Эцэг бурхан хэмжээлшгүйгээр хилэгнэн цамнана.

-Жуи..Тэр муу жижигхэн чөтгөрийг аль эрт л үгүй хийх ёстой байсан юм! И Донхэ, би чамд Жуиг Люсиферт өргөл болгож өг гэсэн болохоос түүний амраг болгоодох гээгүй шүү. Тэр 2 нийлнэ гэдэг хүн төрөлхтөнд ямар их гай удахыг төсөөлж байна уу?

Донхэ эцэг бурхны өмнө толгой гудайлган зогсох агаад тэрээр "Үхлийн бурхныг Люсифертэй хэрхэн завхайрсан тухай" ховлосон нь энэ байлаа.

-Та болгоовол ахин нэг зүрхлэн айлдах зүйл байна. Люсифер хэдийгээр Жуиг өргөл болгон хүлээж аваагүй ч Жуи үхлийн бурхны үүргээ умартаж 1сарын хугацаа өнгөрчихөөд байхад Люсиферийг хөнөөх даалгавраа гүйцэлдүүлж чадсангүй. Энэ нь түүнийг Люсифертэй үгсэн хуйвилдаж таниас урвасныг батласан хэрэг бус уу?

Эцэг бурхан сахлаа имрэн удаанаар толгой дохиж "Тийм шүү, тэр бурхан миний даалгаврыг үл тоосон гэм буруутай" гэснээ хамгаалагчид руугаа зангаж "Явж үхлийн бурхан Жуиг олж ир. Үд дунд гэхэд тэр нүгэлт эмэгчинг бурхдын шүүхээр шүүх болно" хэмээн өндөр дуугаар айлдлаа.

Донхэ санасандаа хүрсэн мэт сэтгэл хангалуун жуумалзаад "Эцэг бурхны хэмжээлшгүй хайр ивээлийг үл тоосон тэр нүгэлт эмд эрх мэдэл гэдэг хэтийдсэн зүйл мэт санагдах юм. Жуиг өөрийн гэсэн сүнсний хот босгосныг та гадарлах л байлгүй. Би таны тушаалаар 3000 жил түүний дэргэд зүтгэсэн хүний хувьд үнэнийг өчвөөс Жуи бол бурхдын шүүхээр шийтгүүлээд ч цайршгүй гэм нүгэлтэй хүн. Тэр өөрийн хотдоо бурхан мэт хүндлэгдэн шүтэгддэг ба хөөрхийлөлтэй сүнснүүдэд тэрслүү үзэл суулгадаг. Нэг л өдөр тэр ч бас хэрээ мэдэхгүй Люсифер шиг аашлан таны суудалд шунах вий гэж айх юм. Би л хувьдаа таны оронд байсан бол ихэрхүү эмийг суудлаас нь буулгаж оршихуйг нь үгүй хийн хэт даврагчдад сануулга өгөх байлаа" гэх нь тэр.

Эцэг бурхан ч суудлаасаа өндөлзөн "Донхэ, чиний хэлдэг түмэн зөв. Жуи үхлийн бурхны албыг 3000 жил залгуулчихаад өдийг хүртэл зөвхөн өөрийгөө л арчилж тордсон. Түүнд бурхан нэр зүүх гавъяа байхгүй" хэмээн дуугаа өндөрсгөв.

-Би таны үнэнч албатын хувьд шинэ үхлийн бурханд нэгэн бүсгүйг нэр дэвшүүлмээр байна. Гоо үзэсгэлэн ба хайр дурлалын бурхан Афродит болон дайны бурхан Аресаас төрсөн цөлөгдсөн сахиусан тэнгэр Аирин бол энэ албанд гойд нийцэх нэгэн билээ. Хэдийгээр тэр бяцхан үл ойлголцлоос үүдэн далавчаа тасдуулан хөөгдсөн ч гэлээ, тэр бол бурхдын үр удам. Чигч үнэнийг эрхэмлэгч ёс журамтай бүсгүй. Тиймээс үхлийн бурхны орыг залгуулах хамгийн боломжит хувилбар гэж мөхөс би мэргэн оюундаа тунгааж байна

Эцэг бурхан энэхүү зусардсан үгсийг сонсмогцоо сандлынхаа түшлэгийг цохин босож "Бид маргааш их цааз үйлдэх болно. Мөн баяр тэмдэглэцгээнэ. Одоогийн үхлийн бурхан болох ичгүүргүй нүгэлт эм Жуин оршихуйг таслаж түүний орыг залгуулах бурхдын үр сад Аиринд зориулж найрлацгаана! Бүгд бэлдэцгээ. Бүгд баясацгаа. Бид маргааш шинэ бурхныг ширээнд нь зална!" хэмээн хашгирлаа.

Бурхныг хүрээлэн байх олон мянган албат нь дор дороо дэвслэн хашгирцгааж хэнгэрэг дэлдэцгээх бол ганц Донхэ л инээдээ нууж ядан уруулаа хэмлэнэ.

-Муу зөнөг өвгөн..урхинд уначих шив

...

Дэлхий, Тэргэл сартай шөнө

Хөшигний завсраар тусах тэргэл сарны туяа доош харан хэвтэх залуугийн нуруун дээр тусахдаа нүд хальтрам сорвийг нь тодотгоно.

Жуи Жэвоны сорвин дээгүүр хурууныхаа өндгөөр хүрж ядан суух зуур залуу эр хөнгөн инээд алдаад "Зүгээр л сорви шүү дээ, одоо өвдөхгүй" гэхэд бүсгүй доош тонгойн өнөөх аймшигт сорвийг энхрийлэн үнслээ.

Жаалхан охин өөрийн эрхгүй "Их өвдсөн байх даа" хэмээн бувтнахад залуу эр гэмгүй инээмсэглэл тодруулан "Өвдсөн ч гэсэн энэний ачаар л чи минь энд байна шүү дээ. Надад одоо харамсах зүйл байхгүй" хэмээн эрсхэн хэлэв.

Энэ шөнө газар доорх ертөнцийнхөн эзнийхээ зааврыг хүлээн аугаа сүйрэлд бэлтгэх бол тэнгэрийн орныхон үхлийн бурхны их цаазад бэлтгэн найрын ширээ засаж байлаа.

...

Үүр хаяарч эхлэмэгц Жэвон суниасаар өндийж хүзүүгээ гилжийлгэн дугаргаад "Цаг нь ирлээ" хэмээн эрсхэн хэлэв. Жуи ч нэг санаа алдаад нүгэлгүй ирт хадуураа атгасаар өөрийг нь гадаа хүлээх Саныг зорилоо.

Тэрбээр Жэвоны Санд өгсөн амлалтын төлөө түүний хамтлагийн гишүүдийг галав юүлэхээс өмнө сүнсний хотод түрхэн орогнуулахаар тохирсон билээ. Хэрэв галав юүлэх аваас хүн төрөлхтний мөхөл айлчлаад зогсохгүй тэдний махан биеэс гадна сүнс нь хүртэл үгүйрэх тул бүсгүйн байгуулсан хот олны хөлд дарагдана гэх айдасгүй аж.

Жаалхан охин хаалгаар гарахынхаа өмнө гэнэтхэн эргэн харж найдвар тээсэн хоолойгоор "Орой сүнсний хотод уулзацгаая" хэмээн шивэгнэхэд Жэвон хэдхэн том алхаад Жуитай нүүрэлдэв.

-Заавал амьд гараарай

Хөвгүүн учир битүүлгээр ийн шивнэчихээд Жуин уруул дээр зөөлөн үнслээ.

...

Сүнсний хот.

Жуи асар их энергээ үрэн байж Саны хамтлагийн сүүлийн гишүүнийг хаалгаар оруулж ирмэгцээ өөрийн эрхгүй өвдөг сөхөрлөө. Түүний авчирсан хөвгүүд өвсөн дунд ухаангүй хэвтэх агаад Сан тэднийг ирсэн дарааллаар нь хэвтүүлээд тус бүрийнх нь уруул дээр үнсэх аж.

Эгэл хүний бие үхэгсдийн ертөнцөд удаан тэсэхгүй тул Сан өөрийн сүнсээ 8 хувааж тэдэнтэй хуваалцаж буй нь энэ. Залуу эр тэдгээр хөвгүүдэд сүнсээ тасалж өгөх бүрт түүний хүн дүрст бие тэсвэрлэшгүй өвдөлтийг мэдрэх ба тэр бүрийд Сан ухаан алдаж аль эсвэл хатсан өвсөн дээгүүр өнхрөн уруулаа хазлан уйлахгүйг хичээнэ.

-Чой Сан..чи бол миний харсан хамгийн азгүй чөтгөр. Хүмүүст дурлаж л байдаг..

Жуи ийн бувтнаад нүгэлгүй ирт хадуураа түшсээр арайхийн өндийхөд Сан өөрийгөө дооглон хөхөрлөө. Залуу эр бүх энергиэ шавхнаас болж түүний хүн төрх үгүй болж оронд нь сарьсан далавчтай , сульдсан аварга биет өвсөн дээр тэрийн хэвтэх аж.

-Жуи минь дээ, Жуи минь.. Хайр гэдэг чинь ийм л байдаг юм байна. Хүйтэн сэтгэлтэй чөтгөрийг хүртэл хүний төлөө амиа өргөхөөр хэмжээнд сохолчихдог юм байна

Бүсгүй бүдчин алхсаар амьсгаадан хэвтэх аварга биетийн дэргэд ирснээ хадуураараа гарынхаа шууг зүсчих нь тэр.

-Уу. Энэ хүртэл ирчихээд өөрөө үхчихэж болохгүй биздээ? Хөвгүүд чинь удахгүй сэрнэ. Тэднийг айлгах гээгүй л юм бол миний цусыг ууж тэнхрээд эргээд хүн төрхөндөө ор

Залуу эр эхэндээ нэрэлхэн толгойгоо сэгсэрсэн ч нүүрэн дээр нь дуслах цусны үнэрээс болж тэвчээр алдран бүсгүйн шуунд соёогоо шигтгэсэн даруйдаа аажмаар хүн төрх рүүгээ хувирч эхэллээ.

Жуи хөл дор нь сөхрөн цусыг нь сорох хүүгийн үсийг аргадангуй илбэж "Люсиферийг халамжилдаг байсан болохоор чинь л ингэж сайн хандаж байгаа юм шүү. Хэрвээ..би эргэж ирэхгүй бол түүнийг сайн асрах хэрэгтэй шүү, за юу" гэснээ агаарт сарничих нь тэр.

...

Тэнгэрийн орон.

Бурхдын цугладаг гол танхимд Жуи хадуураа гартаа атгасан чигтээ орж ирэхэд хуягтай хамгаалагчид түүнийг дайсагнаж байна гэж үзсэн бололтой, жадныхаа үзүүрийг бүсгүй рүү чиглүүлэн "Зэвсгээ буулга!" хэмээн хашгирсаар түүнийг бүсэлж орхилоо.

Жаалхан охин эрүүгээ өргөн дээд суудалд залрах эцэг бурхан руу зэвүүцэнгүй ширтсээр хадуураа доош буулгана. Тэгснээ гараа дагзныхаа харалдаа өргөн өөрийгөө аюулгүй гэдгийг батлах гэж хичээв.

-Эцэг минь, би танд төрсөн цагаасаа хойш үнэнчээр зүтгэсэн билээ. Гэтэл би өнөөдөр өөрийн хотдоо айлчлахдаа нэгэн аймшигтай мэдээ дууллаа. Та юунд намайг ор үндэсгүйгээр урвагч хэмээн сэжиглэв? Би юу буруу хийсэн юм бэ!

Бүсгүй чадлынхаа хэрээр ийн орилоход эцэг бурхан хөмсөг зангидаж "Дуу чи!" гэснээ хоолойгоо засаад "Чи л болоод юу буруу хийснээ мэдэхгүй байв гэж. Муу бузар эм. Яаж ичгүүргүйгээр дорд чөтгөр Люсифертэй завхайрчихаад бохир хөлөөрөө миний ордонд хөл тавьж зүрхэлж байна аа. Бурхдын түүхэд чам шиг нүгэлт эм урьд хожид байсангүй" хэмээн зандарлаа.

-Дорд чөтгөр? Люсифер бол таны хүү шүү дээ. Төрсөн хүүгээ зэрэмдэглэсэндээ гэмшихгүй байж болох ч хэдийн 3000 жил өнгөрчихөөд байхад одоо хүртэл өс санана гэдэг байж болох уу! Та ийм байж яаж өөрийгөө энэрэнгүй бурхан гэж нэрлэж чадаж байна аа!

Хөгшин эрд дээрэнгүй бүсгүйн үг хэтэрхий хүнд тусчих шиг, тэрбээр сахлаа имэрсэн чигтээ сандлынхаа түшлэгийг наллаа.

-Тэр миний хүү гэдэг нь үнэн ч түүний үйлдсэн гэм уучлашгүй. Үхлийн бурхан Жуи, бид чамайг чөтгөртэй нөхцсөний чинь төлөө цаазын ял төлөвлөж байсан ч энэ үнэн сэтгэлийн чинь төлөө амь хэлтрүүлж болох юм. Хэл дээ, би чамайг амьд үлдээвэл чи Люсиферийг ахин тамаас гарж ирэхээргүй болтол нь ятгаж чадах уу?

Жаалхан охин бодлогшрон харц буруулахдаа гэнэтхэн хэмжээлшгүй их өвдөлтийн дор дуу алдан бохирлоо.

Олон жил эрдэнэ мэт хайрлаж ирсэн нүгэлгүй ирт хадуур нь хэвлийг нь нэвт сүлбэжээ. Харин хадуурын бариулаас Донхэ атгах аж.

Жаалхан охины гоёмсог даашинз улаан өнгөөр будагдаж амнаас нь шүлс цус зэрэг савиран гоожино.

Жуи цустай гараараа Донхэгийн мөрийг атган арайхийн хөл дээрээ тогтож нулимстай нүдээрээ түүнийг ээрвэл өнөөх нь урдаас нь хачин жигтэй инээмсэглэл тодрууллаа.

-Уучил, Жуи. Гэхдээ чи л үхчихвэл бүх зүйл эргээд байрандаа орно

Донхэ ийн шивнээд хэвлийг нь нэвт сүлбэсэн хадуурыг татаж гаргамагцаа жаалхан охиныг хариу хэлж амжхаас нь өмнө хоолойг нь хэрчиж орхилоо.

-Эцэг минь! Энэ шулам найрамдахаар бус Люсиферд таны сэнтийг ганхуулах боломж олгохоор ирж. Яг одоо газар доорх ертөнцийнхөн дэлхий рүү довтолж байна. Аймшиггүйгээр таныг сатааруулж эрхэмлэн хайрладаг хүн төрөлтнийг тань устгах гэсэн золгүй Люсиферийн голыг таслахтун!