Жимин хөмхийгөө зуун Югём руу ухасхийхэд Рюжин тайвнаар "Энэ бүхэн зүгээр л осол байсан юм. Жиминаа, ургуулж бодохоо боль. Би бүжгийн бэлтгэлийн дараа ядарчихсан явж байхдаа ухаан алдаад шатнаас уначихсан хэрэг. Югём намайг олж эмнэлэгт хүргэж өгсөн тулдаа л би өдий зэрэгтээ байна" гэх нь тэр.

Бүсгүйн үгс итгэл үнэмшил төрүүлэхүйц агаад түүний хоолойн өнгө нэгэн жигд байж гацаж түгдрэлгүйгээр ийн өгүүлсэн нь Жиминыг төөрөгдүүлж орхив.

Югём ч дайнд ялсан баатар лугаа адил царай гарган ихэмсгээр мушилзах аж.

Жимин хэсэг дуугаа хураасны эцэст санаа алдан "Би яаралтай ажилтай байсан ч орхиод ирчихсэн юм. Байдал бодсоноос минь долоон дор байсан ч ингээд эдгэрж байгааг чинь харахад сайхан байна. Рюжинаа, эмнэлгээс гарахдаа санаа зоволтгүй намайг дуудаарай. Ойлгов уу?" хэмээхэд бүсгүй инээмсэглэн толгой дохилоо.

Залуу эр Рюжинд зориулж авчирсан амттаны цуглуулгаа орны дэргэд орхиод өрөөнөөс гарахдаа одоог хүртэл үүдэнд зогсож байсан Югёмыг мөрлөн зөвхөн тэдэнд л сонсогдохоор "Рюжины сэтгэл санааг үймүүлээд үзээрэй. Бид хэдий найзууд ч хэрэв тийм зүйл болвол..өршөөлгүй шүү" гэх нь тэр.

Югём Жимины өдөөн хатгалга гэмээр сүрдүүлгэд хэсэгхэн зуур автсан ч хаалга савагдан хаагдах чимээтэй зэрэгцэн юу ч болоогүй мэт царайлан бал бурмын гэмээр гэмгүй инээмсэглэл тодруулсаар эмнэлгийн орны өмнө өвдөглөн сууж бүсгүйн гараас атгалаа.

-Хмм, Рюжинаа. Чи үнэхээр эмнэлгээс гарахдаа Жиминыг дуудах гээгүй биздээ? Би хажууд чинь байсаар байхад..гомдоож байна шүү.

Залуу эмнэлэгт байх хугацаандаа үргэлж орны өмнө өвдөглөн сууж бүсгүйн гараас атгадаг төдийгүй энэ удаад ч бас үйлдлээ давтаж байна. Гэвч түүний гэмгүй инээмсэглэлийг зэвүүцэл тээсэн харц нь давамгайлж байгааг Рюжинээс өөр хэн ч анзаарахгүй байсан биз.

-Би чамд энд ирээд байх хэрэггүй гэж олон хэлсэн байхаа? Чи хэзээ надад анхаарал тавьдаг болчихсон юм. Ким Югём! битгий жүжиг тавиад бай. Чи хэдхэн хоногийн өмнө л гэхэд намайг "ичгүүргүй янхан" гэж дуудаж байсан байж одоо гэнэт сайн хүний дүрд тоглож байх шив. Хөгийн новш.

Югём санаа алдаад Рюжины үсийг илбэж "Зүгээрээ, бүх зүйл зүгээр. Би одоо ойлгосон болохоор битгий ингэж бухимд л даа. Би чамд хайртай" хэмээгээд бүсгүйн уруул дээр үнсэхэд жаалхан охин хариу үнсээгүй ч огтхон ч эсэргүүцсэнгүй.

Нээлттэй салхивчаар нэвтрэх сэвшээ салхи залуу эрийн авчирсан цэцгийн үнэрээр өрөөг дүүргэх агаад энэхүү үзэгдлийг хөндлөнгөөс ажваас үлгэр домог аль эсвэл олон ангит киноны хэсэг лугаа тун чиг үзэсгэлэнтэй мөч ажгуу.

Бүсгүй хариу үнсэлт илгээхдээ өөрийн мэдэлгүй уйлчих шахна. Түүний толгойд гагцхүү "худалч" гэсэн үг эргэлдэх агаад тэр яагаад өөрийг нь шунаглан үнсэх залуугаас татгалзаж чадахгүй байгаагаа ойлгосонгүй.

Хортой гэдгийг нь мэдэж байна. Гэсэн ч энэ харц болоод хөдөлгөөн..Ким Югём, чамаас ангижрахыг оролдох бүрийд би яагаад худал гэдгийг нь мэддэг үгсдээ тархиа угаалган толгой дохидог юм бол.

Намайг ахин зовоохын тулд "зүгээрээ" гэж тайтгаруулаад л. Ийм олон зүйлсийн дараа яагаад ч юм чамайг л үзэн ядаж чадахгүй нь.

Чи бол үзэсгэлэнтэй халхавчаараа намайг сүйрүүлдэг гэмт хэрэгтэн.

...

Анир чимээгүй шөнийг дуудлага ирэх чимээ бусниулж орхив.

Жимин сайхан зүүдийг нь тасалдуулсанд бухимдсан ч утасны дэлгэцэн дээр тодрох нэрийг хараад балмагдаж орхилоо.

-Байна уу? Рюжинаа, ийм орой юу болсон юм? Зүгээр үү?

-Одоо ирээд намайг энэ тамын газраас аваад яваач тэгэх үү? Сувилагч нар намайг эмнэлгээс гарах гэж байгааг мэдчихвэл Югёмыг дуудчихна. . Би хагас цагийн дараа гэхэд эмнэлгийн арын хаалган дээр хүлээж байх болохоор хурдан ирээрэй. Гуйя.

Залуугийн нойр хормын төдийд сэргэх шиг болоход Жимин унтлагын хувцсаа ч солилгүй машин руугаа гүйлээ. Хэдийгээр цаг хангалттай байсан ч бүсгүйн мэгших дуу залуу эрийг цухалдуулж орхисон хэрэг.

Жиминыг хувийн эдлэнгээсээ хөдлөхтэй зэрэгцэн гадаа аадар бороо шаагих нь тэр. 9дүгээр сарын эхэн үед бороо орох нь хэвийн үзэгдэл ч гэлээ шөнийн 3 цагт үзэгдэх орчинг үгүй болтол бороо шаагих нь хачин.

Яг л залууг битгий эмнэлэг рүү яв гээд хэн нэгэн дохио өгөөд байх шиг..

Эдгээр өдрүүдэд Жимины толгойд эргэлдэж байсан бүхэн түүний хамгийн найз мөн хамгаас ихээр хайрладаг бүсгүйн хоёрынх нь хооронд орших нарийн нандин харилцааны утга учрыг ойлгох явдал болоод байсан ч харамсалтай нь тэр бодол дотроо үүсгэсэн төөрдөг байшиндаа гүйсээр л байгаа билээ.

Рюжин Югём хоёрын хооронд ямар нэг тайлбарлахын аргагүй гүн бөгөөд бохир холбоо байгаа. Үүгээр ч зогсохгүй тэр холбоо хайртай бүсгүйг нь туйлдуулж байгааг тэрбээр зөнгөөрөө мэдэрж байв.

...

Бүсгүй гар утсаа байгаа эсэхийг ахин дахин шалгасаар өмднийхөө халаастай зууралдан урдах замаа ч харалгүйгээр эмнэлгээс гарахдаа хэн нэгнийг мөргөчих нь тэр.

-Зугаалахад тохиромжтой цаг биш л байх шиг байх юм. Рюжинаа, хаашаа ингэж яарсан юм?

Танил хоолой, дасал болсон сүрчиг.

Югём бүсгүйг эмнэлгийн үүдэнд амдан хүлээж байсан нь энэ. Ам султай шөнийн ээлжний сувилагчдын нэг аль хэдийн Югём руу залгаж бүсгүйг хаашаа ч юм зугтах гэж байгааг сануулсан бололтой. Магад энэ мэдээллээс хоцрохгүй гэсэндээ л залуу эр эмнэлгийн ажилчдад хахтал нь мөнгө төлсөн биз.

-Би..би зүгээр л гэр лүүгээ явах гээд.. Энэ уйтгартай газарт чинь галзуурчих гээд байсан юм. Тэгээд ч би энтертаймент дээр очих хэрэгтэй. Чи мэднэ дээ? Миний дебют ойртож байгаа болохоор бэлтгэлээ хийхгүй бол болохгүй.

Рюжин яагаад ч юм сэтгэлийнх нь мухарт шигдэж орхисон айдасдаа эзэмдүүлж амандаа орсон бүхнийг нэг амьсгаагаар дуржигнуулна.

Залуу эр Рюжины хацрыг илбэн " Зүгээр л намайг дуудчихгүй дээ. Нэгэнт чи гараад ирснийх хоёулаа хамт ойролцоох далайн эргийн амралт руу очиж хоноё. Хүсвэл нар мандахыг ч харж болох юм..Би маргааш хуваарьт ажилгүй болохоор санаа зоволтгүй" хэмээгээд бүсгүйгээс хариу хүлээлгүй ягаахан уруулыг нь зөөлнөөр үнслээ.

Хэдхэн хоногийн өмнөөс Югёмын энэ сайхан ааш бүсгүйг тавгүйцүүлэх болсон билээ. Ерөөс танихгүй хүн энэ залуугийн биед шүглэчихэв үү гэлтэй. Энэ их дотночирхол тэр их халамж Югёмоос гарж байна гэдэг эвгүй гэж яана.

Далайн эргийн амралт гэнээ? Болохгүй ээ..Жимин надруу ирж байгаа шүүдээ. Би түүнтэй уулзана гэж тохирсон. Би түүнийх байхыг хүссэн.. Яагаад намайг үнсээд байгаа юм. Яагаад надад хайртай гэж хэлээд байгаа юм. Яагаад бүх зүйл хожимдсон байхад.. сэтгэл минь хэдийн чамруу тэмүүлэхээ больсны дараа намайг халамжлаад байгаа юм бэ?

3:20 Минут.

Энэхэн мөчид Жимин машинаа замын эсрэг талд байрлуулчихаад эмнэлгийн арын хаалга руу яаран гүйж байлаа. Тэрбээр тохирсон цагаасаа 10 минутын өмнө ирсэн ч юунд ч юм бэ сэтгэл нь тэвдэн болзоот газар луугаа яаравчилна.

Гэтэл..

Шалбааг дундуур туучин гүйж байсан залуу эр гэнэтхэн зогтусан байрандаа зогслоо.

Түүнээс арван алхмын зайд хайртай бүсгүй нь хамгийн сайн найзтай нь үнсэлцэж байна..

Чи минь миний сэтгэлийг мэдэх үү? Зөвхөн чамайг л бодож өнгөрүүлдэг байсан өдрүүдийг минь? Шин Рюжин..Чамайг хайрлах гэж ямар их хичээж байгааг минь чи мэддэг ч болоосой.

Сэтгэлээ ойлгуулж байсан удаагүй болохоор одоо бүх зүйл оройтсон гэж үү?

Аадар бороо шаагисаар, залуу байрандаа зогссоор л. Хэн нэгэн түүнд яг одоо харж байгаа зүйл нь бодит байдал бус дан ганц Югёмын албадлага дор өрнөж байгаа зүйл гэдгийг тайлбарлаад өгчихдөг ч болоосой.

Хэрэв тийм бол Жимин хийсвэр төсөөлөлдөө автахгүй шүүдээ. Гэсэн ч энэ нөхцөл байдал хийсвэр төсөөлөл байтугайг л өрдөөд өгөхөөр адгийн байсныг нуух юун.

Өдийг хүртэл хэнд ч ингэтлээ татагдаж үзээгүй. Хэнийг ч ингэж анхаарж байгаагүй. Чамаас өөр хэнийг ч хайрлахыг хүсээгүй.

Одоо хэллээ ч энэ бүхэн чамд минь шалтаг шиг сонсогдож мэднэ. Гэсэн ч миний төлөө ганц л зүйлийг ойлгож өгөөрэй. Хэн ч чамайг минь надаас илүүтэйгээр хайрлахгүй юм шүү.

Эхэлж амжилгүй төгсөх хайрын түүх байгаасай гэж хүсээгүй юмсан..

Жимин санаа алдаад хос хоёрыг орхин машин луугаа алхлаа.

Югём ч Рюжиныг машин руугаа хөтлөн дагуулахдаа нүднийхээ буланд зэрвэс үзэгдэх залуугийн төрхийг таниад амжив.

Бүсгүйг машинд суусны дараа ч Югём найзынхаа араас хэдэн хором харуулдан зогссон билээ.