!unicode!

ကျင်းဖေးထုန်၏ခြေဖဝါးမှာမရွေ့သွားဘဲ သူ့ခေါင်းကိုမသိမသာစောင်းလိုက်ရာ ဆေးပုလင်းကယာကျိ၏ခြေဖဝါးနားတွင်ပစ်ပေါက်ခံလိုက်ရပြီး အစိတ်စိတ်အမွှာမွှာကွဲကြေသွားခဲ့သည်။

ယာကျိတောင့်တင်းသွားကာ ထိတ်လန့်တကြားအနောက်ဆုတ်မိသည်။

ရှုလင်ကျားရုတ်ခြည်းနားလည်သွားကာလွှတ်ခနဲပြောမိသည်။

"ဒီပုတီးစေ့လက်ကောက်ပေါ်ကအငြိုးကသူမဟာမဟုတ်ဘူးပဲ!"

ဤအချိန်တွင် မည်သူတစ်ဦးတစ်ယောက်ကမျှမြေခွေးတစ်ကောင်စကားပြောလိုက်သည့်အချက်ကိုသတိပြုမိဖို့ရာအချိန်မရှိဘဲ ယန်ယွီကလှောင်ပြုံးပြုံးလာသည်။

"သေချာပေါက်မဟုတ်ဘူးပေါ့! သူမကစောဒကတက်စရာဘာအကြောင်းရှိလို့လဲ။ ငါကသူမကိုကယ်တင်ဖို့မတွေးခင် သူမကတော့ငါ့ကိုအဆိပ်ခတ်သတ်ဖို့ကြိုတင်စီစဥ်ထားခဲ့တယ်။"

"သူမကအပယ်ခံငါ့ညီငတုံးကို ဂုဏ်ကျက်သရေရှိပြီးချမ်းသာကြွယ်ဝတဲ့မင်းသားတစ်ပါးဖြစ်လာစေချင်နေတာ!"

သူရုတ်တရက်အသံမြှင့်လာသည်။

"မင်းတို့ကိုပြောပြလိုက်မယ်! အဲ့ဒီ့အငြိုးကငါ့အငြိုး၊ အဲ့ဒီ့စိတ်အစွဲကလည်းငါ့စိတ်အစွဲပဲ၊ ငါသူမကိုမှန်ထဲမှာချိပ်ပိတ်ထားခဲ့တာ! ငါသူမကိုအရမ်းမုန်းတယ်!"

"ပုတီးစေ့ထဲမှာပုန်းနေတဲ့အိပ်မက်ဆိုးမိစ္ဆာက တစ်ပါးသူတွေရဲ့ကံကောင်းမှုနဲ့ပြန်လည်မွေးဖွားမှုကိုခိုးယူဖို့ငါ့ကိုသင်ပေးခဲ့တယ်၊ ဒါပေမဲ့ သူကငါ့ကိုအသုံးချချင်နေမှန်းငါသိတာမို့ ငါသူ့ကိုအခွင့်ရေးယူခဲ့တယ်။ သူကဇုန်ဝူရှင်းကိုလွှတ်ပေးချင်နေတာ၊ ကိစ္စမရှိပါဘူး၊ ငါလည်းအဲ့လိုပဲတွေးမိတယ်။"

ယန်ယွီကလက်ဖျောက်တီးကာဆိုသည်။

"ငါဇုန်ဝူရှင်းကိုရှာချင်တယ်၊ ငါထာဝရအသက်ရှင်ချင်တယ်၊ ငါလောကကြီးထဲကအဓိကရုဏ်းတွေကိုကြည့်ချင်တယ်၊ လောကကြီးထဲကဘယ်သူကများဖုန်မှုန့်၊ ကိုယ်ကျိုးမငဲ့မှုနဲ့အကြောက်တရားကင်းမဲ့ခြင်းကနေအစစ်အမှန်လွတ်မြောက်နိုင်မလဲဆိုတာမြင်ချင်တယ်! လူကောင်းတွေကကောင်းမွန်တဲ့ဆုလဒ်ကိုမရနိုင်တော့ ငါအဆုံးထိဆိုးသွမ်းသွားချင်တယ်!"

သူကားဘယ်လက်ကိုယာကျိထံဆန့်ကာ သူ့လက်ငါးချောင်းကိုဖြန့်၍ လက်သီးတင်းတင်းဆုပ်လိုက်သည်။

ယာကျိမှာကြောက်လန့်တကြားအော်ဟစ်ပြီး သူမ၏ခန္ဓာကိုယ်မှာတန်ဖိုးမရှိသောစက္ကူလုံးပမာ အလုံးတစ်လုံးအဖြစ်တွန့်ရှုံ့ခံလိုက်ရကာ မှန်မှာတစ်စစီကွဲကြေသွားပြီး သူမဟာလည်းပျံ့ကြဲနေသောအလင်းတစ်မှုန်ဖြစ်သွားကာ လေထဲတွင်ချက်ချင်းဆိုသလိုမျောလွင့်သွားချေသည်။

ယန်ယွီကကျင်းဖေးထုန်ကိုပြုံးပြကာ သူ့မျက်လုံးကဖြည်းညှင်းစွာအောက်သို့ရွေ့သွားပြီး ရှုလင်ကျားပေါ်တွင်တစ်ဖန်ကျရောက်သွားကာပြောလိုက်သည်။

"ငါအောင်မြင်နိုင်မယ်လို့....မင်းတို့နှစ်ယောက်ထင်လား။"

သူ့အသံထွက်လာသည်နှင့် ကမ္ဘာတစ်ခုလုံးမှာတမဟုတ်ချင်းပြိုကွဲသွားသည်။

ကျင်းဖေးထုန်နှင့်ရှုလင်ကျားတို့မျက်စိပြိုင်တူဖွင့်လိုက်ရာ သူတို့ဟာလျို့ဝှက်ဂူထဲတွင်ရှိနေဆဲပင်။

ရှုလင်ကျားကကျင်းဖေးထုန်၏ဝတ်ရုံလက်ထဲမှထွက်ကာ သူ့ခန္ဓာကိုယ်ကိုအသွင်ပြောင်း၍ ခါးကိုင်းကာကျင်းဖေးထုန်ထံလက်ဆန့်ပေးလိုက်သည်။

ထိုသို့လုပ်စရာမလိုသော်လည်း ကျင်းဖေးထုန်ကသူ့လက်ကိုဆုပ်ကိုင်ကာ မတ်တပ်ထရပ်လိုက်သည်။

သူတို့နှစ်ဦးသည်ထိုအပြူအမူကိုအသုံးချကာသူတို့၏အတွေးတို့ကိုဖွဲ့စည်းလိုက်ပြီးနောက် ရှုလင်ကျားကပြောမိ၏။

"ဒါဆို ပုတီးစေ့ထဲကအရာတွေနဲ့ ကျွန်တော့်ရဲ့ကံကောင်းမှုလက်ကျန်တစ်ဝက်ကယန်ယွီယူသွားတာခံလိုက်ရတာပေါ့လေ။ ပြီးတော့ သူ့ရဲ့ရည်ရွယ်ချက်ကဇုန်ဝူရှင်းကိုလွှတ်ပေးချင်နေတာပဲ။"

ကျင်းဖေးထုန်မှာခုနကအဖြစ်အပျက်ကိုတွေးနေဆဲဖြစ်ပြီး ရှုလင်ကျားကထိုကဲ့သို့စကားပြောလာသည်ကိုကြားလိုက်ရသော် သူကူကယ်ရာမဲ့စွာတောင့်တင်းသွားရကာမေးမိလေသည်။

"ကံကောင်းမှုကျန်တစ်ဝက်?"

ရှုလင်ကျားခေါင်းငြိမ့်ပြလိုက်သည်။

"ကျွန်တော်ခင်ဗျားကိုအရင်ကမပြောခဲ့ဘူးလား။ ကျန်းရွေ့ရှုံးသွားပြီး ကျွန်တော့်ရဲ့ကံကောင်းမှုကတစ်ဝက်ပဲပြန်ရောက်လာတယ်လို့လေ။"

ရှုလင်ကျားဒဏ်ရာပြန်ကောင်းလုနီးပါးဖြစ်နေပြီဟုကျင်းဖေးထုန်ထင်မိသည်။ ယင်းကားသူထိုသို့ပြောသည်ကိုပထမဆုံးအကြိမ်ကြားရခြင်းဖြစ်ရာ ရှော့ခ်ရသွားခဲ့သည်။ သူရှုလင်ကျား၏လက်ကောက်ဝတ်ကိုဆွဲယူ၍ သွေးခုန်နှုန်းစမ်းကြည့်လိုက်ရာ သူ့မျက်ခုံးမှာချက်ချင်းတွန့်ခေါက်သွားပေသည်။

ကျင်းဖေးထုန်၏အမှားဝန်ခံသည့်ကောက်ကျစ်သောစိတ်သဘောထားနှင့်ယှဥ်လျှင် ကျင်းဖေးထုန်ကဒေါသတကြီးပြောလာသည်။

"ဒဏ်ရာပြန်မကောင်းသေးတာကို ကိုယ့်ကိုဘာလို့စောစောစီးစီးမပြောခဲ့တာလဲ!"

ရှုလင်ကျားပြောမိသည်။

"ကျွန်တော်မေ့သွားလို့ပါ၊ ခင်ဗျားကိုမပြောပြချင်တာမဟုတ်ပါဘူး။"

ကျင်းဖေးထုန်ကပြောလာသည်။

"မင်းကဒီလိုအရာမျိုးကိုမေ့သွားတယ်လား၊ ဒါကမင်းရဲ့ကံကောင်းမှုနော်! မင်းဘယ်လိုလုပ်ပြီးတစ်ပါးသူရဲ့လက်ထဲကိုထည့်ပေးလိုက်နိုင်ရတာလဲ။ မြန်မြန်သွားပြန်ရှာကြမယ်။"

ရှုလင်ကျားပြောမိသည်။ "ဟင်?"

သူတို့သည်ရှင်းလင်းစွာဖြင့်"တစ်ယောက်ယောက်ကဇုန်ဝူရှင်းကိုလွှတ်ပေးချင်သည်"ဆိုသည့်ဇုန်ဝူရှင်းကိစ္စကိုပြောနေခြင်းဖြစ်ပြီး မည်မျှပင်တွေးတောပါစေ ဤသည်ကားကျင့်ကြံရေးလောကတစ်ခုလုံးကိုထိတ်လန့်စေနိုင်သောကြောက်မက်ဖွယ်အကြောင်းအရာဖြစ်ပါသော်လည်း ၎င်းမှာအကြောင်းပြချက်မရှိပါဘဲ ဘေးသို့ပစ်ထုတ်ခံလိုက်ရပေ၏။

ကျင်းဖေးထုန်အတွက်ကတော့ဖြင့် ရှုလင်ကျားထက်ဘယ်အရာကမျှအရေးမကြီးပေရာ သွေးခုန်နှုန်းစမ်းလို့ပြီးသွားသည်နှင့် သူဟာရှုလင်ကျား၏လက်ကောက်ဝတ်ကိုဆုပ်ကိုင်ကာ အပြင်ဆွဲခေါ်သွားသည်။

သူကနက်ရှိုင်းသောအသံဖြင့်ဆိုသည်။

"မင်းကပုံမှန်ဆိုစိတ်ပူတတ်တဲ့လူစားမျိုးမဟုတ်ဘူးလား။ မင်းဘာမှမကြားရလို့ရှိရင် ခုန်ထွက်ဖို့တောင်မစောင့်နိုင်တော့ဘူး။ မင်းအတွက်ကျတော့ မင်းဘာလို့ဒီလောက်ဂရုမဲ့ရတာလဲ။ နောက်တစ်ခါကျရင်ဒီလိုကိစ္စမျိုးကိုအချိန်မီပြောပြရမယ်နော်၊ ကြားလား။"

၎င်းမှာသူ့ထံမှရှုလင်ကျားထိုကဲ့သို့ထိန်းကျောင်းခံရသည့်ပထမဆုံးအကြိမ်ဖြစ်ပြီး သူအလွန်မယုံမကြည်ဖြစ်မိကာ မျက်မှောင်ကြုတ်၍တစ်ခုခုပြောချင်သော်လည်း ကျင်းဖေးထုန်၏ကြုံတောင့်ကြုံခဲမျက်နှာထားကိုမြင်လိုက်ရချိန်တွင် သူအော်ရယ်မိပြန်သည်။

ကျင်းဖေးထုန်သူ့ကိုလှည့်ကြည့်လိုက်ပေမဲ့ အဆုံးတွင်သူလည်းကူကယ်ရာမဲ့သွားကာခေါင်းခါလျက်ရယ်မောမိလေသည်။

သူပြောမိသည်။

"ကိုယ်မင်းနဲ့ပတ်သတ်ရင် တကယ်ဘာမှမလုပ်နိုင်ဘူးပဲ။"

ရှုလင်ကျားကအပြုံးတစ်ပွင့်ဖြင့်ပြောလာသည်။

"ကျွန်တော်အတိတ်ကိုမမှတ်မိသေးပေမဲ့ ခင်ဗျားမှာရှစ်ရှုန်းပုံစံရှိနေတာပဲ။ ကျွန်တော့်အိပ်မက်ထဲကလူကခင်ဗျားဆိုတာကျွန်တော်အခုလုံးဝယုံသွားပြီ၊ ဒီလောက်နှစ်တွေအများကြီးကြာတာတောင် လူတွေကိုထိန်းကျောင်းတဲ့လေသံကမပြောင်းလဲသေးဘူးကိုး။"

ကျင်းဖေးထုန်ပြုံးမိသည်၊ ဤအခြေအနေတွင် ငယ်ရွယ်ပျိုမြစ်သောအတိတ်ကိုရုတ်တရက်ပြောလာသော်လည်း ၎င်းမှာလူတို့၏စိတ်ကိုညှိုးငယ်စေမည်မှာဧကန်ဖြစ်သည်။

သူချောင်းဟမ့်ကာအသံနိမ့်ဖြင့်ပြောမိသည်။

"ကိုယ်ဒီလိုကိစ္စမျိုးကိုထပ်မကြားရစေနဲ့။ နောက်တစ်ခါကျကိုယ့်အဆိုးမဆိုနဲ့။"

ရှုလင်ကျား၏မျက်နှာအမူအရာပျော့ပြောင်းသွားရသည်။

"အင်းပါ၊ ဒါကကိစ္စကြီးမဟုတ်ပါဘူး၊ တစ်ခုချင်းစီလုပ်ရမယ်မလား။ ကျွန်တော်ခင်ဗျားကိုနောက်တစ်ခါကျအရင်ဆုံးပြောပြမယ်လေ။"

သူပြောလို့ပြီးသွားသော် သူထပ်ပြောမိပြန်သည်။

"ဒါပေမဲ့ခင်ဗျားပြောတာသိပ်မှန်တယ်၊ ကျွန်တော်တို့မြန်မြန်ထွက်သွားမှရမယ်။ ယန်ယွီသာတကယ်ဘဲဇုန်ဝူရှင်းကိုလွှတ်ဖို့နည်းလမ်းရှာချင်လို့ရှိရင် သူစပြီးသားဖြစ်နေမှာစိုးတယ်။ အနည်းဆုံးတော့ခင်ဗျားသတင်းဖြန့်လိုက်လို့ရှိရင် လူတိုင်းပြင်ဆင်ထားလို့ရတာပေါ့။"

ကျင်းဖေးထုန်ကခေါင်းငြိမ့်ကာ လျို့ဝှက်ဂူထဲမှနှစ်ဦးသားထွက်လာစဥ် သူပြောမိသည်။

"ဇုန်ဝူရှင်းကိုအတိတ်ကအကြီးအကဲတွေအားလုံးကချိပ်ပိတ်ထားခဲ့တာ။ ကိုယ်သာယန်ယွီဖြစ်ပြီး ချိပ်စည်းကိုချိုးဖျက်ချင်တယ်ဆိုရင် သေချာပေါက်ကိုဒီလူတွေထဲကတစ်ယောက်နဲ့စတင်မိမှာပဲ။ လက်ရှိမှာအဖြစ်နိုင်ဆုံးတစ်ယောက်က မင်ချီ ဒါမှမဟုတ်....ဟယ်ဇီကျိုးပဲ။"

ရှုလင်ကျားပြောလိုက်သည်။

"အဲ့လိုပြောလို့ရတယ်၊ ဒါပေမဲ့ အစထဲကဇုန်ဝူရှင်းကိုချိပ်ပိတ်နိုင်စွမ်းရှိတဲ့လူတွေကယှဥ်ပြိုင်ရမလွယ်ဘူး။ ပြီးတော့ သူတို့ရဲ့ထင်ရှားတဲ့ရာထူးအဆင့်အတန်းနဲ့ဆိုရင် သူတို့အနားကပ်ပြီးသူတို့ကိုတိုက်ခိုက်ဖို့ဆိုတာပိုလို့တောင်မဖြစ်နိုင်ဘူး။ ကျွန်တော့်အထင် ကျွန်တော်တို့သတင်းယူသွားသရွေ့ ဂိုဏ်းတိုင်းကသူတို့ရဲ့ခံစစ်ကိုပိုသန်မာအောင်လုပ်ကြလိမ့်မယ်။"

ဤသည်ကားမှန်ကန်သယောင်၊ လူတိုင်း၏ကြိုးစားအားထုတ်မှုဖြင့်ပြုလုပ်ထားသောချိပ်စည်းမှာချိုးဖောက်ရအလွန်လွယ်ကူနေရင် ကျင့်ကြံရေးလောက်တစ်ခွင်လုံးဤမျှနှစ်ပေါင်းများစွာငြိမ်းချမ်းနေလိမ့်မည်မဟုတ်။

သူတို့သည်လေပြင်းနှင့်လှိုင်းတို့ကိုမြင်ဖူးကြသည့်လူများဖြစ်ပေရာ ကြမ်းတမ်းသောစကားလုံးတစ်လုံး၊ နှစ်လုံးကြောင့်မည်သူမျှကြောက်ရွံ့သွားလိမ့်မဟုတ်သဖြင့် သူတို့နှစ်ဦးဟာဒီကိစ္စကိုကြီးစွာအရေးပေးနေသော်လည်း သူတို့ကအလွန်စိတ်ပူနေသည်ဟုပြောဖို့ရာမလုံလောက်ပေ။

ဆန့်ကျင်ဘက်အားဖြင့် ကျင်းဖေးထုန်ကရှုလင်ကျား၏ကံကောင်းမှုအကြောင်းအဆက်မပြတ်စဥ်းစားနေရင်း သူ့ကိုသုံးကြိမ်၊ နှစ်ကြိမ်မျှပတ်ခေါ်သွားပြီးနောက် လျို့ဝှက်ဂူထဲမှထွက်လာခဲ့သည်။

သူတို့နှစ်ဦးထွက်ပေါက်ကိုရောက်သွားသည့်အခိုက်အတန့်တွင် ကျင်းဖေးထုန်ကအနောက်လှည့်ကာရှုလင်ကျားကိုမျက်စိတစ်ဖက်မှိတ်ပြီး သူ့ပုံရိပ်မှာပျောက်ကွယ်သွားသည်။

သူဟာအထဲကိုခိုးဝင်လာခဲ့သည်မို့ သဘာဝကျကျပင်လူမြင်ခံလို့မရမှန်းရှုလင်ကျားသိသဖြင့် သူ့မျက်နှာထက်တွင်ထူးဆန်းသောအရိပ်အယောင်စိုးစဥ်းမျှမပြဘဲအပြင်လျှောက်ထွက်လာခဲ့သည်။

သူ့ကိုဒီခေါ်လာပေးခဲ့သည့်နန်ဇီဂိုဏ်းသားမှာတောင်ခြေတွင်စောင့်နေပြီးဖြစ်သည်။ ရှုလင်ကျားကိုမြင်သော် သူကလက်နှစ်ဖက်စုကာပြောလာသည်။

"ရှုသခင်လေးရဲ့အရည်အချင်းတိုးတက်လာတာကိုဂုဏ်ပြုပါတယ်။"

ရှုလင်ကျားအရိုအသေပြန်ပေးကာပြောလိုက်သည်။

"ကျေးဇူးတင်ပါတယ်။ ပြီးတော့ ကျွန်တော်လျို့ဝှက်ဂူထဲကနေကိစ္စတချို့သိခဲ့ရတာမို့ အကြီးအကဲနှစ်ယောက်နဲ့တွေ့ပြီးမျက်နှာချင်းဆိုင်ဆွေးနွေးချင်တာမို့ ဒီကရှစ်ရှုန်းကကျွန်တော့်ကိုယ်စားတင်ပြပေးလို့ရမလားဆိုတာကျွန်တော်သိချင်မိပါတယ်။"

သူ့အပြောကိုကြားသော် တစ်ဖက်လူကရှက်သွားပုံရကာပြောလာသည်။

"အားနာပါတယ်ဗျာ၊ အခုတော့သိပ်အဆင်မပြေလောက်သေးဘူး။ ခုနကမတော်တဆတစ်ခုဖြစ်သွားခဲ့တော့ အကြီးအကဲနှစ်ယောက်ကအဲ့ဒါကိုဖြေရှင်းရင်းအလုပ်များနေတာမို့ တွေ့ဖို့ခက်လောက်တယ်။"

ရှုလင်ကျားရင်ထဲတွင်တစ်ခုခုရှိနေပေမဲ့ သူဒါကိုပြောလာသည်ကိုကြားလိုက်ရရာ သူ့ရင်ထဲတွင်မကောင်းသောခံစားချက်တစ်ခုခံစားလိုက်ရကာမေးမိသွားသည်။

"ဘာဖြစ်သွားလို့လဲ။"

ဂိုဏ်းသားကဆိုသည်။

"လွန်ခဲ့တဲ့ရက်အနည်းငယ်အတွင်းမှာ ဓားစမ်းသပ်ရေးညီလာခံမှာဝင်ပြိုင်ဖို့လာခဲ့ကြတဲ့ဂိုဏ်းအသီးသီးကတောင်ထွတ်ကနေတစ်ဂိုဏ်းပြီးတစ်ဂိုဏ်းထွက်သွားခဲ့ကြတယ်။ ဂိုဏ်းအများစုကလမ်းပေါ်မှာခြံခိုတိုက်ခိုက်တဲ့ရန်သူအုပ်စုငယ်လေးတစ်စုနဲ့ကြုံခဲ့ရတယ်လို့ ကျွန်တော်ကြားခဲ့ရတယ်။ လက်ရှိမှာတော့ အ​ခြေအနေကိုသေချာမသိရသေးဘူး။"

ရှုလင်ကျားတောင့်တင်းသွားကာလွှတ်ခနဲထုတ်မေးမိသည်။

"ချီဇုန်ကောဘယ်လိုလဲ။"

ဂိုဏ်းသားကပြောလာသည်။

"ရှုသခင်လေး မစိုးရိမ်ပါနဲ့၊ ချီဇုန်ကတိုက်ခိုက်ခံခဲ့ရပေမဲ့ အဲ့ဒီ့ကသတင်းကတော့ဒီရောက်လာပြီးပါပြီ၊ တစ်ယောက်​ယောက်ဒဏ်ရာရသွားပေမဲ့ မစိုးရိမ်ရပါဘူးလို့ပြောတယ်။ မဖမ်းမိလိုက်တဲ့တိုက်ခိုက်သူအတွက်ကတော့ ဟယ်ဂိုဏ်းချုပ်ကသူနဲ့တိုက်ခိုက်ခဲ့တယ်၊ သူက.....မိစ္ဆာမျိုးနွယ်ကလူနဲ့တူတယ်လို့ပြောတာပဲ။"

ရှုလင်ကျား၏အတွေးမှာထက်ရှစွာပြောင်းလဲသွားကာတီးတိုးဆိုမိသည်။

"မိစ္ဆာမျိုးနွယ်စု?"

ယန်ယွီကားမိစ္ဆာမျိုးနွယ်စုတွင်မွေးဖွားလာခဲ့သည်မှာမှန်သော်လည်း သူဟာသေပြီးသွားခဲ့ပြီပင်။ လက်ရှိတွင် ဒီလောကကြီးထဲတွင် သူဟာလူသားတစ်ဦးအဖြစ်ရုပ်ဖျက်ကာနေထိုင်လျက်ရှိသဖြင့် သူဟာ မိစ္ဆာမျိုးနွယ်စုအားကျင့်ကြံရေးလောကတစ်ခုလုံးကိုပွင့်လင်းစွာဆန့်ကျင်တိုက်ခိုက်ရန်စည်းရုံးသိမ်းသွင်းနိုင်လိမ့်မည်မဟုတ်။

ယခုတွင်ထိုတိုက်ခိုက်သူများဟာအလွန်ပြောင်ပြောင်တင်းတင်းပြုမူနေပုံမှာ မိစ္ဆာတို့ကဤဂိုဏ်းများအားဆန့်ကျင်တော့မည်ကိုအခြားသူတို့မသိမှာစိုးရွံ့နေသည့်အလား။ ရှုလင်ကျား၏ပထမဆုံးတုံ့ပြန်မှုကား သူတို့ဟာမိစ္ဆာတို့ကိုအပြစ်ပုံချနေသည်ဟုပင်။

သို့မဟုတ် မိစ္ဆာတို့ကရန်စလာခြင်းပင်၊ ၎င်းမှာမဖြစ်နိုင်။

သို့သော် မိစ္ဆာဧကရာဇ်မှာမေ့မြောရာမှမနိုးလာသေးလို့ရှိရင် မိစ္ဆာမျိုးနွယ်စုကသေချာပေါက်ရန်စလာလိမ့်မည်မဟုတ်။ သူတို့အပေါ်ရေညစ်လောင်းချပြီး မိစ္ဆာမျိုးနွယ်စုကိုတိုက်ခိုက်ဖို့ရာကျိုးကြောင်းမဆီလျော်ပေ။ စစ်မြေပြင်ကိုကျယ်ပြန့်စေခြင်းအပြင် ကောင်းသောအရာရှိလိမ့်မည်မဟုတ်။

လက်ထဲရှိအချက်အလက်ပမာဏမှာသိပ်ကိုသေးငယ်လွန်းလှသဖြင့် ရှုလင်ကျားတစ်အောင့်မျှနားမလည်နိုင်ပေမဲ့ တစ်ခုတည်းသောသေချာသည့်အရာမှာ ကိစ္စတစ်ခုလုံးကလုံးဝကိုအဓိကရုဏ်းတစ်ခုဖြစ်လာဖို့ရာစတင်နေခဲ့ပြီပင်။

ဂိုဏ်းသားကိုကျေးဇူးတင်စကားပြောပြီးနောက် အကြီးအကဲနှစ်ဦးကိုသူ့အစားနှုတ်ဆက်စကားပြောခိုင်းကာ တောင်အောက်ဆင်း၍ နန်ဇီတောင်ထွတ်တွင်သူယာယီနေနေသည့်နေရာကိုပြန်သွားရာ ကျင်းဖေးထုန်ကစောင့်နေပြီးဖြစ်သည်။

ရှုလင်ကျားပြောမိသည်။

"ရှစ်ရှုန်း၊ ဂိုဏ်းတွေကိုတိုက်ခိုက်ခဲ့တဲ့အကြောင်းကြားပြီးပြီလား။ သူတို့ထဲမှာလင်ရှောင်းလည်းပါတယ်။"

ကျင်းဖေးထုန်၏မျက်နှာထားမှာအနည်းငယ်တည်တံ့နေပေမဲ့ တအားမအံ့သြသွားဘဲခေါင်းငြိမ့်ကာပြောလာသည်။

"စိတ်မပူနဲ့၊ ကိုယ်ကြားပြီးပြီ။"

သူလက်ခုပ်တီးကာပြောလိုက်သည်။

"တစ်ယောက်ယောက်လာအုံး။"

ချက်ချင်းပင်၊ တစ်စုံတစ်ယောက်ကဘယ်နေရာကမှန်းမသိပေါ်လာကာ သူတို့ရှေ့ရောက်လာပြီး ဂါရဝပြုလာသည်။

"အရှင့်ကိုနှုတ်ခွန်းဆက်ပါတယ်။"

ထို့နောက် သူဟာရှုလင်ကျားကိုတူညီသောပုံစံဖြင့်ဂါရဝပြုကာပြောလာပေသည်။

"ရှုသခင်လေးကိုနှုတ်ခွန်းဆက်ပါတယ်။"

ယင်းကားရှုလင်ကျားအားတောင့်ခဲသွားစေကာပြောမိသည်။

"အရမ်းယဥ်​ကျေးနေတာပဲ၊ အဲ့လောက်မလိုပါဘူး။"

ကျင်းဖေးထုန်ကဆိုသည်။

"မင်းသိတာကိုပြော။"

ထိုယောက်ျားကဆိုသည်။

"ဟုတ်ကဲ့အရှင်။ နေရာအနှံ့ကသူလျိုတွေရဲ့တင်ပြချက်အရဆိုရင် သူတို့ကဂိုဏ်းတွေအများအပြားတိုက်ခိုက်ခံခဲ့ရတာကိုမျက်စိနဲ့တပ်အပ်မြင်ခဲ့ကြပါတယ်တဲ့။ သူတို့ကိုအရင်ဆုံးလမ်းပေါ်မှာမကောင်းဆိုးဝါးတွေကနှောင့်ယှက်ခဲ့ပြီးတော့ ပုန်းနေတဲ့မိစ္ဆာမျိုးနွယ်စုလူအုပ်ငယ်လေးကအခွင့်ကောင်းယူပြီး တိုက်ခိုက်လာခဲ့တာ။ ပြီးတော့ သူတို့ပုံစံကိုကြည့်ရတာ လူတွေကိုထိခိုက်အောင်လုပ်ဖို့မရည်ရွယ်ထားဘဲ သူတို့ရဲ့အဓိကရည်ရွယ်ချက်က လူတွေကိုဓားပြတိုက်ဖို့ဖြစ်ပုံရတယ်။"

ရှုလင်ကျားမှာပဟေဠိဖြစ်နေဆဲဖြစ်ကာမေးမိသည်။

"မိစ္ဆာမျိုးနွယ်ဆိုတာသေချာလား။"

ထိုယောက်ျားကဆိုသည်။

"ရှုသခင်လေး၊ မိစ္ဆာမျိုးနွယ်ရဲ့တိုက်ကွက်အများစုကသူတို့ရဲ့သွေးမပါဘဲလေ့ကျင့်လို့မရပါဘူး၊ ပြီးတော့ဒီအပြင်လူကလည်းသူတို့ကိုမတုပနိုင်ပါဘူး။"

ကျင်းဖေးထုန်ကပြောလာသည်။

"တိုက်ခိုက်ခံခဲ့ရတဲ့ဂိုဏ်းတွေရဲ့အခြေအနေဘယ်လိုလဲ။"

သူ၏ငယ်သားကပြန်ဖြေသည်။

"လက်ရှိမှာတော့ လင်ရှောင်းဂိုဏ်း၊ ကျင်းဟိုင်ဂိုဏ်း၊ ကွေ့ရီဂိုဏ်းအစရှိတဲ့သန်မာတဲ့ဂိုဏ်းတွေထဲမှာ တပည့်ဂိုဏ်းသားအနည်းငယ်ပဲမဆိုစလောက်ဒဏ်ရာလေးတွေရသွားခဲ့ပါတယ်၊ ဆုံးရှုံးမှုသိပ်မရှိပါဘူး။ ပြီး​တော့ ဒီဂိုဏ်းတွေကလည်းဒီဖြစ်ရပ်အပြီးမှာ သတိပိုချပ်ထားကြတာမို့ အနာဂတ်မှာဒီလိုတိုက်ခိုက်ခံရမှာမဟုတ်တော့ပါဘူး။ ဒါပေမဲ့လည်း ဂိုဏ်းငယ်လေးအနည်းစုကအဖမ်းခံရပြီးတော့ခေါ်သွားခံလိုက်ရတယ်။ သူတို့ကိုဘယ်မှာအသုံးချမလဲဆိုတာကိုတော့မသိပါဘူး။"

ချီဇုန်အဆင်ပြေကြောင်း သူကလည်းပြောလာသည်ကိုကြားလိုက်ရရာ ရှုလင်ကျားအနည်းငယ်စိတ်သက်သာရာရသွားခဲ့သည်။

ကျင်းဖေးထုန်ကဆိုသည်။

"မင်းဆင်းသွားတော့၊ လူတွေကဂိုဏ်းအများစုရဲ့အခြေအနေကိုစောင့်ကြည့်နေတာမို့လို့ လိုအပ်ရင်မင်းဝင်ကူညီလို့ရတယ်၊ ဒါပေမဲ့မင်းရဲ့သရုပ်မှန်ကိုအချိန်တစ်ခုစာလောက်မထုတ်ပြမိဖို့မမေ့နဲ့၊ တံဆိပ်ပြားသာချန်ရစ်ခဲ့ချည်။"

ကျင်းဖေးထုန်ကသာမန်ကာလျှံကာအမိန့်ပေးသွားသည့် ဤစကားလုံးအနည်းငယ်မှာသူ၏အဆင့်ကိုပြသနေပေသည်။

လက်ရှိအခြေအနေမှာရှုပ်ထွေးလျက်ရှိပြီး ရှင်းလင်းစွာပင်ပီလော့နန်းတော်နှင့်ပတ်သတ်သည့်အရာစိုးစဥ်းမျှမရှိသည်မို့ ဒီကိစ္စထဲတွင်ဝင်ပါသည်ကဉာဏ်ရှိသည့်လုပ်ရပ်မဟုတ်ပေမဲ့ လူကယ်ခြင်းကားပင်ကိုယ်အားဖြင့်နှေးဖင့်လို့မရပေရာ သက်သေချန်ထားခဲ့ပြီး အနာဂတ်တွင်ကျောင်းတော်(သို့)ဂိုဏ်းတစ်ခုခုနှင့်ပဋပက္ခဖြစ်လာခဲ့သည်ရှိသော် ၎င်းကိုထုတ်ပြ၍"အသက်ကယ်သောကျေးဇူးတရား"ဟုပြောလိုက်သည်က တစ်ဖက်လူ၏ပါးစပ်ပေါက်ကိုပိတ်ဖို့ရာလုံလောင်ပေ၏။

ထိုယောက်ျားဆင်းသွားပြီးနောက် ကျင်းဖေးထုန်ကရှုလင်ကျားကိုမေးလာသည်။

"မင်းဘယ်လိုစီစဥ်ထားလဲ။"

ရှုလင်ကျားပြောလို​က်သည်။

"ကျွန်တော့်အထင် ဒီမိစ္ဆာတွေရဲ့လုပ်ရပ်ကဆူပူသောင်းကျန်းပြီးတော့ လူတွေရဲ့အာရုံကိုအနှောင့်အယှက်ပေးနေတာနဲ့ပိုတူတယ်၊ သူတို့ရဲ့ရည်ရွယ်ချက်ကိုတော့မသိဘူး။ ဒါပေမဲ့ အခုလက်ရှိမှာယန်ယွီရဲ့အဆင့်အတန်းကဘာကြီးပဲဖြစ်နေပါစေ သူသေချာပေါက်သွားမဲ့နေရာတစ်ခုရှိတယ်။"

ကျင်းဖေးထုန်ချက်ချင်းနားလည်သွားသည်။

"ဇုန်ဝူရှင်းကိုချိပ်ပိတ်ထားတဲ့နေရာ။"

အဆုံးတွင် ဒီကိစ္စကမည်မျှကျယ်ပြန့်ပါစေ ယန်ယွီ၏နောက်ဆုံးပန်းတိုင်မှာ

ဇုန်ဝူရှင်းပေါ်ကချိပ်စည်းကိုဖယ်ရှားရန်ပင်။ ထိုနေရာရှိလက်ရှိအခြေအနေကိုသွားကြည့်လိုက်သည်နှင့် ကိစ္စများစွာအတွက်ကိုယ်ပိုင်အ​​ဖြေရှိလာနိုင်သည်။

ထူးခြားဆန်းကြယ်​သောကမ္ဘာထဲတွင် ယန်ယွီပြောခဲ့သည့်စကားဟာအလိမ်အညာတစ်ခုဖြစ်နေသည်ကိုသူတို့မစိုးရိမ်မိပေ၊ အဘယ်ကြောင့်ဆိုသော် ထိုပုံရိပ်ယောင်ကမ္ဘာထဲတွင်သူတို့မြင်ခဲ့ရသည်မှာလူအစစ်မဟုတ်ပေမဲ့ ၎င်းဟာယန်ယွီမသေခင်သူ၏နာကျည်းချက်အငြိုးများဖြစ်သောကြောင့်ပင်။

နာကျည်းချက်အငြိုးကားနှလုံးသားထဲရှိအနက်ရှိုင်းဆုံးစိတ်အစွဲမှဖြစ်ပေါ်လာပြီး မည်သူ့ကိုမျှလိမ်ညာလို့မရနိုင်ပေ။

ရှုလင်ကျားပြောမိသည်။

"ဟုတ်တယ်။ အဲ့ဒီ့နေရာကချင်းချိုးနားမှာမလား။ တစ်ချက်သွားကြည့်ကြမလား။"

ကျင်းဖေးထုန်ကပြောလာသည်။

"ဟုတ်ပြီ၊ ကိုယ့်လူတွေကိုဂိုဏ်းတိုင်းကိုစောင့်ကြည့်ခိုင်းထားတယ်၊ တစ်ခုခုဖြစ်သွားလို့ရှိရင် သူတို့အချိန်မီပြန်တင်ပြလာလိမ့်မယ်။ ဒါဖြင့်သွားကြရအောင်။"

သူတို့နှစ်ဦးသည်သေချာဆွေးနွေးပြီးနောက် နန်ဇီတောင်ထွတ်မှထွက်ခွာကာချင်းချိုးထံသွားခဲ့ကြ၏။

နန်ဇီတောင်ထွတ်၏အစွန်အဖျားတွင်ကျယ်ပြောသောသဲကန္တာရရှိသည်။ ဤအချိန်တွင် ၎င်းမှာနွေရာသီဖြစ်သည်မို့ သဲကန္တာရမှာပူပြင်းကာ​ခြောက်သွေ့လှသည်။ ဓားပျံသာကောင်းကင်ယံထက်တွင်ပျံလွှားနေလျှင်ပင် ပူလောင်နေသည့်ခံစားချက်ကိုခံစားလို့ရနိုင်သည်။

နေဝင်စပြုနေပြီး ညမှာနီးကပ်လာသော်လည်း နွေရာသီအပူမှာနေဝင်မှုကြောင့်ပျောက်ကွယ်သွားမည်ဟုမဆိုလို။

"ဂိုဏ်းချုပ်၊ ဒီလိုအချိန်အကြာကြီးပျံသန်းနေတာကရုပ်ပိုင်းဆိုင်ရာခွန်အားကိုကုန်ခမ်းစေတယ်။ လူတိုင်းပင်ပန်းနေတာကိုကျွန်တော်မြင်နေရတယ်။ ကျွန်တော်တို့ရှေ့မှာရေအရင်းအမြစ်ရှိနေတဲ့ပုံပဲ။ ကျွန်တော်တို့ဒီတစ်ညလောက်နားကြရအောင်လား။"

ယင်းကား တောင်ထွတ်သခင်ဟုံအန်း၏အကြီးဆုံးတပည့်ဂိုဏ်းသားကောနန်ဖြစ်ကာ ဤဓားစမ်းသပ်ရေးညီလာခံတွင်ပါဝင်ယှဥ်ပြိုင်သည့်တပည့်ဂိုဏ်းသားလည်းဖြစ်ချေသည်။ ယင်းချန်ကထိုနေရာတွင်တစ်ခဏမျှမရှိသဖြင့် သူဟာငယ်ရွယ်သောမျိုးဆက်တို့၏ကိစ္စအများစုကိုတာဝန်ယူနေရသည်။

ခရီးစဥ်ကားမအေးချမ်းပေ။ ဟယ်ဇီကျိုးသည်ပင်ကိုယ်အားဖြင့်လင်ရှောင်းတောင်ထွတ်ကိုတတ်နိုင်သမျှအမြန်ဆုံးပြန်ကာ မိစ္ဆာမျိုးနွယ်စုကမည်သည့်လှည့်ကွက်များလုပ်ရန်ကြံစည်နေသလဲဟု ပတ်စုံစမ်းချင်နေမိ၏။

သို့သော် သူအနောက်လှည့်ကြည့်လိုက်ချိန်တွင် လူအများစုမှာအပူဒဏ်ကြောင့်ချွေးသုတ်နေကြသည်ကိုမြင်လိုက်ရပြီး သူတို့တကယ်ပင်ပန်းနေကြမည်ကိုသူသိသဖြင့် ကောနန်ကိုခေါ်ကာပြောခိုင်းသည်။

ဤကဲ့သို့အ​ခြေအ​နေမျိုးအောက်၌ သူတို့ခရီးဆက်နေမည်ဆိုလျှင် လူများစွာမှာရန်သူ၏တိုက်ခိုက်မှုနှင့်ကြုံရသည့်အခါ ခွန်အားကုန်ဆုံးနေလိမ့်မည်ပင်။

သူတွေးတောမိသည်။

"ဒါဆိုမင်းလူနည်းနည်းခေါ်ပြီးတော့ အရှေ့မှာသွားစစ်ဆေးချည်။ မူမမှန်တာမရှိလို့ရှိရင် လူတိုင်းကိုခဏနားခိုင်းလိုက်တာပေါ့။ မှတ်ထား၊ တစ်ခုခုလုပ်မယ်ဆိုရင်တစ်ယောက်တည်းမလုပ်နဲ့၊ အချိန်မရွေးသတိချပ်ထားရမယ်။"

ကောနန်ကတုံ့ပြန်ကာ အနောက်လှည့်ပြီး လူတိုင်းကားပူအိုက်ကာပင်ပန်းနေပြီဟု အခြားတပည့်ဂိုဏ်းသားတို့ကိုပြောလိုက်ရာ ထိုစကားကိုကြားလိုက်ရချိန်တွင် လက်ခုပ်သံများဆူညံလာပေသည်။

အရိပ်ရသည့်သစ်ပင်အောက်တွင်ထိုင်ချကာ လန်းဆန်းသောရေအငုံအနည်းငယ်သောက်လိုက်ရာ အလွန်လန်းဆန်းသွားသယောင်ခံစားလိုက်ရသည်။ လူအများအပြားမှာစိတ်ကျေနပ်မှု​ဖြင့်သက်ပြင်းချမိကြသည်။ စောင့်ကြပ်ရမည့်တာဝန်ကိုခွဲဝေပေးပြီးနောက် သူတို့အကုန်လုံးမှာဒီညတွင်ကောင်းမွန်စွာအနားယူရန်ကြံရွယ်ထားကြသည်။

သူတို့အနားယူနေစဥ် သိပ်မဝေးသောနေရာမှနှေးကွေးသောခြေသံများထွက်လာသည်။ တစ်ယောက်ကခေါင်းလှည့်ကြည့်ကာ ချက်ချင်းပင်စက်ဆုပ်ရွံရှာမှုကိုဖော်ပြမိကာပြောလိုက်သည်။

"ဒီမှာမနေနဲ့၊ ငါတို့နဲ့ဝေးဝေးနေ!"

ရောက်လာသည့်သူမှာကျန်းရွေ့ဖြစ်သည်။

သူကားမှော်မီးအိမ်ကိုအာဟာရပြည့်စေဖို့ရာ သူ၏ကိုယ်ပိုင်သွေးကိုအသုံးချ၍အပြစ်ပေးခံခဲ့ရသည်။ မည်သည့်ကျင့်စဥ်ကမျှ သာမန်လူတစ်ယောက်၏ပုံမှန်အားအင်ကုန်ခမ်းမှုထက်ကျော်လွန်နေသော ဒီဆုံးရှုံးမှုအရှိန်အတွက် ပြန်ကောင်းအောင်လုပ်ပေးနိုင်ခြင်းမရှိပေ၊ ရှုလင်ကျားထံမှသူခိုးယူခဲ့သည့်စွမ်းအားဆုံးရှုံးသွားပြီးနောက်တွင် သူ၏ကိုယ်ပိုင်စိတ်ဝိညာဥ်စွမ်းအားမှာအစကတည်းကအနည်းငယ်သာရှိသည်ကိုပြောမနေနှင့်တော့။

သို့သော် ရက်အနည်းငယ်အတွင်းတွင် ကျန်းရွေ့၏ဆံပင်မှာမီးခိုးရောင်ပြောင်းသွားပြီးဖြစ်ကာ တစ်ချိန်တည်း၌သူ၏ခြေဖဝါးတစ်စုံမှာယိမ်းယိုင်ကာ သူ၏လှုပ်ရှားမှုများမှာလည်းနှေးကွေးလျက်ရှိသည်။ အဝေးမှကြည့်လျှင် သူကားအသက်ကြီးရင့်သောလူအိုကြီးတစ်ယောက်နှင့်တူသည်။

မကောင်းသောလုပ်ရပ်တို့ထုတ်ဖော်လိုက်ရပြီးနောက်၌ သူသည်အဓိကဇာတ်ဆောင်ရောင်ဝါဆုံးရှုံးသွားခဲ့၏။ လူတိုင်းကသူ့ကိုမုန်းတီးကာစောင့်ကြပ်နေကြသည်။ ကျန်းရွေ့မှာပြစ်တင်ရှုံ့ချခံရပြီးနောက်ဘာမှပြန်မပြောဝံ့ပေ။ သူဟာလူတိုင်းနှင့်ဝေးဝေးနေကာ သစ်ပင်ကြီးတစ်ပင်အောက်တွင်ထိုင်ချလိုက်သည်။

စောင့်ကြပ်ဖို့ရတာဝန်ကျသည့်ဂိုဏ်းသားနှစ်ဦးမှာချိတုံချတုံဖြစ်စွာ သူ့ကိုခပ်လှမ်းလှမ်းမှစိုက်ကြည့်နေကြသည်။

ကျန်းရွေ့မှာအခြားဂိုဏ်းသားများထံမှဓားပျံဖြင့်အလှည့်ကျခေါ်သွားခံရတုန်းက သူမလှုပ်ရှားရဲခဲ့ပေ။ သူအောက်ဆင်းလာသော် သူ့​ခြေထောက်များမှာထုံကျင်နေခဲ့သည်။ ဤအချိန်တွင် သူဟာစမ်းချောင်းထံတစ်လှမ်းချင်းရွေ့သွားကာ ရေအငုံအနည်းငယ်သောက်မိသည်။

ရေသောက်နေစဥ် ရေမျက်နှာပြင်ထက်တွင်သူ၏တစ္ဆေပမာပုံရိပ်ကိုမတော်တဆမြင်သွားရာ သူချက်ချင်းကြောက်လန့်တကြားအကြည့်လွှဲမိသည်။

ဤတစ်ကြိမ်၌ လင်ရှောင်းတောင်ထွတ်ထံအမြန်ပြန်သွားရန်အလို့ငှာ သူရရှိသည့်အပြစ်ဒဏ်မှာယာယီဆိုင်းငံ့ခံထားရလေသည်။ ဆန့်ကျင်ဘက်အနေဖြင့် ဤရက်များမှာကျန်းရွေ့အတွက်အလွယ်ငူဆုံးနေ့ရက်များဖြစ်သော်လည်း ဤအခိုက်အတန့်တွင် ဂိုဏ်းကိုပြန်ရောက်ပြီးနောက်၌ သူမည်မျှနှိပ်စက်ခံရတော့မည့်အကြောင်းမနေနိုင်ဘဲတွေးကြည့်မိသည်။

သူ၏လက်ရှိအခြေအနေဖြင့် သူ့မှာသေချာပေါက်ကိုလွတ်မြောက်ဖို့ရာလမ်းမရှိပေ။

အတိတ်တွင်မြောက်မြားစွာကြိုးစားအားထုတ်ခဲ့ပြီးနောက် အစကဂိုဏ်းထဲတွင်သူ့ကိုထောက်ပံ့သည့်လူအချို့ရှိခဲ့သည့်တိုင် ယခုတွင်သူ့မှာအဓိကဇာတ်ဆောင်ရောင်ဝါလုံးဝမရှိတော့သည့်အပြင် သူလုပ်ခဲ့သည့်လုပ်ရပ်များမှာလည်းထုတ်ဖော်ခံလိုက်ရပေသည်။ သူပြန်သွားရင်တောင် သူ့အတွက်တောင်းဆိုပေးမည့်သူတစ်ဦးမျှမရှိမှာစိုးသည်။

ငါတကယ်ဘဲသေရမှာကိုစောင့်နေရမှာလား။ အဲ့ဒီ့သောက်မီးအိမ်ထဲကိုစုပ်ယူခံရမှာကိုစောင့်နေရတာလား။

ကျန်းရွေ့မှာကြောက်လန့်ကာနောင်တရနေမိသည်။ ထိုနေ့ကရှုလင်ကျားသူ့ကိုပြောပြခဲ့သည့်ဇာတ်ကြောင်းဟာ သူတစ်ခဏမျှတွေးမိသည်နှင့် သူ့အားစိတ်ပျက်လက်ပျက်ဖြစ်သွားစေသည်။

ကျန်းရွေ့မှာမြေပြင်ပေါ်တွင်လဲလျောင်းကာ စိုးရိမ်ပူပင်မှုတို့နှင့်ပြည့်နှက်နေပြီး သူအိပ်ပျော်တော့မည့်အချိန်တွင် သူ့ပုခုံးမှာရုတ်တရက်အပုတ်ခံလိုက်ရသည်။

ကျန်းရွေ့မျက်စိဖွင့်ကြည့်လိုက်ရာ ညဥ့်နက်နေပြီမို့ ကောင်းကင်မှာမသိလိုက်ဘဲမှောင်မည်းနေပြီးဖြစ်ကာ ပုံရိပ်တစ်ခုကသူ့ဘေးတွင်တိတ်တိတ်လေးရပ်နေပြီး သူ့ကိုငုံ့ကြည့်ကာ သူ့အား"ရှူး"ဟုလက်ဟန်အမူအရာပြလာသည်ကိုမြင်လိုက်ရသည်။

ကျန်းရွေ့ထိုလူကိုမှတ်မိသွားသာရေရွတ်မိသည်။

"မင်ရှောင်း?"

သူပြောလို့ပြီးသွားသော် ဘေးနှစ်ဖက်ကိုခပ်မြန်မြန်ကြည့်မိသည်။

လူတိုင်းကသူ့ကိုမုန်းတီးနေပြီး ကျန်းရွေ့တွင်ခုခံရန်(သို့)ထွက်ပြေးဖို့ရာခွန်အားမရှိကြောင်းသူတို့သိထားကြသည်။ အနားယူနေကြသည့်နေရာမှာသူနှင့်အလှမ်းဝေး၏။ သူ့ကိုအလှည့်ကျစောင့်ကြပ်ရန်တာဝန်ကျသည့်ဂိုဏ်းသားများမှာသူ့ရှေ့တွင်ရှိနေပေမဲ့ သူတို့မှာဤအချိန်တွင်မြေပြင်ပေါ်လဲကျနေကြသည်။ သူတို့မှာမလှုပ်သဖြင့် မေ့မြောနေခြင်းလား(သို့)သေသွားသည်လားမသိရပေ။

မင်ရှောင်းကပြုံးကာဆိုသည်။

"ဟုတ်တယ်၊ ကျွန်တော်ပါ။ ကျွန်တော်ခင်ဗျားကိုမတွေ့ရတာကြာပြီ၊ ကျန်းသခင်လေးအဆင်ပြေတယ်ဟုတ်။"