!unicode!

မိုးရွာပြီးနောက်ကြည်လင်သောကောင်းကင်ယံကား သာမန်ထက်ပိုမိုရှင်းသန့်ပုံပေါက်သည်။ တောက်ပသောလမင်းမှာကောင်းကင်ယံထက်တွင် တံစဥ်ပမာချိတ်ဆွဲထားပြီး ၎င်း၏တောက်ပမှုမှာအေးမြလို့နေကာ တိမ်လွှာတို့၏ဝန်းရံခြင်းခံထားရသည့်လင်ရှောင်းတောင်ထွတ်ပေါ်တွင်ဖြာကျလျက်ရှိသည်။

ပုံရိပ်တစ်ခုကတောင်ခြေတွင်မတ်တပ်ရပ်နေပြီး အပေါ်မော့ကြည့်နေရာ လရောင်မှာသူ့မျက်နှာပေါ်ဖြာကျနေပြီး ၎င်းမှာမင်ရှောင်းဖြစ်သည်။

မင်ရှောင်းသည်ပတ်ဝန်းကျင်ရှုခင်းကိုဖြည်းညှင်းစွာရှုစားကာချီးကျူးမိ၏။

"တကယ့်ကိုခေတ်ကာလရဲ့ကျော်ကြားတဲ့တောင်ထွတ်ပါလားနော်။"

ထိုသို့ပြောပြီးနောက် သူဟာပင့်သက်ရှိုက်ကာ ဓားကိုပင်သုံးစရာမလိုဘဲ လူတစ်ကိုယ်လုံးမှာလွင့်မျောနေသောတိမ်တိုက်ပမာ အပေါ်ပျံသန်းသွားပြီး တောင်ထွတ်ထိပ်ဖျားထံဦးတည်သွားသည်။

ထိပ်ဖျားသို့ရောက်သွားသည်နှင့် သူပတ်ပတ်လည်ဝေ့ကြည့်လိုက်ပြီး ဝါးတောအုပ်ထဲဝင်သွားကာ သူ့ဝတ်ရုံလက်ထဲမှအမွှေးတိုင်တစ်တိုင်ထုတ်၍ ထွန်းညှိကာ မြေကြီးထဲစိုက်လိုက်ပြီး လက်နောက်ပစ်လျက်သားဖြင့်တိတ်တိတ်လေးစောင့်နေပေသည်။

တစ်အောင့်ကြာသော် တစ်စုံတစ်ယောက်ကဝါးတောအုပ်ထဲဝင်လာပြီး သူ့နောက်ရှိအသံတစ်သံကချိတုံချတုံဖြင့်

"ကျန်းရွေ့?" ဟုမေးလာသည်ကိုမင်ရှောင်းကြားလိုက်ရသည်။

သူအနောက်လှည့်ကာ အသာပြုံးလျက်ပြောလိုက်သည်။

"စိတ်မကောင်းပါဘူးဗျာ၊ ခင်ဗျားလူမှားနေပြီ။"

ထိုအမျိုးသားမှာအပြာရောင်တောက်ဓမ္မဝတ်ရုံကိုဝတ်ဆင်ထားပြီး မေးစေ့အောက်တွင်မုတ်ဆိတ်နှင့် သူ့ပုံပန်းသွင်ပြင်မှာအေးစက်ကာတည်ငြိမ်လှသည်။ သူကားလင်ရှောင်းချီဇုန်ပြစ်ဒဏ်စီရင်ရေးနန်းဆောင်၏အကြီးအကဲလုကျန်းဖြစ်ကာ သူ၏ရိုးသားဖြောင့်မတ်ခြင်းကြောင့်ထင်ရှားကျော်ကြားသည်။

သို့သော် ထိုကဲ့သို့ပုဂ္ဂိုလ်ဟာ အမွှေးတိုင်တစ်ချောင်းကြောင့် ညလယ်ခေါင်တွင်ဤကဲ့သို့နေရာတွင်ပေါ်လာသည်မှာ သိပ်ကိုသံသယဖြစ်စရာကောင်းသည်။

သူ့ရှေ့ရှိလူရွယ်၏မရင်းနှီးသောပုံပန်းသွင်ပြင်ကိုမြင်လိုက်ရရင်း လုကျန်းတစ်အောင့်မျှကြောင်အမ်းသွားရကာ ထို့နောက်ချက်ချင်းသတိချပ်၍ ခေါင်းနိမ့်ကာမေးလိုက်သည်။

"မင်းဘယ်သူလဲ။ မင်းဘာလို့လင်ရှောင်းတောင်ထွတ်ပေါ်မှာရှိနေတာလဲ။ ငါ့ကိုမြန်မြန်ပြော! မဟုတ်ရင် ငါ့အဆိုးမဆိုနဲ့!"

မင်ရှောင်းမှာစိုးရိမ်ပူပင်မှုစိုးစဥ်းမျှမပြဘဲ ခေါင်းရမ်းကာပြောလိုက်သည်။

"လုအကြီးအကဲ၊ မအော်ပါနဲ့ဗျာ။ ခင်ဗျားနဲ့ကျွန်တော်ကရှက်စရာကောင်းတဲ့ကိစ္စတွေအများကြီးကိုအတူလုပ်ခဲ့ပြီးတော့ တစ်လှေတည်းစီးနေတာပဲကို ဘာလို့များဒီလောက်စိမ်းကားပြနေရတာလဲဗျ။ ကျွန်တော်ဒီကိုလာတာ ခင်ဗျားကိုပြောစရာရှိလို့ပဲ။"

လုကျန်း၏မျက်နှာထားမသိမသာပြောင်းလဲသွားကာ မှောင်မိုက်စွာ​မေးလာသည်။

"ဘာပြောမလို့လဲ။"

မင်ရှောင်းပြောလိုက်သည်။

"ကျန်းရွေ့သေပြီ။"

လုကျန်းကအရင်ဆုံးမိန်းမောသွားပြီးနောက် လှောင်ပြုံးပြုံးကာပြောလာသည်။

"သစ္စာမရှိဘဲဝတ္တရားဖောက်ပြန်တဲ့ကောင်က ဂိုဏ်းရဲ့ကျက်သရေကိုညှိုးနွယ်စေတော့ ဂိုဏ်းရဲ့စည်းမျဥ်းတွေနဲ့ရှင်းပစ်ခံရသင့်တာကြာပြီ။ သူသေရမှာပဲလေ။ မင်းနဲ့သူရဲ့ဆက်ဆံရေးကဘာလဲ။ ငါ့ကိုပြော!"

မင်ရှောင်းသူ့ကိုစိုက်ကြည့်နေပြီး သူကားအလွန်အမင်းစိတ်သက်သာရာရသွားပုံပေါ်သည်ကိုမြင်လိုက်ရသဖြင့် သူ့မျက်နှာထက်ရှိအပြုံးမှာနက်ရှိုင်းသွားကာ ပြောလိုက်သည်။

"ကိစ္စမရှိပါဘူး၊ ဒါပေမဲ့ ကျွန်တော်သူ့ရဲ့လျို့ဝှက်ချက်အကုန်လုံးကိုသိတယ်ဗျ။ ဥပမာပြောရရင်....လုအကြီးအကဲကထာဝရရှင်သန်မဲ့နည်းလမ်းကိုရှာချင်လို့ ဂိုဏ်းထဲမှာခွင့်မပြုထားတဲ့ဆေးဝါးတချို့ကိုသယ်ဆောင်ထားတယ်ဆိုတာကိုပေါ့။"

မင်ရှောင်းကသူ့ကိုလှည့်စားနေသည်ဟု လုကျန်းအစကထင်မိသော်လည်း ထိုစကားကိုကြားလိုက်ရသော်သူထိတ်လန့်သွားရကာ နောက်ဆုံးတွင်သူ့ကိုယုံကြည်သွားပေမဲ့ တစ်ချိန်တည်း၌ကျန်းရွေ့ကိုတိတ်တခိုးကျိန်ဆဲမိသည်။

ပြောရမှာဆန်းသည်၊ ပြစ်ဒဏ်စီရင်ရေးနန်းဆောင်၏အကြီးအကဲအနေဖြင့် လုကျန်းဟာအမြဲတစေ​ဖြောင့်မတ်မှန်ကန်စွာပြုမူဆောင်ရွက်ပြီး အတိတ်တွင်တပည့်ဂိုဏ်းသားများကိုခွဲခြားမဆက်ခံခဲ့သော်လည်း လင်ရှောင်းဂိုဏ်းကိုကျန်းရွေ့ရောက်လာကတည်းက ထိုတစ်ယောက်ဟာချီးကျူးဖွယ်ကောင်းသည်ဟုခံစားခဲ့ရသည်။

ထို့အပြင် ကျန်းရွေ့ဟာလည်းသူ့ကိုတမင်သက်သက်ဖားယားခဲ့သဖြင့် လုကျန်းဟာဒီကလေးကိုလုံးဝအရေးမစိုက်ခဲ့ပေ။

သူဟာတကယ်တော့ဟန်ဆောင်ခဲ့ခြင်းဖြစ်ကာ ထိုမျှစွမ်းအားကြီးလိမ့်မည်ဟုသူမထင်ထားခဲ့မိပေ။

ဓားစမ်းသပ်ရေးညီလာခံအပြီးတွင် ကျန်းရွေ့လုပ်ခဲ့သည့်အရာမှာလူထုရှေ့တွင်အလုံးစုံထုတ်ဖော်ခံလိုက်ရပြီး မကြာမီတွင်ဂိုဏ်းထံလက်လွှဲခံခဲ့ရရာ ထိုဖြစ်ရပ်တွင်ရှိမနေသည့်လူတိုင်းကိုထိတ်လန့်သွားစေပြီး လူကျန်းအားအလွန်စိတ်မကောင်းဖြစ်သွားစေခဲ့သည်။

ယခုကြည့်ခြင်းအားဖြင့် ကျန်းရွေ့ကားအမှိုက်ဆန်ကာရက်စက်လှသည်။ သူသည်သူ၏လျို့ဝှက်ချက်များကိုပင်အခြားသူတို့အားသာမန်ကာလျှံကာပြောပြခဲ့၏။ သူသေသွားခဲ့သည်အချိန်ကိုမှတ်မိဖို့ရာခက်ခဲလှသည်။

လုကျန်းကမင်ရှောင်းကိုအေးစက်စက်ကြည့်ကာပြောသည်။

"မင်းကငါ့ကိုဒီဟာလာပြောချင်တယ်ဆိုတော့ မင်းငါ့ကိုဘာလုပ်စေချင်တာလဲ။ အပေးအယူလုပ်မလို့လား။"

မင်ရှောင်းကဆိုသည်။

"ဒါကခြိမ်းခြောက်တယ်လို့ပြောလို့မရပါဘူးဗျာ၊ လျို့ဝှက်ပူပေါင်းကြံစည်ရုံတင်ပါ။ အစကတည်းက လုအကြီးအကဲဟာ ကျန်းရွေ့ကိုနောက်တက်မဲ့လင်ရှောင်းဂိုဏ်းချုပ်ဖြစ်ဖို့မျှော်လင့်နေမှန်း ကျွန်တော်သိပါတယ်၊ ပြီးရင်ခင်ဗျားကဒီအခွင့်အရေးကိုယူပြီးတော့စွမ်းအားရအောင်လုပ်မှာလေ။ ကျွန်တော့်အတွေးကခင်ဗျားနဲ့အတူတူပဲ။"

လုကျန်းကရယ်လိုက်ပေမဲ့ သူ့မျက်ဝန်းထဲတွင်အပြုံးစိုးစဥ်းမျှမရှိပေ။

"မင်းဘယ်ကလာတာလဲ၊ မင်းကလည်းလင်ရှောင်းဂိုဏ်းချုပ်ဖြစ်ချင်တာလား။"

မင်ရှောင်းပြောလိုက်သည်။

"လုအကြီးအကဲကသူများတွေကိုဂိုဏ်းချုပ်ဖြစ်စေချင်နေတာပဲ၊ ထိပ်ဆုံးကိုတက်လှမ်းဖို့သူများတွေကိုနှလုံးသားနဲ့ရင်းပြီးကူညီနေတာ၊ သိပ်ကောင်းပါတယ်။ ဒါပေမဲ့ ခင်ဗျားကိုယ့်ကိုယ်ကိုယုံကြည်ချက်နည်းနည်းပဲရှိတာမလား။"

သူကလုကျန်းကိုစိုက်ကြည့်သည်။

"ကျွန်တော်ပြောပါတယ်၊ ကျွန်တော်ကဂိုဏ်းချုပ်အသစ်တင်မြှောက်ချင်တယ်၊ ပြီးရင်ကျွန်တော့်အတွက်ထောက်တိုင်ဖြစ်စေချင်တာ။"

လုကျန်းကခပ်ဖွဖွပြုံးကာ သူ့စိတ်အခြေအနေမှာအနည်းငယ်ရှုပ်ထွေးလို့နေသည်။

လင်ရှောင်းဂိုဏ်းသည်ကားဓားရေးအရာတွင်ထိပ်တန်းနံပါတ်တစ်ဂိုဏ်းဖြစ်၏။ ၎င်းမှာဂိုဏ်းနှစ်ခြမ်းကွဲသွားပြီးနောက်ပိုင်းတွင် အပြန်အလှန်တိုက်ခိုက်နေခဲ့ကြသဖြင့် ၎င်း၏ခွန်အားမှာအရင်ကကဲ့သို့မထူးချွန်တော့သည့်တိုင် ၎င်းဟာနှစ်ပေါင်းများစွာတိုင်အောင်ထိပ်ဆုံးတွင်ရှိနေသေးရာ အထင်သေး၍မရပေ။ ဒီလိုအခွင့်ရေးမျိုးရှိနေလို့ရှိရင် သူဘယ်လိုလုပ်ပြီးစိတ်မပါနိုင်မှာတဲ့လဲ။

သို့သော်လည်း ပြစ်ဒဏ်စီရင်ရေးနန်းဆောင်ကားစည်းမျဥ်းဥပဒေကိုလိုက်နာလေ့ရှိကာ ဤနေရာမှဂိုဏ်းချုပ်တစ်ဦးထွက်ပေါ်လာသည့်ထုံးစံလုံးဝမရှိခဲ့ပေ။ ကျန်းရွေ့ကဟယ်ဇီကျိုး၏တိုက်ရိုက်တပည့်ဖြစ်ကြောင်း လုကျန်းမြင်လိုက်ရသည်။ မထင်မှတ်ထားစွာဖြင့် သူတစ်ပါးအပေါ်မကောင်းကြံသော်ငြား သူ့ကိုယ်သူအန္တရာယ်ထဲဆွဲသွင်းမိသွားချေသည်။

လုကျန်းရင်ထဲတွင်ထိုသို့တွေးမိပေမဲ့ မင်ရှောင်းနှင့်မျက်နှာချင်းဆိုင်ရင်းဖြင့် သူပြောလိုက်သည်။

"အတိတ်ကလင်ရှောင်းဂိုဏ်းရဲ့စည်းမျဥ်းတွေထဲမှာ ပြစ်ဒဏ်စီရင်ရေးနန်းဆောင်ကလူတစ်ယောက်ကဂိုဏ်းချုပ်ရာထူးယူလို့ရတယ်လို့လုံးဝမပါခဲ့ဘူး။ အနာဂတ်ငယ်ရွယ်တဲ့မျိုးဆက်သစ်တွေက အနာဂတ်မှာလင်ရှောင်းဂိုဏ်းကိုအသစ်ပြန်တည်ထောင်ပြီး အရင်ကဂုဏ်းသတင်းကိုပြန်ယူနိုင်မယ်လို့မျှော်လင့်ထားမိတယ်။ မင်းသာငါ့ကိုသွေးဆောင်ဖို့ဒါကိုသုံးမယ်ဆိုရင် သိပ်ကိုပျင်းစရာကောင်းသွားပြီ။"

မင်ရှောင်းကပြုံးကာဆိုသည်။

"လုအကြီးအကဲ၊ ကျွန်တော်ခင်ဗျားကိုခေါ်သွားမှာပေါ့ဗျ။ ရာထူးကိုဆုပ်ကိုင်ထားပြီး ဒီလိုခေါင်းမာနေသေးတယ်ဆိုတော့ ခင်ဗျားတစ်ယောက်ယောက်ကိုသတ်ဖို့ကြိုးစားနေတာများလား။"

လုကျန်းတန့်သွားသည်။

မင်ရှောင်းပြောမိသည်။

"အို၊ တစ်ခုခုရှိနေမှန်းကျွန်တော်သိသားပဲ၊ ဒါပေမဲ့ ကျွန်တော်ခင်ဗျားကိုအသိပေးလိုက်ပါရစေ၊ ကျန်းရွေ့ကဟယ်ဇီကျိုးကိုသူသိတာပြောမပြော ကျွန်တော်သေချာမသိဘူးနော်။ အဆုံးမှာတော့ သူဖမ်းချုပ်ခံလိုက်ရပြီးနောက်ပိုင်းမှာ ဟယ်ဂိုဏ်းချုပ်ကသူ့ကိုနှစ်ယောက်တည်းခဏခဏစစ်မေးနေကျဆိုတော့လေ။"

လုကျန်းမှာတကယ့်ကိုထိုရည်ရွယ်ချက်ရှိနေသော်လည်း ကျန်းရွေ့၏မကောင်းသောစိတ်ဓာတ်ပေါ်လာလိမ့်မည်ဟုမထင်ထားပေရာ သူ့မျက်နှာမှာရုတ်ခြည်းပြောင်းလဲသွားရသည်။

ကျန်းရွေ့၏အကြံမှာသူ့ထက်ပိုဆိုးသည်။ ထိုသို့သာဆိုရင် ဟယ်ဇီကျိုးတောင်ထွတ်ပေါ်ပြန်လာသည်နှင့် လင်ရှောင်းဂိုဏ်း၏အင်အားကိုပြန်လည်ဖွဲ့စည်းမှာစိုးသည်၊ ထိုအခါကံဆိုးသွားလိမ့်မည်ပင်။

ပြီးရင် ထိုအချိန်တွင် သူမဟုတ်ဘဲအခြားသူများရှိပေလိမ့်မည်။

အတွေးမျိုးစုံမှာသူ့စိတ်ထဲတွင်ရောယှက်သွားပြီး သူမနေနိုင်ဘဲဇဝေဇဝါဖြစ်သွားမိသည်။ နောက်ဆုံးတွင်သက်ပြင်းချကာမင်ရှောင်းကိုမေးမိသည်။

"မင်းဘာလိုချင်တာလဲ။ ငါ့ကိုဂိုဏ်းချုပ်ဖြစ်အောင်ပံ့ပိုးပေးပြီးတော့ လင်ရှောင်းဂိုဏ်းကိုမင်းရဲ့ရုပ်သေးရုပ်ဖြစ်စေချင်တာလား။"

မင်ရှောင်းကပြုံးလျက်ပြောလာသည်။

"မလုံလောက်သေးဘူး။ အခြေအနေနှစ်ခုရှိတယ်၊ ပထမတစ်ခု ကျွန်တော်ဟယ်ဇီကျိုးကိုလိုချင်တယ်၊ ဒုတိယတစ်ခု ကျွန်တော်သိပ်မကြာသေးခင်က လူအင်အားပြတ်လပ်နေတာဆိုတော့ လင်ရှောင်းဂိုဏ်းရဲ့အကူအညီနဲ့တစ်ခုခုလုပ်စရာရှိတယ်၊ ကျွန်တော့်ရဲ့အဓိကကိစ္စတွေပြီးသွားတဲ့အထိစောင့်၊ ရေတွင်းထဲကရေကိုထုတ်လို့မရသေးဘူး။ ခင်ဗျားဂိုဏ်းချုပ်ဘယ်လိုဖြစ်ချင်လဲဆိုတဲ့အပေါ်မူတည်တယ်။"

လုကျန်းမှာတစ်အောင့်ကြာစကားပြောနိုင်ခြင်းမရှိဘဲ သူ့အတွေးများမှာရင်ထဲတွင်ပြည့်လျှံလျက်ရှိပြီး သူ၏အတိတ်လုပ်ရပ်များအကြောင်း ဟယ်ဇီကျိုးသိသွားပြီးနောက်ပိုင်းတွင်ဖြစ်လာမည့်အကျိုးဆက်များနှင့်ပတ်သတ်၍စဥ်းစားနေမိသည်၊ ထို့နောက် ခေတ်အဆက်ဆက်ရှိဂိုဏ်းမှသစ္စာဖောက်တို့၏ကံကြမ္မာအကြောင်းတွေးမိကာ တကယ့်ကိုဆုံးဖြတ်ရခက်နေပေသည်။

မင်ရှောင်းကအပြောကောင်းသော်လည်း သူ၏လုပ်ရပ်များဟာရှင်းလင်းစွာပင် လင်ရှောင်းဂိုဏ်း၏အတွင်းရေးအဓိကရုဏ်းများကိုထိုးဆွရန်ရည်ရွယ်ထားသည်ပင်၊ သို့သော် သူကောင်းကောင်းကြီးသိနေပေမဲ့ တကယ့်ကိုမငြင်းဆန်နိုင်ဖြစ်နေသည်။

မင်ရှောင်းကပြောသည်။

"ကျွန်တော်ခင်ဗျားကိုစဥ်းစားဖို့အချိန်တစ်ညပေးမယ်။ တစ်ညပြီးသွားရင်....ကျွန်တော်ကသည်းညည်းမခံနိုင်တာမဟုတ်ပေမဲ့ လင်ရှောင်းတောင်ထွတ်ကိုပြန်လာတဲ့သူတွေကခင်ဗျားနဲ့နီးသထက်နီးကပ်လာပြီနော်။"

ထိုသို့ပြောပြီးနောက် လုကျန်းကသူ့ကိုကူကယ်ရာမဲ့စွာကြည့်နေရင်းဖြင့် သူ့ပုံရိပ်မှာတဖြည်းဖြည်းချင်းမှေးမှိန်သွားပြီး ထို့နောက်သူ့ရှေ့ရှိလေထဲသို့အရည်ပျော်သွားသည်။

ဤလူ၏ဇစ်မြစ်ကားထူးခြားဆန်းကြယ်ပြီး သူ၏ရည်ရွယ်ချက်များမှာကောက်ကျစ်စဥ်းလဲကာ သူဟာတစ္ဆေသရဲဟုတ်မဟုတ်ပင်မမြင်နိုင်ပေ၊ ဒီတော့သူကဘာလဲ။

သုံးရက်ကြာပြီးနောက်၌ ဓားစမ်းသပ်ရေးညီလာခံတွင်ပါဝင်ယှဥ်ပြိုင်ဖို့သွားခဲ့ကြသည့်တပည့်ဂိုဏ်းသားများမှာ နောက်ဆုံးတွင်လင်ရှောင်းတောင်ခြေကိုရောက်လာလေရာ သူတို့အားလုံးမှာမျက်ရည်ဝဲလုမတတ်ဖြစ်သွားရသည်။

အိမ်ပြန်လမ်းတွင် ပူအိုက်ကာပင်ပန်းနွယ်ခြင်းကားဒုတိယအရေးကြီးဆုံးအရာဖြစ်သည်။ အဆိုးဆုံးအရာကား သူတို့ဟာလမ်းတစ်ဝက်တွင်မရပ်တန့်ဘဲ မကောင်းဆိုးဝါးမိစ္ဆာမျိုးစုံတို့ထံမှအဆက်မပြတ်နှောင့်ယှက်ခြင်းခံခဲ့ရပေသည်။

ဒီအတိုင်းသွားကြည့်ပြီးဆော့ကစားခဲ့သည့် မြေခွေးမျိုးနွယ်စု၏စိတ်ပိုင်းဆိုင်ရာနှင့်ကွာခြားစွာဖြင့် အဓိကဓားရေးဂိုဏ်းတစ်ဂိုဏ်းအနေနှင့်လင်ရှောင်းဂိုဏ်းမှာ ဓားစမ်းသပ်ရေးညီလာခံအားအလွန်အတည်ယူဆထားကြသည်။ ဒီတစ်ခေါက်ခေါ်လာသည့်တပည့်ဂိုဏ်းသားများမှာ ဝင်ပြိုင်ဖို့ရာအရည်အချင်းမပြည့်မှီ၊ အစွမ်းအစလုံးဝမရှိဘဲ အားနည်းနေလျှင်ပင် နောက်တစ်ခါကျရင် ဓားစမ်းသပ်ရေးညီလာခံတွင်တရားဝင်ယှဥ်ပြိုင်ခွင့်ရလောက်သည်ဟုမျှော်မှန်းထားကြသည်။

ကျော်ကြားသောဂိုဏ်းများစွာမှာအတူစုဝေးခဲ့ကြပြီး ဟယ်ဇီကျိုးကိုယ်တိုင်ပါနေသဖြင့် မိစ္ဆာ၏တိုက်ခိုက်မှုဟာသူတို့ကိုပင်ပန်းစေပေမဲ့ အလွန်ကြီးမားသောဆုံးရှုံးမှုများကိုလည်းမယူဆောင်လာခဲ့ပေ။

ကျန်းရွေ့ဟာလမ်းတွင်မဖော်ပြနိုင်လောက်အောင်သေဆုံးသွားသော်လည်း လူသတ်တရားခံကိုတော့ဖြင့်ရှာမတွေ့ခဲ့ပေ။

ကံကောင်းထောက်မစွာဖြင့် ကြိုးစားအားထုတ်မှုများအပြီးတွင် သူတို့နောက်ဆုံးတွင်ပြန်ရောက်လာကြရာ လူတိုင်းစိတ်သက်သာရာရသွားကြသည်။

တပည့်ဂိုဏ်းသားနှစ်ယောက်မှာရှေ့တိုး၍ တောင်ထွတ်ဂိတ်တံခါးဝရှိအကာအရံကိုဖြည်လိုက်သည်။ သူတို့အနက်တစ်ယောက်ကလှည့်ကာပြုံး၍ဆိုလာသည်။

"အိမ်ပြန်လာရတာကောင်းတယ်။ ဘာလို့များလင်ရှောင်းဂိုဏ်းကလေက အခြားနေရာကလေတွေကနည်းနည်းပိုလန်းဆန်းတယ်လို့ငါထင်နေရတာလဲ။ ဂိုဏ်းချုပ်၊ ကျေးဇူးပြုပြီးတော့..."

သူသည်အစကတောင်ထွတ်ပေါ်တက်ရန် ဟယ်ဇီကျိုးကိုဖိတ်ခေါ်ချင်သော်လည်း ဤအခိုက်အတန့်တွင် ဟယ်ဇီကျိုး၏မျက်ဝန်းများမှာကျဥ်းမြောင်းသွားပြီး ရုတ်ခြည်းအော်ပြောလာသည်။

"ဘေးဖယ်!"

ဂိုဏ်းသားမှာတောင့်တင်းသွားပြီး ဟယ်ဇီကျိုးပြောသကဲ့သို့လုပ်ရန်အချိန်မရှိလိုက်ဘဲ

အဖြူရောင်အလင်းဟာတောင်ထွတ်ဂိတ်ဝမှပျံထွက်လာကာ သူ့နှလုံးကိုချက်ချင်းဆိုသလိုထိုးဖောက်သွားသည်။

ဂိုဏ်းသားမျက်နှာပေါ်ရှိအပြုံးအေးခဲသွားကာ သူ့ရင်ဘတ်ထဲတွင်ကြီးမားသောသွေးရောင်ဟောင်းလောင်းပေါက်ကြီးပွင့်နေပြီး လူတစ်ကိုယ်လုံးမှာလှေကားတစ်လျှောက်လိမ့်ကျသွားကာ ချက်ချင်းသေဆုံးသွားတော့သည်။

ဤမြင်ကွင်းကိုမြင်လိုက်ရရာ လူတိုင်း၏စိတ်ထဲတွင်တစ်ခဏမျှဗလာနတ္ထိဖြစ်သွားပြီး တစ်အောင့်ကြာမယုံကြည်နိုင်ဖြစ်မိကြသည်။

သူတို့အတွက်တစ်လမ်းလုံးစိုးရိမ်နေရသည်ကလုံလောက်သော်လည်း ဤသည်ကားလင်ရှောင်းဂိုဏ်း၏တောင်ထွတ်ဂိတ်ဝဖြစ်ကာ စောင့်ကြည့်နေသောမျက်လုံးများ​အောက်၌ သူတို့ဘယ်လိုလုပ်ပြီးထိုကဲ့သို့တိုက်ခိုက်မှုမျိုးနှင့်ကြုံတွေ့ရပါသနည်း။

"မှော်စက်ဝန်းပဲ!"

ဟယ်ဇီကျိုးဒေါသထွက်သွားကာ လူတစ်ကိုယ်လုံးတောင်ထွတ်ဂိတ်တံခါးဝထံမရောက်သွားမီ သူ့နောက်တွင်တောင့်ခဲနေသည့်နောက်ထပ်ဂိုဏ်းသားတစ်ယောက်ကိုဝေ့ရမ်းကာ ကျယ်လောင်စွာပြောလိုက်သည်။

"လူတိုင်းစိတ်ငြိမ်ငြိမ်ထားပြီးတော့ တစ်​ယောက်ကိုတစ်ယောက်ကာကွယ်ပြီး မိစ္ဆာတိုက်ခိုက်တဲ့အရံအတားကိုအသက်သွင်းလိုက်!"

သူတို့သည်လမ်းတစ်လျှောက်လုံးတွင် မကောင်းဆိုးဝါးနှင့်မိစ္ဆာတို့၏အနှောင့်အယှက်ပေးခြင်းခံခဲ့ရပြီး မိစ္ဆာတို့၏တိုက်ခိုက်မှုကိုခုခံရန်သတိချပ်ထားကြသည်။ ဤအခိုက်အတန့်တွင် ဟယ်ဇီကျိုး၏ပထမဆုံးတုံ့ပြန်မှုမှာ မကောင်းဆိုးဝါးမိစ္ဆာတို့ကသူတို့ကိုဘာမှမလုပ်နိုင်ကြောင်း တစ်ဖက်လူမြင်လိုက်ရရာ အဆုံးတွင် သဘာဝကျကျပင် သူတို့ကိုတိုက်ခိုက်ရန်တစ်ယောက်ယောက်ကိုလွှတ်လိုက်ခြင်းဖြစ်သည်ပင်။

မင်းကလင်ရှောင်းတောင်ထွတ်ဂိတ်ဝမှာရန်လာစရဲမှတော့ မင်းပြင်ဆင်လာမှာပေါ့။

ဟယ်ဇီကျိုး၏စကားများကိုကြားလိုက်ရရင်း ခုနကတောင့်တင်းနေသည့်ဂိုဏ်းသားမှာအိပ်မက်ထဲမှနိုးထလာသည့်နှယ် အရံအတားဖွဲ့စည်းရန်ချက်ချင်းပြင်ဆင်လိုက်သည်။

သူတို့သည်အစကတည်းကကောင်းမွန်စွာလေ့ကျင့်ထားသဖြင့် အလွန်ချောမွေ့စွာဆောင်ရွက်သွားကြ၏။ မိစ္ဆာတိုက်ခိုက်သည့်အရံအတားဖြစ်ပေါ်လာတော့မည်ကိုမြင်လိုက်ရရင်း ထိုအခိုက်အတန့်တွင် သူတို့ခြေဖဝါးအောက်ရှိမြေကြီးမှာရုတ်ခြည်းလှုပ်ခတ်သွားကာ မရေတွက်နိုင်သောအက်ကြောင်းများပွင့်လာချေသည်။

မြေကြီးထဲရှိအက်ကြောင်းမှနေ၍ ရွှံ့နှင့်လုပ်ထားသည့်လက်တစ်ဖက်ထွက်လာကာ တပည့်ဂိုဏ်းသားတို့၏ခြေကျင်းဝတ်ကိုလှမ်းဆွဲလျက် သူတို့အရံအတားကိုအသက်မသွင်းအောင်နှောင့်ယှက်နေသည်။

လက်များအပြင် ဦးခေါင်း၊ လည်ပင်းနှင့် ရင်ဘတ်ပိုင်းများမှာ အက်ကွဲကြောင်းများထဲမှတဖြည်းဖြည်းချင်းထွက်လာသည်....

ထိုစဥ် တစ်​ယောက်ကနားလည်သွားကာ ခပ်ကျယ်ကျယ်ပြောလာသည်။

"သူတို့ကိုမြန်​မြန်ဖြတ်ပစ်ကြ၊ ကြီးထွားခွင့်မပေးနဲ့၊ မဟုတ်ရင် ဒုက္ခရောက်ကုန်လိမ့်မယ်!"

နှစ်ဖက်စလုံး၏တိုက်ပွဲအတွင်းတွင် ဟယ်ဇီကျိုးကဓားဆွဲထုတ်ပြီးဖြစ်ကာ ဓားစွမ်းအင်ကတိမ်လွှာတို့ကိုဖြတ်၍ မိုးကောင်းကင်ထက်ထိုးဖောက်သွားကာ လင်ရှောင်းဂိုဏ်းအားသတိပေးသည့်အချက်ပြပုံစံပို့လိုက်သည်။

တစ်ချိန်တည်း၌ သူဟာဓားထဲသို့စိတ်ဝိညာဥ်စွမ်းအားထည့်လိုက်ရာ ဓားကိုယ်ထည်ပေါ်ရှိအလင်းမှာဖျတ်ခနဲလက်သွားပြီး တဖြည်းဖြည်းချင်းနှင့်ရေလှိုင်းများဖြစ်ပေါ်လာပုံရကာ ထို့နောက်ရေနဂါးအများအပြားမှာ ကောင်းကင်ယံထက်တွင်ပျံလွှားနေပြီး ပါးစပ်ဟလိုက်ချိန်တွင် မိုးကြိုးပစ်သံတို့ကျယ်လောင်လာကာ လေမှာမုန်တိုင်းပမာပြင်းထန်စွာတိုက်ခတ်လာလေရာ မြေကြီးပေါ်ရှိရွှံ့များမှာပျစ်ခဲလို့မရနိုင်တော့သည်ရွှံ့အဖြစ်စုန်းစုန်းစိုရွှဲသွားသည်။

လူတိုင်းမှာ၎င်းကိုအခွင့်ကောင်းယူကာ အရံအတားကိုဖယ်၍ တောင်ထွတ်ဂိတ်ဝထံအလျင်စလိုပြေးသွားကြသည်။

သို့သော် ထိုအခိုက်အတန့်တွင် မြေကြီးထဲရှိအက်ကွဲကြောင်းထံမိုးကြိုးတစ်ချက်ပစ်သွားကာ တောင်ထွတ်တစ်ခုလုံးရုတ်ခြည်းတုန်ခါသွားတော့သည်။

ချက်ချင်းပင်၊ ဘန်းခနဲမြည်သံနှင့်အတူ မြေကြီးမှာရုတ်တရက်ကြီးမားသောချောက်နက်အဖြစ်ကွဲသွားကာ ချောက်နက်ထဲမှအနက်ရောင်လေပေါက်ထွက်လာပြီး ဟယ်ဇီကျိုး၏ခန္ဓာကိုယ်ကိုရစ်ပတ်သွားကာ မထင်မှတ်ထားစွာဖြင့် သူ့ကိုအောက်ဆွဲချသွားသည်!

"ဂိုဏ်းချုပ်! ဂိုဏ်းချုပ်!"

ဒါကိုမြင်လိုက်ရချိန်တွင် တပည့်ဂိုဏ်းသားများမှာထိတ်လန့်သွားကြပြီး သူတို့အားလုံးအော်ဟစ်မိကြလျက် သူတို့သည်ကယ်တင်ရန်ပြန်လှည့်လာသော်လည်း ချောက်နက်မှာမျက်စိတစ်မှိတ်အတွင်းတွင်ပြန်ပိတ်သွားပြန်ကာ အရိပ်အ​ယောင်လုံးဝမမြင်ရတော့ပေ။

"ဒီမှာဘာတွေဖြစ်နေတာလဲကွာ!"

တစ်ယောက်မှာနောက်ဆုံးတွင်သည်းမခံနိုင်တော့ဘဲ ပြိုလဲကျသွားသည်။

"ဒါကလင်ရှောင်းဂိုဏ်းရဲ့တောင်ထွတ်ဂိတ်ဝမှာလေ၊ မိစ္ဆာတွေ...မိစ္ဆာတွေသိပ်ကိုလွန်လွန်အားကြီးသွားပြီ!"

"ဒီနေရာမှာအကြာကြီးနေဖို့မသင့်တော်ဘူး၊ ငါတို့ခွန်အားနဲ့ဆိုရင် သွားကယ်ဖို့မဖြစ်နိုင်ဘူး။"

ကောနန်စိတ်ငြိမ်သွားကာ တည်ငြိမ်စွာပြောလိုက်သည်။

"ဒီကိစ္စကအသေးအဖွဲ့ကိစ္စမဟုတ်ဘူး၊ လူတိုင်းတောင်ပေါ်မြန်မြန်တက်ပြီးတော့ ဒီနေရာကအခြေအနေကိုအကြီးအကဲတွေဆီသွားတင်ပြရမယ်။"

လင်ရှောင်းကဖြစ်ရပ်ကိုတင်ပြခဲ့သည်။ ထိုအချိန်တွင် ရှုလင်ကျားဟာချင်းချိုးတွင်ထိုင်စားနေခြင်းပင်။

သူ့ရှေ့တွင်ကောင်းမွန်သောဟင်းပွဲများမှာစားပွဲအပြည့်ရှိနေပြီး အနည်းဆုံးတော့လူဆယ်ယောက်စားဖို့ရာလုံလောက်သည်။

စားပွဲတွင်သူနှင့်မင်ချီသာရှိသည်။ မင်ချီကမစားသေးပေ။ သူမကသူနှင့်မျက်နှာချင်းဆိုင်တွင်ထိုင်လျက် ပါးများဖောင်းကားစွာစားနေသည့်သူ့ကိုကြည့်နေသည်။

ရှုလင်ကျားစားပွဲတွင်ထိုင်ပြီး အစားအသောက်ကိုအန္တရာယ်ကင်းကင်းစားခဲ့ရသည်မှာအတော်ကြာပြီဖြစ်သည်။ သူသေရည်သောက်သည့်အခါကျရင် ရံဖန်ရံခါအဆာပြေမုန့်နှစ်လုတ်မျှစားရတာအဆင်ပြေသော်လည်း သူဟာအစားအသောက်တွင်တကယ့်ကိုစိတ်မဝင်စားပေ။

သို့သော် ဤအစားအစာများမှာ မြေခွေးမျိုးနွယ်စုကိုချင်းချိုးထံပြန်လိုက်ပို့ပေးသည့်အတွက်သူ့ကိုကျေးဇူးတင်ရန် မင်ချီကိုယ်တိုင်ချက်ပြုတ်ထားခြင်းပင်၊ ရှုလင်ကျားမစားလို့ရှိရင်ရိုင်းပျရာရောက်သည်မို့ သူမ၏ကြင်နာမှုကိုလက်ခံလိုက်ရသည်။

သူမထင်ထားမိသည်ကား မင်ချီ၏လက်ရာမှာတကယ့်ကို​ကောင်းမွန်ပြီး သူ၏အကြိုက်နှင့်အလွန်ကိုက်ညီလှသည်။

ကျင်းဖေးထုန်ကသူ့ကိုစောင့်နေဆဲဖြစ်ကြောင်းရှုလင်ကျားသတိရသွားသည်။ စားသောက်ပြီးနောက် ပန်းကန်ကိုစားပွဲပေါ်ချကာ မင်ချီကိုနှုတ်ဆက်စကားပြောရန်ပြင်လိုက်ပေမဲ့ သူမော့ကြည့်လိုက်ရာ တစ်ဖက်လူကသူ့ကိုမိန်းမောလျက်စိုက်ကြည့်နေသည်ကိုမြင်လိုက်ရပေသည်။

ရှုလင်ကျားမသိမသာတောင့်တင်းသွားမိသည်။

မင်ချီ၏မျက်လုံးများကသူ့ကိုကြည့်နေပုံမှာ အတိတ်တုန်းကအလွန်အလှမ်းဝေးခဲ့ရသည့်တစ်စုံတစ်ရာကိုမြင်လိုက်ရသည့်အလား အနည်းငယ်လွမ်းဆွေးကာမိန်းမောလျက်ရှိသည်။

ရှုလင်ကျားပြောမိသည်။

"မင်မျိုးနွယ်စုခေါင်...."

သူ့စကားများထွက်ကျလာသည်နှင့် အဖြူရောင်အလင်းလုံးတစ်လုံးမှာပြတင်းပေါက်မှတစ်ဆင့်အထဲပျံဝင်လာပြီး ရှုလင်ကျားရှေ့တွင်ဆင်းသက်ကာ ပေါက်ကွဲသွားသည်။

ဤသည်ကားလင်ရှောင်းဂိုဏ်း၏ထူးခြားသောဆက်သွယ်ရေးနည်းလမ်းဖြစ်၏။ ရှုလင်ကျားမရှောင်လွှဲဘဲအောက်ငုံ့ကြည့်မိသည်။

ပျံ့ကြဲသွားသောအလင်းစက်များဟာ ရေးသားထားသည့် စကားလုံးလေးလုံးအဖြစ်စုစည်းသွားသည်ကိုမြင်လိုက်ရသည်။

"ဂိုဏ်းထဲမှာအခက်အခဲဖြစ်နေပြီ။"

လင်ရှောင်းဂိုဏ်းသားများမှာစင်စစ်ပင်ကံဆိုးနေပြီး သူတို့သွားသည့်နေရာတိုင်းနီးပါးတွင် အခက်အခဲပြဿနာဖြစ်လေ့ရှိသည်။

တောင်ထွတ်ဂိတ်တံခါးဝရှေ့ရှိဖြစ်ရပ်အပြီးတွင် တပည့်ဂိုဏ်းသားတစ်ဦးသေဆုံးသွားရုံတင်မကဘဲ ဂိုဏ်းချုပ်ပင်ပျောက်သွားလေရာ ဂိုဏ်းကိုပြန်ရောက်သွားချိန်လူတိုင်း၏ပျော်ရွှင်မှုကိုပျောက်ကွယ်သွားစေသည်။

ထိုအုပ်စုမှာတောင်ထွတ်ပေါ်သို့စိတ်ပျက်လက်ပျက်တက်သွားကြပြီး တောင်ထွတ်ပေါ်တွင်နေခဲ့သည့်အကြီးအကဲတို့ကို ထိုဖြစ်ရပ်အကြောင်းတင်ပြဖို့သွားသည်။

ဟယ်ဇီကျိုးဂိုဏ်းထဲတွင်မရှိချိန် တပည့်ဂိုဏ်းသားခေါင်းဆောင်လော်ရှောင်းက ဂိုဏ်း၏ကိစ္စအဝဝကိုတာဝန်ယူပေးသော်လည်း သူ၏မထူးခြားမခြားနားပင်ကိုယ်ဗီဇနှင့်ဆိုးဝါးသောကျန်းမာရေးကြောင့် အခြေခံအားဖြင့် အဓိကအရေးကိစ္စမရှိရင် သူ့မှာလွတ်လပ်သောစိတ်သဘောထားရှိသည်။

တောင်ခြေရှိကြီးမားသောလှုပ်ရှားမှုဟာ တောင်ထွတ်ပေါ်ရှိလူတိုင်းအားသတိရှိသွားစေသည်။ ဤအချိန်တွင် သူတို့ဟာအဓိကတောင်ထွတ်၏ထိပ်ဖျားထံပြေးလာကြသည်။ လော်ရှောင်းကထိုနေရာတွင်တည်ငြိမ်သောမျက်နှာထားဖြင့်ရပ်နေပြီးဖြစ်သည်ကိုမြင်လိုက်ရရင်း သူတို့အားလုံးမေးမိကြသည်။

"သာ့ရှစ်ရှုန်း၊ ဘာဖြစ်တာလဲဗျ။"

"ငါလည်းမသိဘူး။"

လော်ရှောင်းမျက်မှောင်ကြုတ်သွားသည်။

"ငါရှစ်စွင်းရဲ့ဓားချီစွမ်းအားကိုအာရုံခံမိလို့ ဒီကိုလာခဲ့တာ။"

သူကားအမြဲတမ်းထိုကဲ့သို့ပင်။ သူ့ကိုမေးလိုက်ချိန်တွင်သူဟာဘာဆိုဘာမှမသိသဖြင့် ဘာမှထွက်လာမည်မဟုတ်။ မည်သို့ပင်ဖြစ်စေ လော်ရှောင်း၏ ပါးစပ်ထဲမှအသုံးဝင်သောသတင်းကိုကြားရဖို့ရာမျှော်လင့်ထားလို့မရပေ။

ထိုစကားကိုကြားသော် သူတို့မနေနိုင်ဘဲမျက်မှောင်ကြုတ်မိကြသည်။ ထိုစဥ် တောင်ခြေရှိတပည့်ဂိုဏ်းသားများမှာ ဓားကိုင်လျက်သားဖြင့် အပြေးအလွှားရောက်လာပြီးဖြစ်သည်။

"သာ့ရှစ်ရှုန်း၊ ကိစ္စအကြီးကြီးဖြစ်သွားတယ်!"

ကောနန်မှာလော်ရှောင်းကိုမြင်သွားချိန်တွင် နောက်ဆုံးမနေနိုင်တော့ဘဲ သူ့အသံမှာမျက်ရည်ကျလုမတတ်ပင်။

"ဂိုဏ်းချုပ်၊ ဂိုဏ်းချုပ်ကိုခေါ်သွားပြီ!"

"မင်းဘာပြောလိုက်တယ်! သတိထားပြော!"

လော်ရှောင်းစကားမပြောနိုင်မီ သူဟာနောက်ထပ်လေးနက်သောအသံတစ်သံထံမှဖြတ်တောက်ခံလိုက်ရပြီး သူခေါင်းလှည့်ကြည့်လိုက်ရာ ပြစ်ဒဏ်စီရင်ရေးနနန်းဆောင်၏အကြီးအကဲလုကျန်းဖြစ်ကြောင်းမြင်လိုက်ရသည်။

သူ့အပြင် တောင်ထွတ်သခင်များနှင့်အခြားအကြီးအကဲအများအပြားဟာလည်းသတင်းရကာ အပြေးအလွှားရောက်လာကြသည်။

လော်ရှောင်းကကောနန်ကိုပြောသည်။

"ထိုင်ပြီးဖြည်းဖြည်းပြော၊ ရှစ်စွင်းရဲ့ကျင့်စဥ်နဲ့ဆိုရင်ဘယ်သူကသူ့ကိုခေါ်သွားနိုင်မှာတဲ့လဲ။ ခေါ်သွားတယ်ဆိုရင်တောင် ဘယ်သူကခေါ်သွားတာလဲ။"

ကောနန်စိတ်ငြိမ်ငြိမ်ထားကာ အသက်မှန်မှန်ရှူပြီး ဖြစ်ခဲ့သည့်အကြောင်းအရာကိုပြန်ပြောပြလိုက်သည်။

ဤသည်ကိုနားထောင်ပြီးနောက် လူတိုင်းမယုံကြည်နိုင်ဖြစ်မိကြသည်။ လင်ရှောင်းဂိုဏ်းသားများအတွက် သူတို့၏ဂိုဏ်းတံခါးဝတွင် ခြုံခိုတိုက်ခိုက်ခြင်းခံခဲ့ရသည်မှာ အလွန်အမင်းထိတ်လန့်ဖွယ်ကောင်းနေပြီးဖြစ်သည်။ ထို့အပြင် ဂိုဏ်းချုပ်ဟယ်ဇီကျိုးဟာလည်းအဖမ်းဆီးခံခဲ့ရသဖြင့် ၎င်းမှာပို၍ပင်မယုံကြည်နိုင်စရာပင်။

ဤကိစ္စသာပျံ့နှံ့သွားခဲ့လျှင် ချီဇုန်ဘယ်တော့မှခေါင်းပြန်မမော့နိုင်မှာစိုးသည်။

တောင်ထွတ်အကြီးအကဲနှစ်ဦးမှာအပြန်အလှန်ကြည့်ကာ တက်ကြွစွာဆိုလာသည်။

"တောင်ထွတ်ဂိတ်ဝမှာသဲလွန်စတစ်ခုခုရှာလို့ရမရ အရင်ဆုံးသွားကြည့်ကြရအောင်၊ အဲ့ဒါမှ ဂိုဏ်းချုပ်ဘယ်မှာရှိနေလဲဆိုတာကျုပ်တို့သိရမှာလေ။"

လော်ရှောင်းပြောလိုက်သည်။

"အကြီးအကဲတို့နှစ်​ယောက် လူများများပိုခေါ်သွားပြီး အန္တရာယ်ကင်းလုံခြုံအောင်အာရုံစိုက်ကြပါ။"

လုကျန်းကဆိုသည်။

"ကောနန်၊ ဒီကိစ္စကိုမိစ္ဆာမျိုးနွယ်စုလုပ်တာလို့မင်းဆက်တိုက်ပြောနေတယ်နော်၊ မင်းဘာမြင်ခဲ့လို့လဲ။"

ကောနန်ကခါးသက်သက်ပြုံးသည်။

"လုအကြီးအကဲ၊ ကျွန်တော်တို့တွေလမ်းတစ်လျှောက်လုံးဒီကောင်တွေကြောင့်ပင်ပန်းနေခဲ့တာ။ အကြိမ်ပေါင်းမရေတွက်နိုင်အောင်နှောင့်ယှက်ခံရတယ်၊ ပြီးရင်နောက်ကွယ်မှာမိစ္ဆာတွေရဲ့ခြေရာလက်ရာရှိတယ်၊ ခုနကတောင်ခြေကအရံအတားအပါအဝင်ပေါ့။"

သူသည်လမ်းပေါ်တွင်ဖြစ်ခဲ့သည့်အကြောင်းကိုပြန်ပြောကာ ထို့နောက်လမ်းပေါ်တွင်ကျန်းရွေ့သေဆုံးသွားခဲ့ကြောင်းလူတိုင်းသိသွားပြီး ထိုလူများဟာဂိုဏ်းကိုပြန်လာသည့်လမ်းတစ်လျှောက်တွင် အနိမ့်အမြင့်ပေါင်းများစွာကြုံတွေ့ခဲ့ရလေ၏။

လော်ရှောင်းတွေးကြည့်မိသည်။

"ဒါပေမဲ့ မေးစရာရှိတယ်၊ ဒီလူတွေမှာလူတိုင်းကိုဖမ်းဖို့အခွင့်ရေးများစွာရှိပါရက်နဲ့ နောက်ဆုံးခြုံခိုမတိုက်ခိုက်ခင် မင်းတို့တောင်ပေါ်တက်လာတဲ့အထိစောင့်နေခဲ့တယ်။ ဘာလို့များလဲ။ ဒါအမှန်ပဲလား။ တမင်ရန်စွပေးနေတာဆိုရင်ကော? ငါတို့လင်ရှောင်းဂိုဏ်းကအရင်တုန်းကမိစ္ဆာတွေရဲ့အငြိုးရှိခဲ့ဖူးလို့လား။"