသည်။

"ချန်နဥ်အကြီးအကဲနဲ့ကျွန်တော့်ရှစ်ရှုန်းရှုလင်ကျားနဲ့က နှစ်တွေအကြာကြီးသူငယ်ချင်းဖြစ်လာတယ်လို့ကျွန်တော်ကြားမိတယ်။ အခုကျွန်တော့်မိသားစုရဲ့ဆရာသခင်ဆီကနေ ကျွန်တော့်ရှစ်ရှုန်းကိုတောင်ထွတ်ပေါ်ပြန်ခေါ်လာဖို့ ကျွန်တော်အမိန့်ရခဲ့တယ်။ သူကချင်းချိုးရဲ့အနီးတဝိုက်မှာမကြာသေးခင်ကပေါ်လာတယ်လို့ လူတချို့ကပြောတယ်။ ချန်နဥ်အကြီးအကဲသူ့ကိုအရင်ကတွေ့မိလားဆိုတာကျွန်တော်သိချင်လို့ပါ။"

ချန်နဥ်မဖြေရသေးမီ ကျန်းရွေ့နှင့်အတူလာခဲ့သောချီဇုန်ဂိုဏ်းသားကအောင့်အီးမထားနိုင်တော့ဘဲ ယင်းချန်ကိုအော်ပြောလိုက်သည်။

"ယင်းရှစ်ရှုန်း၊ ရှုရှစ်ရှုန်းကအသတ်ခံလိုက်ရပြီဗျ!"

ယင်းချန်ရုတ်ခြည်းခေါင်းလှည့်ကာအော်လိုက်သည်။

"မင်းဘာ​ပြောလိုက်တယ်?"

သူတို့အုပ်စုကရှုလင်ကျားကိစ္စအတွက်လာခဲ့ခြင်းပင်။ သူတို့ဒါကိုကြားလိုက်ရသော် လူတိုင်းထိတ်လန့်သွားကြသည်။ သူတို့မျက်ဝန်းထဲတွင်မျက်ရည်များဖြင့် ဂိုဏ်းသားကအရှေ့ကိုပြေးသွားကာ ခုနကကိစ္စအကြောင်းယင်းချန်ကိုထပ်ပြောပြလိုက်သည်။

ဤအချိန်တွင် ရှောင်းနဥ်အာသည် အခက်အခဲများစွာကြုံတွေ့ရပြီးနောက်မှသာလျှင် ယင်းချန်နောက်လိုက်၍တောင်အောက်ဆင်းလာနိုင်ပေသည်။ ရှုလင်ကျားပြန်လာအောင်ဘယ်လိုသိမ်းသွင်းရမလဲဟု သူမတွေးနေမိပေမဲ့ ဤကဲ့သို့သတင်းမျိုးကိုကြားလိုက်ရလိမ့်မည်ဟု သူမမထင်ထားခဲ့မိပေ။

သူမခန္ဓာကိုယ်တွန့်ခါသွားပြီးနောက် လဲကျကာချက်ချင်းမေ့လဲသွားတော့သည်။

___________________________________________

!zawgyi!

___________________________________________

ခ်င္းခ်ိဳး၊ လ်ိဳ႕ဝွက္နယ္ပယ္အတြင္း၌။