Kaaleekh lagi hai tan par mere,

Dho liya hai ghis ghiske.

Ab khoon se lath path hath hain

Lekin daaman kaala baki hain

Khwab jo the aankhon mai,

Aansuo ke sailaab mai beh gye,

Jal chuka hai aangan mera,

Bas apno'n ki raakh baki hai

Chehre sab anjaan hain,

Har aahat mujhe darati hai,

Mit chuki hai yaadein saari,

Bas ek darawna sapna baki hai.

Har saans ab bojh hai,

Har dhadkan ek shor hai

Har ghadi ek sadi hai,

Lekin dil mai ek tufaan abhi baki hai.

Dekha jo tune un nazro'n se,

Dil mai utha ek bhoochal hai,

Andheri si jo ab tak zindagi thi,

Isme ek aaftaab baki hai.

Jalan jo hai meri rooh mai,

Tumhari chhuan chandan hai uska,

Mit chuki jo kabhi aag thi man ki,

Uski abhi ek chingari baaki hai.

Adharma ne paanv pasaar liye toh kya,

Kaurav khule ghum rahe toh kya,

Abhi toh bas chausar haare hain,

Kurukshetra ki Mahabharat abhi baki hai.