!unicode!

ကျန်းဝေကကျန်းရွေ့ကိုမေးလာသည်။

"မနက်ဖြန်မင်းရဲ့ပြိုင်ဘက်ကဘယ်သူလဲ။ မင်းသူ့ကိုရိုက်ချနိုင်လို့ရှိရင် မင်းထိပ်ဆုံးသုံးယောက်ထဲဝင်သွားမှာ။ မင်းရှုလင်ကျားနဲ့ထိပ်တိုက်တွေ့ဖို့များတယ်နော်။"

ကျန်းရွေ့ကပင့်သက်ရှိုက်ကာဆိုသည်။

"မဆိုးပါဘူး။ ကျွန်တော်မနက်ဖြန်ကျရင် ကျင်းဟိုင်ဂိုဏ်းကယွီခန်းလျို့နဲ့ယှဥ်ပြိုင်ရမှာ။ ဒါပေမဲ့ကံဆိုးချင်တော့ ကျွန်တော်နိုင်ဖို့က၆၀ရာခိုင်နှုန်းလောက်ဘဲသေချာတယ်။"

ယွီခန်းလျို့ကတတိယပွဲစဥ်တွင်ယှဥ်ပြိုင်နိုင်ပြီး ပင်ကိုယ်အားဖြင့်သူဟာအားမနည်းပေမဲ့ အလွန်ရိုးသားကာ အကြင်နာတရားသိပ်မကင်းမဲ့ပေ။ ခွန်အားအရာ၌ တကယ်တော့လင်းယွဲ့လောက်မကောင်းသော်လည်း ပုတီးစေ့သာရှိလို့ရှိရင် ရာနှုန်းပြည့်ကျိန်းသေသွားမည်ပင်။

ကျန်းဝေနှာမှုတ်လိုက်ပေမဲ့ အတည်မယူဘဲပြောလိုက်သည်။

"ငါမင်းကိုတစ်ခုခုပေးစရာရှိတယ်။ ဒီရက်တွေမှာငါမင်းကိုလာမတွေ့နိုင်ဘူး။"

သူကချင်းကွမ်အိတ်ထုတ်ကာ ကျန်းရွေ့ကိုပေးလာသည်။ ကျန်းရွေ့လှမ်းယူကာဖွင့်ကြည့်လိုက်ရာ အထဲတွင်အဖိုးတန်အဆောင်စာရွက်များရှိနေပြီး ရှားပါးကာပစ္စည်းကောင်းဖြစ်သည့်မှော်လက်နက်နှစ်မျိုးလည်းပါဝင်သည်။ ၎င်းတို့အကူအညီနှင့်ဆိုလျှင် အနိုင်ရဖို့ကသေချာပေါက်ကိုပြဿနာမဟုတ်ပေ။

ကျန်းရွေ့ရင်ထဲတွင်အပျော်လွန်သွားရကာ ကျေးဇူးတင်စွာပြုံးပြ၍ဂါရဝပြုလိုက်သည်။

"ကျေးဇူးတင်ပါတယ်ရှစ်ပေါ်!"

ကျန်းဝေကဆိုသည်။

"ရပါတယ်၊ မင်းငါ့ကိုကျေးဇူးတင်စကားပြောဖို့လိုသေးလို့လား။ မင်းနိုင်သွားရင် ငါတို့ဂိုဏ်းရဲ့ဂုဏ်ကျက်သရေတိုးလာဖို့က ပိုအရေးကြီးတယ်။ တကယ်လို့ရှုလင်ကျားသာဒီဓားစမ်းသပ်ရေးပြိုင်ပွဲမှာအနိုင်ရသွားလို့ရှိရင် သူများတွေဘာပြောကြမယ်ထင်လဲ။ ဘယ်လောက်ရုပ်ဆိုးလိုက်မလဲကွာ။"

ကျန်းရွေ့တန့်သွားကာ ခေါင်းငြိမ့်၍တိုးတိုးပြောမိသည်။

"အမှန်ပဲ။"

သူအတင်းအဖျင်းနှင့်ကောလဟာလများစွာကိုကြားခဲ့ရသည်၊ အခြေခံအားဖြင့်၎င်းတို့အားလုံးဟာ

ရှုလင်ကျား၏ဓားရေးကထူးချွန်ပြီး လင်ရှောင်းဂိုဏ်းက၎င်း၏ကြီးမားသောဆုံးရှုံးမှုကိုသည်းညည်းမခံနိုင်ကြောင်းခံစားနေကြရသည်။ ထိုဆွေးနွေးမှုတို့၏လေသံများမှာ ထေ့ငေါ့ကာအားရကျေနပ်နေပေသည်။

ရှုလင်ကျားကနောက်ဆုံးအနိုင်ရသူဖြစ်သွားခဲ့လို့ရှိလျှင် ချီဇုန်ကတကယ့်ကိုပိုမိုရှက်ရွံ့ရမည်မှာအဟုတ်ပင်။ အကြီးအကဲတစ်ယောက်အနေဖြင့် ကျန်းဝေဟာပင်ကိုယ်အားဖြင့်ဤကဲ့သို့ဂုဏ်သတင်းနှင့်ပတ်သတ်ပြီး အလွန်စိုးရိမ်နေမိသည်ပင်။

ကျန်းရွေ့ကချင်းကွမ်အိတ်ကိုသိမ်းကာပြောလိုက်သည်။

"ရှစ်ပေါ်၊ စိတ်မပူပါနဲ့၊ ကျွန်တော်တို့ဂိုဏ်းအတွက် ကျွန်တော်အကောင်းဆုံးလုပ်မှာပါဗျ။"

"တကယ်တော့ အနိုင်အရှုံးကိုအရမ်းကြီးအလေးအနက်မထားပါနဲ့၊ မင်းလိုလူငယ်တစ်ယော​က်အတွက် အခုကအစဘဲရှိသေးတာ၊ အနာဂတ်ကအရှည်ကြီးရှိနေတုန်းပဲ။"

ကျန်းဝေသက်ပြင်းချကာ ကျန်းရွေ့ကိုအပြုံးတစ်ပွင့်ဖြင့်ကြည့်လိုက်သည်။

"မင်းရဲ့ရှစ်စွင်းအပေါ်မှာကပ်ဘေးတစ်ခုရှိနေတာကိုမင်းသိသင့်တယ်နော်။"

ကျန်းရွေ့ရင်ထဲတွင်ဒိန်းခနဲဆောင့်ခုန်သွားရကာပြောမိသည်။

"ကျွန်တော်မတော်တဆကြားဖူးခဲ့တာ၊ အရမ်းအတိအကျကြီးတော့မဟုတ်ဘူး။"

ကျန်းဝေကဆိုသည်။

"သူ့ရဲ့ကပ်ဘေးကိုရှောင်ဖို့မလွယ်ဘူး၊ ရှောင်လို့မရဘူးဆိုရင်....အင်း၊ ဒါကငါတို့ပြောရမဲ့ကိစ္စပဲ။ ဒါကလည်းအရေးကြီးတာပဲ၊ မတော်တဆတစ်ခုခုဖြစ်လာတာနဲ့ ချီဇုန်မှာဆရာသခင်တစ်ယောက်ရှိအောင်သေချာလုပ်ထားရမယ်။"

ကျန်းရွေ့ဒါကိုဘယ်တုန်းကမျှမတွေးဘူးပေ၊ ကျန်းဝေ၏ဆိုလိုရင်းကိုတဝိုးတဝါးကြားလိုက်ရပြီးနောက် သူ့နှလုံးခုန်သံမြန်လာသည်ကိုခံစားမိလိုက်သည်။

"ဂိုဏ်းရဲ့အနာဂတ်ဂိုဏ်းချုပ်က ဂိုဏ်းရဲ့စည်းမျဥ်းတွေအရဆိုရင် တပည့်ဂိုဏ်းသားခေါင်းဆောင်ကလွဲလို့မဖြစ်နိုင်ဘူး။ ကံဆိုးချင်တော့ငါတို့အခြေအနေကနည်းနည်းထူးခြားတယ်။ မင်းရဲ့ရှစ်ရှုန်းလော်ရှောင်းကသူရဲဘောကြောင်စွာနဲ့ လောကကြီးကနေရှောင်တိမ်းနေတယ်။"

ကျန်းဝေကဆိုသည်။

"ကျန်တဲ့လူတွေထဲမှာ ရှုလင်ကျားကဂိုဏ်းကိုပုန်ကန်သွားပြီးတော့ ယင်းချန်ကမောက်မာတယ်၊ သူကလူသားဘုရင်တစ်ယောက်အဖြစ်မွေးဖွားလာခဲ့တာမို့ သူ့မှာဂိုဏ်းချုပ်လုပ်ချင်တဲ့ရည်ရွယ်ချက်မရှိဘူး။ ဘယ်လိုပဲစဥ်းစားစဥ်းစား မင်းနဲ့အသင့်တော်ဆုံးပဲ၊ ဒါပေမဲ့ကံမကောင်းစွာနဲ့ မင်းကငယ်နေသေးတယ်။"

ကျန်းရွေ့ပြောမိသည်။

"ဟင့်အင်း၊ ရှစ်ပေါ်၊ ကျွန်တော်အဲ့အကြောင်းဘယ်လိုလုပ်စဥ်းစားရဲမှာလဲဗျာ..."

"မင်းရှစ်ပေါ်ကိုဒီလိုပြောလို့ရှိရင် မင်းအပြင်မှာသွားကြည့်လို့ရတယ်။ မင်းဘာမှဖိအားများစရာမလိုဘူးဆိုပေမဲ့ မင်းဒီအရာတွေကိုသိထားသင့်တယ်။"

ကျန်းဝေကရှုံ့ချစွာရယ်မောလာသည်။

"ငါမင်းကိုပြောပြချင်ရုံပါ၊ ဓားစမ်းသပ်ရေးညီလာခံကိုအနိုင်ရပြီးတော့ လျို့ဝှက်ဂူထဲဝင်ပြီးအမွေဆက်ခံဖို့ကသိပ်အရေးကြီးတယ်။ အဲ့ဒါကအနာဂတ်မှာမင်းဂိုဏ်းချုပ်ရာထူးကိုဆက်ခံဖို့မင်းအတွက်အရေးကြီးတဲ့အရင်းအနှီးတစ်ခုပဲ။ ကျင်းဖေးထုန်ကိုဘဲကြည့်၊ သူကလည်းအနိုင်ရသွားပြီးနောက်ပိုင်းမှာပီလော့နန်းတော်ကိုပြန်ပြီး နန်းတော်အရှင်ဖြစ်လာတယ်မလား။ သူအခုဖြစ်နေတဲ့ပုံစံကိုမင်းအားမကျဘူးလားကွ။"

ကျန်းရွေ့ကကျင်းဖေးထုန်အကြောင်းပြောခဲသည်။ တစ်ဖက်လူ၏ကိုယ်နှုတ်အမူအကျင့်နှင့်ကြီးမြတ်မှုမှာ အံ့သြစရာကောင်းကာမနာလိုအားကျစရာကောင်းလှသည်။ ဒီတစ်ခေါက်ကျန်းဝေ၏စကားများကိုကြားလိုက်ရရာ သူမနေနိုင်ဘဲသွေးပူလာရသည်။

စင်စစ်ပင်၊ လင်ရှောင်းဂိုဏ်းထဲရှိဘဝဟာအရင်ကထက်ပိုကောင်းလာသော်လည်း သူသာတစ်နေ့ကျဂိုဏ်းချုပ်တစ်ယောက်ဖြစ်လာပြီး ထိပ်ဆုံးကိုတက်လှမ်းကာ သူ့ကိုထိန်းချုပ်မည့်လူတစ်ယောက်မှမရှိတော့ရင်ပိုမကောင်းပေဘူးလား။

ဆရာသခင်ရှစ်စွင်းကသူ့ကိုတအံ့တသြကြည့်လာအောင်သူလုပ်နိုင်ဖို့မျှော်လင့်မိသည်။ တစ်နေ့ကျရင်သူကရာထူးလက်ဆင့်ကမ်းယူကာ သူဟာရှုလင်ကျားထက်ပိုသင့်တော်သည့်လူဖြစ်ကြောင်းသက်သေပြမည်။

ကျန်းရွေ့မျက်လုံးဖျတ်ခနဲလက်သွားပေမဲ့ သူတည်ငြိမ်စွာပြောလိုက်သည်။

"ဘာပဲဖြစ်ဖြစ် ကျွန်တော်ဂိုဏ်းအတွက်တကယ်အနိုင်ရချင်တာမို့ ဓားစမ်းသပ်ရေးညီလာခံမှာကျွန်တော်အကောင်းဆုံးလုပ်ပါ့မယ်။"

ကျန်းရွေ့ရင်ထဲတွင်သိက္ခာစောင့်ထိန်းမှုရှိသည်ကိုကျန်းဝေသိသည်မို့ သူထပ်ခါတလဲလဲပြောမနေတော့ပေ၊ သူဟာတည်ငြိမ်သောလူစားမျိုးကိုလေးစားလေ့ရှိရာ ဒီအတွက်ကြောင့်တစ်ဖက်ကပိုတည်ငြိမ်နေသည်ဟုခံစားမိ၍ပြောလိုက်သည်။

"ဒါပဲ၊ မနက်ဖြန်ဒီအဆောင်စာရွက်တွေကိုယူသွားချည်။ မင်းကောင်းကောင်းပြိုင်ခဲ့လို့ရှိင် ဘာတွေပဲဖြစ်နေပါစေ ရှစ်ပေါ်ကမင်းဘက်မှာရှိနေမယ်။"

လင်းယွဲ့၏သေဆုံးမှုသတင်းထွက်လာပြီးနောက်တွင် ၎င်းကလူတိုင်းအားသိသိသာသာကိုအံ့သြမှင်သက်သွားစေခဲ့သည်။

နောက်တစ်နေ့တွင် ကွေ့ရီဂိုဏ်းမှ ပြိုင်ပွဲလာကြည့်သည့်လူအနည်းကျဥ်းသာရှိပြီး ၎င်းတို့အားလုံးမှာသုန်မှုန်နေကြသည်။

ပြိုင်ပွဲမစမီ လူအများစုကလင်းယွဲ့၏သေဆုံးမှုအကြောင်းပြောဖြစ်ကြကာ ၎င်းကရုတ်တရက်ဆန်ဆန်ဖြစ်သွားခဲ့သည်ဟုသာခံစားမိကြသည်။

လင်းယွဲ့၏အမူအကျင့်မှာမတိုင်ခင်ကမောက်မာသော်လည်း သူ၏သေဆုံးမှုကြောင့် မုန်းတီးမှုမှာအနည်းငယ်ပျက်ပြယ်သွားခဲ့သည်။ သူသာရှုလင်ကျားနှင့်မတွေ့ခဲ့လို့ရှိရင် ဒီကနေ့တတိယမြောက်ပွဲစဥ်ကိုဝင်ပြိုင်နိုင်လိမ့်မည်ပင်။

ရလဒ်အနေဖြင့် လူငယ်တစ်ယောက်ကဒေါသထွက်လွန်းအားကြီးလို့ ဒဏ်ရာကုနေစဥ်စိတ်မထိန်းနိုင်ဖြစ်ကာ သူ့ကိုယ်သူဒုက္ခရောက်သွားစေခဲ့သည်။

ဤတစ်ကြိမ်တွင်ရှုလင်ကျားကပထမဆုံးပြိုင်ရမည်ဖြစ်သည်။ သူ၏ပြိုင်ဘက်မှာသူ့ကိုမြင်လိုက်ရချိန်တွင်သိမ်ငယ်သွားရသည်။ ထို့အပြင် ဒီတစ်ခေါက်သူ၏ရောင်ဝါဟာလည်း၂၀ရာခိုင်နှုန်းပြန်ရလာပြီဖြစ်ရာ သူဟာဓားရေးတွင်လက်စွမ်းအသစ်ပြလိုက်သည်။ ပြောထားတဲ့အတိုင်း အနိုင်ရဖို့မခက်လိုက်။

သူပြိုင်ပွဲစင်မြင့်ပေါ်ကဆင်းလာသော် ကွေ့ရီဂိုဏ်းကိုကြည့်ကာ မနေနိုင်ဘဲမျက်မှောင်အသာကြုတ်မိသည်။

ကျင်းဖေးထုန်ကဆိုသည်။

"လင်းယွဲ့ရဲ့သေဆုံးမှုကမင်းနဲ့မဆိုင်ဘူး။ မင်းကိုယ်မင်းအပြစ်တင်မနေနဲ့။"

ရှုလင်ကျားချက်ချင်းအကြည့်ပြန်ရုတ်ကာပြောလိုက်သည်။

"ကျွန်တော်ကိုယ့်ကိုယ်ကိုအပြစ်မတင်ပါဘူးနော်။"

ကျင်းဖေးထုန်မနေနိုင်ဘဲတိတ်တိတ်လေးခိုးပြုံးမိသည်။

ကံကောင်းစွာဖြင့်ရှုလင်ကျားကသူ့မျက်နှာထားကိုသတိမထားမိဘဲပြောလာသည်။

"ကျွန်တော်အရမ်းထူးဆန်းတယ်လို့တွေးမိရုံတင်။ လင်းယွဲ့နဲ့ကျွန်တော်ပြိုင်တုန်းက သူ့ဒဏ်ရာမပြင်းထန်ဘူးဆိုတာကျွန်တော်ကောင်းကောင်းသိတယ်။ သူဒဏ်ရာအများကြီးမရသွားတာမို့ သူဒုက္ခရောက်သွားရင်တောင်မှ သူ့မှာခုခံနိုင်စွမ်းမရှိတာမဖြစ်သင့်ဘူးလေ။ သူဘယ်လိုလုပ်သေသွားတာလဲ။ ကျွန်တော်နားမလည်တော့ဘူး။"

ကျင်းဖေးထုန်ကမေးလာသည်။

"လင်းယွဲ့သေဆုံးမှုရဲ့ထူးခြားဖြစ်စဥ်ကိုသိလား။"

ရှုလင်ကျားခေါင်းခါကာပြောမိသည်။

"ကွေ့ရီဂိုဏ်းကလျို့ဝှက်ထားတယ်။ အခုဆိုရင်ဆက်ဆံရေးကအရမ်းတင်းမာနေတော့ သွားမေးဖို့မလွယ်ဘူး။ သူရူးသွားတာကိုကျွန်တော်သိတယ်၊ မနေ့ညက..."

သူသည်အစက"ကျွန်တော်မနေ့ညကခင်ဗျားဆီကကြားခဲ့တာ"ဟုပြောချင်ပေမဲ့ စကားတစ်ဝက်ရောက်သော် ထိုအချိန်တုန်းကသူဟာမြေခွေးအသွင်နှင့်ရှိနေမှန်းရုတ်တရက်သတိရသွားကာ စကားတစ်ဝက်မှာတင်ချက်ချင်းရပ်ပစ်လိုက်ရပြီး သာမန်ကာလျှံကာပြောလိုက်သည်။

"ကျွန်တော်မနေ့ညကအပြင်မှာကြားခဲ့တာ။"

ကျင်းဖေးထုန်ကဘာမှမကြားချင်ယောင်ဆောင်ကာခေါင်းငြိမ့်၍ပြောလာသည်။

"တကယ်တော့ ကိုယ်ရုတ်တရက်တစ်ခုသတိရသွားတယ်၊ ကိုယ်မင်းကိုပြောပြဖို့မေ့နေတာ၊ လင်းယွဲ့ရဲ့အဖိုးလင်းလျန်က လင်ရှောင်းဂိုဏ်းကနေကွေ့ရီဂိုဏ်းကိုပြောင်းသွားတာကိုမင်းသိပေမဲ့ သူကဘာလို့မိုးကြိုးဓားသွားရဲ့ဖန်တီးရှင်ဖြစ်နေလဲဆိုတာမင်းမသိလောက်ဘူးမလား။"

ရှုလင်ကျားမထင်မှတ်ထားစွာပြောမိသည်။

"ဘာများလဲ။"

ကျင်းဖေးထုန်ဟာလည်းဒီအကြောင်းသိတာကြာပြီဖြစ်ကာ ရှုလင်ကျားကသိထားတာကြာပြီဟုခံစားမိသည်။ အဆုံးတွင်ဒီဓားရေးကျင့်စဥ်ကရှင်းဇုန်အပိုင်ဖြစ်သည်မို့ ရှုလင်ကျားက၎င်း၏ဇစ်​မြစ်ကိုမသိလောက်ပေ။

ကျင်းဖေးထုန်ပြောလိုက်သည်။

"အင်း၊ နောက်ကျတော့ကိုယ်ပြန်တွေးကြည့်လိုက်မှ လင်းယွဲ့ကမင်းသုံးတဲ့ဓားရေးကိုသုံးပြီးမင်းနဲ့ယှဥ်ပြိုင်ချင်ခဲ့တာ၊ ဒါပေမဲ့ သူကမင်းကိုရှုံးသွားတယ်လေ။ ဒါကြောင့်မို့သူ့အတွက်ကြီးမားတဲ့ရိုက်ခတ်မှုဖြစ်သွားတာပဲ။"

ရှုလင်ကျားမျက်မှောင်ကြုတ်ကာ လင်းယွဲ့၏အပြုအမူများကိုပြန်တွေးကြည့်ပြီး တစ်အောင့်မျှစကားမပြောမိပေ။

သူသည်လင်းလျန်ကိုတစ်ခါမျှမမြင်ဖူးပေမဲ့ ဒီရက်တွေအတွင်းမှာသူဟာမိုးကြိုးဓားသွားကျင့်စဥ်ကိုတော်တော်များများလေ့လာခဲ့သည်မို့ ရှုလင်ကျားအားထိုအကြီးအကဲပုဂ္ဂိုလ်ကိုရိုသေလေးစားသွားစေခဲ့၏။

သူ့တွင်နက်ရှိုင်းသောနားလည်မှုရှိပြီး နှစ်ရာပေါင်းများစွာအပြန်အလှန်ဆက်နွယ်နေသည့်ခံစားချက်မျိုးရနေသည်။

ယခုတွင်လင်းယွဲ့ကသူ့အငယ်ဖြစ်နေကြောင်းကြားလိုက်ရရာ လင်းယွဲ့၏သေဆုံးမှုကသူနှင့်တစ်ခုခုဆိုင်လာပြီမို့ ရှုလင်ကျားကူကယ်ရာမဲ့စွာရှုပ်ထွေးသွားရသည်။

တစ်ခဏမျှကြာသော်သူပြောလိုက်သည်။

"ဒီတော့လင်းယွဲ့ရူးပြီး​သေသွားတာက ​ကျိုးကြောင်းသင့်တယ်လို့ထင်တယ်ပေါ့။"

ကျင်းဖေးထုန်ကဆိုသည်။

"မဟုတ်ဘူး၊ ကိုယ်ကဖြစ်နိုင်ချေကိုမြှင့်ပေးလိုက်ရုံပဲ။ ပြီးတော့ ကိုယ်မနေ့ညကထပ်ခါတလဲလဲတွေးရင်းတွေးရင်းနဲ့ ကိုယ့်မှာနောက်ခန့်မှန်းချက်တစ်ခုရှိလာတယ်။"

ရှုလင်ကျားက"ဟမ်"ဟုဆိုကာ သူဆက်ပြောမှာကိုစောင့်နေပေမဲ့ ကျင်းဖေးထုန်ကပြုံးကာဖြင့်တိုက်ပွဲကွင်းပြင်ကိုကြည့်ကာပြောလာသည်။

"ကြည့်၊ ကျန်းရွေ့နိုင်သွားပြန်ပြီ။ ဒါပေမဲ့ဒီတစ်ခေါက်ကျတော့ အနိုင်ရတာကအရင်နှစ်ပွဲလောက်မကောင်းဘူး။"

ရှုလင်ကျားတိုက်ပွဲကွင်းပြင်ကိုလိုက်ကြည့်ကာပြောမိသည်။

"အဆောင်စာရွက်ကိုမှီခိုပြီးအနိုင်ရတာကသူ့အတွက်တကယ့်ကိုဂုဏ်ကျက်သရေမရှိဘူးပဲ။ ကျစ်....ရတနာတွေအများကြီးပဲ၊ ကျွန်တော်လောင်းတယ်၊ အကြီးအကဲကျန်းကသူ့ကိုအဆောင်စာရွက်တွေတိတ်တခိုးပေးလိုက်တာဖြစ်ရမယ်။"

"လူတွေရဲ့ခေါင်းကိုလောင်းနေတဲ့"သူ့စကားကိုကြားလိုက်ရရင်း

ကျင်းဖေးထုန်အစကရယ်မောမိပေမဲ့ အနောက်ကရှုလင်ကျားပြောတာကိုကြားလိုက်ရသော် သူ့ရင်ထဲတွင်မနေနိုင်ဘဲသက်ပြင်းချမိသည်။

ရှုလင်ကျားကအသေအချာကြီးပြောလာသည်မို့ ချီဇုန်၏အကြီးအကဲကျန်းကကျန်းရွေ့ကိုအရမ်းဘက်လိုက်မှန်းမြင်နိုင်ပေသည်။

ဒီတစ်ခေါက်ကျန်းရွေ့၏ပြိုင်ဘက်ကားသိပ်မသန်မာပေမဲ့ လက်ရှိအခြေအနေမှတဆင့်အကဲဖြတ်ရင်းဖြင့် သူနှင့်ရှုလင်ကျားဟာအဆုံးတွင်တိုက်ခိုက်ရလောက်သည်၊ သို့သော်ကျန်းအကြီးအကဲကကျန်းရွေ့ကိုရတနာအမြောက်အမြားပေးခဲ့သည်မို့ ဘယ်သူ့ကိုနိုင်စေချင်မှန်းသိသာလှပေသည်။

ကျင်းဖေးထုန်အတွက် လူအချို့ကရှုလင်ကျားကိုမျက်နှာသာပေးရင်ဝမ်းမြောက်မိပေမဲ့ တစ်ယောက်ယောက်ကရှုလင်ကျားကိုမမျှမတဆက်ဆံလာလို့ရှိရင် သူမည်မျှမပျော်မရွှင်ဖြစ်ရမှန်းမပြောနိုင်ပေ။

အထူးသဖြင့်ရှုလင်ကျားရှင်းလင်းစွာသိနေသည်ကိုမြင်နေရချိန်တွင်ဖြစ်သည်။

ကျင်းဖေးထုန်ခဏတန့်သွားကာပြောမိသည်။

"ကိုယ့်ကိုခွင့်လွှတ်ပါကွာ၊ ကိုယ်မင်းနဲ့မလောင်းရဲဘူး။ ဒါပေမဲ့ကျန်းရွေ့ရဲ့မကြာသေးခင်ကအနိုင်ရမှုတွေက ထူးခြားတယ်ထင်လား။ သူ့ပုံစံကြည့်ရတာအရည်အချင်းရှိပုံမပေါ်ပေမဲ့ ပြိုင်လိုက်တိုင်းမှာအနိုင်ရသူဖြစ်သွားတာကြီးပဲ။"

ရှုလင်ကျားခေါင်းငြိမ့်လိုက်သည်။

"ခင်ဗျားဘာပြောချင်တာလဲ။"

ကျင်းဖေးထုန်ကဆိုသည်။

"မနေ့ကကျန်းရွေ့လည်းဒဏ်ရာကုဖို့ လျိုပေါ်တောင်ကြားကိုသွားတာ ကိုယ်မြင်လိုက်တယ်။ အဲ့ဒီ့အချိန်တုန်းကလင်းယွဲ့လည်းအဲ့ဒီ့မှာရှိနေလောက်တယ်။"

ကျန်းရွေ့ဘာဒဏ်ရာရနေလဲဟုရှုလင်ကျားမေးဖို့ပြင်လိုက်ချိန်တွင် ကျင်းဖေးထုန်ကအပြုံးတစ်ပွင့်ဖြင့်ထပ်ပေါင်းပြောလာသည်။

"ပြီးတော့ကျန်းရွေ့ရဲ့ဒဏ်ရာဘယ်ကရောက်လာလဲမင်းစိတ်ကူးမိမှာမဟုတ်ဘူး။"

သူသည်ထိုအချိန်တုန်းကမြင်ခဲ့သည့်အရာများကိုအစုံအလင်ပြန်ပြောပြလိုက်သည်၊ ကျန်းရွေ့တစ်ယောက်တွင်းထဲဘယ်လိုကျသွားကြောင်း၊ သစ်ပင်နှင့်ကျောက်တုံးရိုက်တာခံခဲ့ရကြောင်း၊ မြေကြီးပေါ်ခဏခဏလဲကျကြောင်း။

ရှုလင်ကျားမျက်နှာပေါ်ရှိအမူအရာမှာအလွန်ထူးဆန်းလျက်ရှိသည်။ သူရယ်ချင်ပေမဲ့သူ့ကိုယ်သူချုပ်တည်းကာမေးမိသည်။

"သူအရမ်းကံဆိုးနေတာလား။"

ကျင်းဖေးထုန်ကခေါင်းငြိမ့်သည်။

"မထူးဆန်းဘူးလား။"

ရှုလင်ကျားသူ၏ကံကောင်းမှုတန်ဖိုးကိုရုတ်ခြည်းတွေးမိသွားသည်။

အဓိကဇာတ်ဆောင်အရှိန်အဝါကိုနည်းနည်းချင်းစီပြန်ယူလိုက်လို့ရှိရင် ကျန်းရွေ့သတိထားမိသွားမလားဟု သူလည်းအရင်ကတွေးမိသည်။

ဒါပေမဲ့သူ့မှာပြောင်းလဲမှုဖြစ်သွားလို့ရှိရင် ဘယ်လိုပြောင်းလဲမှုမျိုးဖြစ်မှာလဲ။ သူသတိထားမိသွားရင် သူဘာလုပ်မှာလဲ။

အခုဆိုရင်အဖြေကနီးကပ်လာသည်ကို ရှုလင်ကျားခံစားမိသည်။

ယခုတွင်ကျန်းရွေ့ကတစ်အောင့်ကြာအနိုင်ရသွားပြီး ထို့နောက်ကံဆိုးမှုကိုခဏတာရရှိသွားသည်။ ၎င်းမှာသူဟာကြီးကြီးမားမားထိခိုက်သွားပြီး တည်ငြိမ်သောအ​ခြေအနေကိုမထိန်းသိမ်းနိုင်ကြောင်းပြသနေသည်။ ထို့နောက်သူ၏နောက်ထပ်လုပ်ရပ်များမှာ သေချာပေါက်ကိုအမှားများလာလိမ့်ပင်။

ရှုလင်ကျားဖြည်းဖြည်းချင်းပြောလိုက်သည်။

"ကျန်းရွေ့ကံမကောင်းဘူး၊ လင်းယွဲ့သေသွားတယ်။ ကျန်းရွေ့ကံပြန်ကောင်းလာပြီး ဒီနေ့နောက်တစ်ပွဲနိုင်သွားတယ်။"

သူပြောလိုက်သည့်စကားလုံးများမှာဆက်စပ်မှုမရှိပုံပေါက်ပေမဲ့ ကျင်းဖေးထုန်ကတော့မဟုတ်ပေ။ သူကမထင်မှတ်ထားစွာဖြင့်နားလည်သွားကာပြောလာသည်။

"ကျန်းရွေ့ကပါရမီစွမ်းရည်ရှိပြီး ကံကောင်းတဲ့လူတစ်ယောက်မဟုတ်ဘူး၊ ဒါပေမဲ့သူ့ကံကိုပြောင်းပြန်လှန်ဖို့နည်းလမ်းရှာလို့ရခဲ့တယ်? လင်းယွဲ့ကိုသတ်တာကနည်းလမ်းတွေထဲကတစ်မျိုးလား။"

ပြောလို့ပြီးသွားသော် သူကူကယ်ရာမဲ့စွာဖြင့်ခေါင်းခါကာပြောမိသည်။

"ရယ်စရာကောင်းလွန်းတယ်။ လောကကြီးထဲမှာဒီလိုအရာမျိုးဘယ်လိုလုပ်ဖြစ်နိုင်မှာလဲ။"

ရှုလင်ကျားကကျင်းဖေးထုန်ကိုတစ်ချက်စိုက်ကြည့်ကာပြောလာသည်။

"အဲ့လိုအရာမျိုးရှိတယ်လို့ကျွန်တော်ယုံကြည်တယ်ပြောရင်ရော?"

ကျင်းဖေးထုန်ကြောင်အမ်းသွားရသည်။

သူကိုယ်၌ကကောင်းကင်ဘုံ၏ဂုဏ်ယူရသောသားတော်တစ်ပါးဖြစ်ရန်မွေးဖွားလာပြီး အရာရာတိုင်းကားချောမွေ့ကာ သူ၏နောက်ခံအသိုင်းအဝိုင်း၊ ရုပ်ရည်သွင်ပြင်နှင့်ဉာဏ်ကောင်းမှုတို့မှာပထမတန်းစားဖြစ်ပေရာ တကယ်တမ်းတွင် တော်ဝင်မိသားစု၏မောက်မာသောကလေးအချို့ရှိသည်။ ကံကိုလူသားတို့ခြယ်လှယ်လို့ရနိုင်သည်ဆိုတဲ့အချက်ကသိပ်ကိုကိုးရိုးကားယားနိုင်လွန်းလှသည်။

သို့သော် ရှုလင်ကျား၏လေသံထဲတွင်ရှားရှားပါးပါးလေးနက်မှုကိုသူခံစားမိလိုက်သည်။

ထို့ကြောင့်ကျင်းဖေးထုန်သေချာဂရုတစိုက်တွေးကာ သူ့ကိုမျှမျှတတနှင့်လေးနက်စွာဖြေလိုက်သည်။

"ကိုယ်တစ်ခါမှမကြားဖူးဘူး။ ဒါပေမဲ့မင်းပြောတာကသေချာပေါက်ကိုအလိမ်အညာမဟုတ်မှန်းကိုယ်ယုံကြည်တယ်။"

ကျင်းဖေးထုန်၏အဖြေကိုကြားလိုက်ရရာ ရှုလင်ကျားစိတ်သက်သာရာရသွားခဲ့သည်။

၎င်းကရယ်စရာကောင်းပုံပေါ်ရင်တောင်မှ ဒီကမ္ဘာပေါ်မှာသူပြောတာကိုနားထောင်ချင်စိတ်ရှိတဲ့လူတွေရှိနေတုန်းပဲဟုသူတွေးမိသည်။

ရှုလင်ကျား၏စိတ်အခြေအနေချက်ချင်းတိုးတက်လာကာပြုံးလိုက်သည်။

"ထားလိုက်တော့၊ ကျွန်​တော်ကဒီအတိုင်းပြောလိုက်တာ၊ ခင်ဗျားလည်းယုံကြည်လိုက်ပေါ့။ ဒါပေမဲ့ကျွန်တော့်မှာသက်သေမရှိဘူး။ ကျွန်တော်သူနဲ့တိုက်ခိုက်တဲ့အခါကျရင် ခင်ဗျားစူးစမ်းလို့ရတယ်။"

ကျင်းဖေးထုန်ကအပြုံးတစ်ပွင့်ဖြင့်ခေါင်းငြိမ့်ပြလာသည်။

ရှုလင်ကျားကပြောရင်းဖြင့် စားပွဲပေါ်ကိုလက်ချောင်းများဖြင့်အသာအယာတတောက်တောက်ခေါက်ကာ ကျင်းဖေးထုန်ကိုမေးလိုက်သည်။

"ဟေ့၊ ကျွန်တော်နိုင်မယ်လို့ယုံကြည်လား။"

သူ့မျက်ဝန်းတစ်စုံကတောက်ပနေပြီး ၎င်းတို့ထဲတွင်ကြည်လင်သောအပြုံးတစ်ပွင့်ရှိနေကာ သူ့အဖြေကိုစောင့်နေပုံမှာ စားပွဲပေါ်မှာဆောင့်ကြောင့်ထိုင်လျက်သားဖြင့် သူ့ကိုမော့ကြည့်ကာထိတွေ့ပေးဖို့တောင်းဆိုနေသည့်မြေခွေးလေး၏မျက်နှာထားနှင့်ကွာခြားမှုမရှိပေ။

၎င်းကသူ့ကိုကျေနပ်သွားစေမလား၊ သူ့အလိုကိုဆန့်ကျင်မိလိုက်မလားသေချာမပြောနိုင်ပေ။

ကျင်းဖေးထုန်ပြောလိုက်သည်။

"ဟုတ်တာပေါ့၊ ကိုယ်ယုံကြည်တယ်။ အစကထဲကမင်းဟာခွန်အားအကြီးဆုံးလို့ထင်တယ်။"

ရှုလင်ကျားကပြုံးကာဆိုသည်။

"အင်း...ဒါဖြင့်ရင် ကျွန်တော်ကြိုဖိတ်ထားလိုက်မယ်။ ကျွန်တော်နိုင်သွားလို့ရှိရင် တောင်ထိပ်ကလျို့ဝှက်ဂူထဲဝင်လို့ရနိုင်တယ်။ ခင်ဗျားကျွန်တော်နဲ့အတူထပ်ပြီးလိုက်ဝင်ချင်လား။"

ကျင်းဖေးထုန်တောင့်ခဲသွားရသည်:

"ဟမ်?"

ရှုလင်ကျားပြောလိုက်သည်။

"ခင်ဗျားလွန်ခဲ့တဲ့နှစ်တစ်ရာတုန်းကအဲ့ဒီထဲတစ်ခါဝင်ဖူးတယ်မလား။ ကျွန်တော်တွေးတာက ကျွန်တော်အထဲဝင်သွားနိုင်လို့ရှိရင် တစ်ယောက်ယောက်ကလမ်းပြပေးရင်ကောင်းမှာပဲလို့။ ဘယ်လိုလဲ၊ ခင်ဗျားစိတ်ဝင်စားလား။"

သူဘာကိုဆိုလိုမှန်းကျင်းဖေးထုန်ရုတ်ခြည်းနားလည်သွားရသည်၊ ရှုလင်ကျားဟာသူမနေ့ညကလျို့ဝှက်ဂူထဲဝင်ချင်သည်ဟုသူပြောတာကိုကြားခဲ့သည်မို့ ဒီတစ်ခေါက်သူ့ကိုတမင်သက်သက်ဖိတ်ခေါ်လာခြင်းပင်။

သို့သော်ကျင်းဖေးထုန်ကမြေခွေးလေးကိုသူသွားချင်သည်ဟုပြောခဲ့သည့်အကြောင်းမှာ သူကလျို့ဝှက်ဂူထဲဝင်ချင်သောကြောင့် သူနှင့်နီးစပ်ချင်သည်ဟုရှုလင်ကျားသံသယဝင်သွားမှာစိုးကာ တစ်ဖက်လူ၏စိတ်သဘောထားကိုစမ်းသပ်ချင်ခဲ့ပေမဲ့ ထိုအချိန်တုန်းကမြေခွေးလေးကိုအတည်မယူခဲ့ပေရာ ကျင်းဖေးထုန်စိတ်သက်သာရာရသွားသည်။

သို့သော်ရှုလင်ကျားကဒါကိုမှတ်မိနေပြီး သူရှက်သွားမှာစိုးသည်မို့ လက်ဦးမှုရယူ၍ သူနှင့်အတူသွားရန်သူ့ကိုဖိတ်ခေါ်လာခဲ့သည်။

သူကားထက်ရှပုံပေါက်ပေမဲ့ တစ်စုံတစ်ယောက်ကိုခွဲခြမ်းစိတ်ဖြာရာတွင် သူဟာသိပ်မကြာသေးခင်ကသစ္စာဖောက်ခံရကာနာကျင်ခဲ့ရင်တောင်မှ လူတွေကိုသံသယဝင်ကာခွဲခြားဆက်ဆံခြင်းမရှိပေ။

မှတ်ဉာဏ်မရှိသည့်မြေခွေးလေးတစ်ကောင်ပမာ လမ်းမဘေးတွင်ဆောင့်ကြောင့်ထိုင်ကာစိုက်ကြည့်နေရင်းဖြင့် အလွန်ခက်ထန်ပုံပေါက်အောင်ကြိုးစားနေသော်လည်း တစ်စုံတစ်ယောက်၏နှစ်ကြိမ်တိတိပြန်ပေးဆွဲခြင်းကိုခံခဲ့ရလေသည်။

ပိုင်ရှင်မှာနောက်မြေခွေးတစ်ကောင်ရှိလာမှန်း၎င်းသိသွားလို့ရှိရင် ၎င်းကနောက်ပြန်လှည့်မကြည့်ဘဲထွက်သွားကာ အပြင်ဘက်ရှိ လေနှင့်မိုးထဲပြေးသွားလိမ့်မည်။

သို့သော်နောက်လူတစ်ယောက်နှင့်တွေ့သွားသည့်အခါ ၎င်းကတစ်ဖန်ပက်လက်လှန်ကာ ၎င်း၏ပျော့အိအိဝမ်းဗိုက်လေးအား သင့်ကိုထုတ်ပြပေလိမ့်မည်။

သူအရင်ကမထူးခြားမခြားနားဖြစ်ခဲ့တာကြောင့်ဖြစ်လောက်မည်၊ ထို့ကြောင့်သူမကြာသေးခင်ကစပြီးစိတ်ပြေလျော့လာကာ အလွန်စိတ်ခံစားလွယ်လာပြီး ဒီမြေခွေးလေးအကြောင်းတွေးရင်းနှင့် သူ့လည်ချောင်းတစ်ဆို့လာသည်ကိုခံစားလိုက်ရကာ သူခေါင်းငုံ့၍အသာပြုံးမိသည်။

"ကောင်းပြီ။"

ကျင်းဖေးထုန်စကားပြောလို့ပြီးသွားသော် သူခေါင်းမော့ကာရှုလင်ကျားကိုကြည့်လိုက်သည်။

"တကယ်တော့ ဒါကကိုယ်နန်ဇီတောင်ထွတ်လာရတဲ့အကြောင်းရင်းပဲ။ နောက်ဆုံးဓားစမ်းသပ်ရေးပြိုင်ပွဲပြီးတော့ ကိုယ်လျို့ဝှက်ဂူထဲဝင်ပြီးဘိုးဘေးတွေရဲ့အမွေကိုလက်ခံခဲ့တယ်။ အဲ့ဒါကတကယ့်ကိုလျို့ဝှက်နယ်ပယ်ရဲ့တိုးတက်မှုအတွက်အရမ်းအကျိုးရှိတယ်။ ဒါပေမဲ့အဲ့ဒီ့အတွက်ကြောင့်ကိုယ့်မှာမိစ္ဆာအတွင်းစိတ်ရှိလာခဲ့တယ်။ ကိုယ်ခေါင်းလောင်းကိုဖြည်ဖို့ ခေါင်းလောင်းကိုချည်ဖို့လိုနေတုန်းပဲ။ ဒါကြောင့်မို့ ကိုယ်အထဲဝင်ပြီးထပ်ရှာဖွေချင်တယ်။"

မြေခွေးအသွင်နှင့်တုန်းက ရှုလင်ကျားဒါကိုကြားခဲ့ပြီးပြီ။ တစ်အောင့်ကြာသော် သူအနည်းငယ်အံ့အားသင့်သည့်မျက်နှာထားဆင်မြန်းကာမေးမိသည်။

"ဒါဆိုခင်ဗျားမိစ္ဆာအတွင်းစိတ်ရဲ့အရင်းအမြစ်ကဘယ်မှာလဲ။ ဒီလောက်နှစ်တွေအများကြီးကြာပြီးနောက်မှာ ခင်ဗျားရှာတွေ့ပြီလား။"

ကျင်းဖေးထုန်ကသူ့ကိုစိုက်ကြည့်ကာဆိုသည်။

"ဖြစ်နိူင်ပါတယ်...သိပ်မကြာတော့ပါဘူး။"

သူကပြောသည်။

"ကိုယ်မင်းကိုမသွားဖို့ပြောရင် မင်းသေချာပေါက်လက်ခံမှာမဟုတ်ဘူး။ ဒါပေမဲ့အဲ့ဒီ့နေရာကတကယ်ထူးဆန်းတယ်ဆိုတာ ကိုယ်မင်းကိုအသိပေးချင်နေတုန်းပဲ။ မင်းမှာဝင်သွားဖို့အခွင့်အရေးတကယ်ရှိလာရင် မင်းသေသေချာချာစဥ်းစားရမယ်။"

ရှုလင်ကျားကမထူးခြားမခြားနားပြောလာသည်။

"အန္တရာယ်များမှာကြောက်နေလို့ရှိရင် ကုတင်ပေါ်မှာလှဲနေရင်တောင်မှ အိမ်ကြီးပြိုကျသွားနိုင်တာပဲလေ၊ ဘာမှမဖြစ်ပါဘူးဗျာ။ ပြီးတော့ခင်ဗျားကျွန်တော်နဲ့အတူရှိနေတာပဲမလား။"

တတိယပွဲစဥ်တွင် လူပေါင်းများစွာတစ်ပွဲပြီးတစ်ပွဲယှဥ်ပြိုင်ခဲ့ကြကာ လူသိပ်မကျန်တော့ဘဲခပ်​မြန်မြန်ပြီးသွားသည်။

အဆုံးတွင် ရှုလင်ကျားနှင့်ကျန်းရွေ့အပြင်၊ ထန်းကွမ်ဟုခေါ်သည့်ထုံလောင်ကျွန်းမှတစ်ကိုယ်တည်းကျင့်ကြံသူနှင့် မေ့ရင်ဂိုဏ်းမှရှဲ့ရှောင်ဝမ်ဟုအမည်ရသောအမျိုးသမီးသာရှိတော့သည်။

သူတို့လေးဦးအနက် ထိပ်ဆုံးသုံးယောက်နှင့်အနိုင်ရသူမှာထပ်မံဆုံးဖြတ်ရမည်ဖြစ်သည်။ ဒုတိယနှင့်တတိယမှာလျို့ဝှက်ဂူထဲမဝင်နိုင်သော်လည်း သူတို့ဟာနန်ဇီတောင်ထွတ်၏ကိုယ်တိုင်လမ်းညွှန်ပြသမှုကိုလက်ခံကာ ဤနေရာရှိမှော်လက်နက်တစ်ခုကိုလည်းရွေးချယ်လို့ရသည်မို့ ၎င်းဟာလည်းအလွန်ရက်ရောသောဆုလဒ်ဖြစ်ပေသည်။

ဒီတစ်ခေါက်တွင် ရှုလင်ကျား၏ပြိုင်ဘက်ကားထန်းကွမ်ဖြစ်ပြီး ကျန်းရွေ့ကတော့မေ့ရင်ဂိုဏ်းကတစ်ယောက်နှင့်ပြိုင်ရမည်။

လူအနည်းကျဥ်းမှာမဲနှိုက်ပြီးနောက် အခန်းပြန်နားကနောက်ဆုံးပြိုင်ပွဲအနည်းငယ်ကိုစောင့်နေကြသည်။

ရှဲ့ရှောင်ဝမ်ကခေါင်းထက်တွင်ကျစ်ဆံမြှီးများကျစ်ထားကာ ရွှေချည်မျှင်ဝတ်ရုံရှည်ကိုဝတ်ထားသည်။ သူမဟာလည်းနှာတံမြင့်မြင့်နှင့်နက်ရှိုင်းသောမျက်ဝန်းတစ်စုံရှိကာ အတော်လေးလှပပေသည်။

သူမကလက်ထဲရှိမဲကိုကြည့်ကာ ကျန်းရွေ့ကိုမျက်စိတစ်ဖက်မှိတ်ပြလိုက်ပြီး အပြုံးတစ်ပွင့်ဖြင့်ပြောလာသည်။

"မောင်ငယ်လေးရေ၊ အစ်မကမင်းရဲ့ပြိုင်ပွဲတွေကိုကြည့်ထားပြီးသား၊ မင်းကတော်တော့တော်ပါတယ်။ ဒါပေမဲ့ဂရုစိုက်နော်။ အို၊ တို့နဲ့တိုက်ခိုက်တဲ့အခါကျရင် မှော်လက်နက်ဘဲဖြစ်ဖြစ် အဆောင်စာရွက်ဘဲဖြစ်ဖြစ် အဲ့လောက်သုံးရလွယ်မှာမဟုတ်ဘူးရယ်။"

ရှုလင်ကျား၏ယခင်ကပြိုင်ပွဲကိုကျေးဇူးတင်ရမည်၊ ကျန်းရွေ့မှာမေ့ရင်ဂိုဏ်း၏စွမ်းအားကိုအပြည့်အဝနားလည်သဘောပေါက်သွားခဲ့သည်။

သူတို့သည်ကကွက်နှင့်ဓားသံများဖန်တီးကာအနှောင့်အယှက်ပေးရာတွင်ထူးချွန်ပြီး သူတို့ဟာလည်းပုံရိပ်ယောင်သုံးကာတိုက်ခိုက်လေ့ရှိ၏။ ထိုအရာများနှင့်ရင်ဆိုင်ရသော် မှော်လက်နက်နှင့်အဆောင်စာရွက်တို့၏အခန်းကဏ္ဍမှာတကယ့်ကိုကြီးမားစွာလျော့ကျသွားလိမ့်မည်ပင်။

ကျန်းရွေ့မှာသူ၏သိမ်ငယ်မှုကိုထုတ်မပြနိုင်ပေရာ ရှဲ့ရှောင်ဝမ်ကိုပြန်ပြုံးပြ၍ပြောလိုက်သည်။

"ကျွန်တော့်ကိုအသိပေးတဲ့အတွက်ကျေးဇူးတင်ပါတယ်။"

ထိုစဥ်၊ တစ်စုံတစ်ယော​က်ကသူ့စိတ်ထဲတွင်ပြောလာသည်။

"မေ့ရင်ဂိုဏ်းကအရင်အတိုင်းပဲ၊ ခေါင်းကုတ်ရင်းကိုယ်နေဟန်ထားပြနေပြီးတော့ ခေါင်းလောင်းတွေ၊ လေချွန်သံတွေနဲ့လှည့်ကွက်သုံးနေတုန်း။"

ကျန်းရွေ့မှာအံ့သြဝမ်းသာဖြစ်သွားမိသည်။

"ချန်ပေ့၊ ခင်ဗျားနိုးလာပြီလား။"

ပုတီးစေ့ဝိညာဥ်ကအေးစက်စက်နှာမှုတ်ကာ အသံကနောက်ဆုံးတွင်ပြန်ပေါ်လာခဲ့သည်။

"မင်းလုပ်တာနှေးသွားတာမင်းအမှားပဲ။ မင်းလက်ထဲမှာရှိတာကိုတောင်မထိန်းသိမ်းနိုင်တော့ ဒီပုတီးစေ့ကပျက်စီးပြီးရင်းပျက်စီးနေတာ! မင်းအဲ့ဒီ့အချိန်တုန်းကပုတီးစေ့အက်ရာကိုသွေးနဲ့အချိန်မီပြန်ပြင်ပြီးတော့ နောက်ပွဲစဥ်နှစ်ခုမှာကောင်းကောင်းလုပ်ခဲ့တာမို့ ငါအသိစိတ်ပြန်ရလာနိုင်တာ။"