Орчлон ертөнц үүсэхээс ч өмнө бурхад цаг хугацааны эргүүлгийн гадна орших өөрсдийн ертөнцдөө амар амгалан энх тунх амьдран суудаг байж гэнэ.

Гэтэл хумхын тоос цугларсаар дэлхий нэртэй гарагийг бүтээж түүн дээр нь амьдрал цэцэглэсээр улмаар хүн төрөлхтөн гэгч бий болжээ.

Эцэг бурхан бүхий л оршихуйн эмх цэгцийн төлөө өөрийн хөвгүүддээ үүрэг хуваарилсан ч отгон хүү Люсифер нь бурхны байр суурийг хүсэх нь тэр. Сахиусан тэнгэрүүдийн тэн хагас нь Люсиферийг дэмжин төдөлгүй тэнгэрийн орон үймээн самуунд автлаа.

Хилэгнэсэн эцэг бурхан шуналд толгойгоо мэдүүлсэн хүүгээ шийтгэхээр ертөнцийн төгсгөлд там гэгчийг бүтээж "Чи бурхан болохыг хүссэн, тиймээс энэ цаг мөчөөс эхлэн мөнхийн галд шатах доод ертөнцөд очиж нүгэлт сүнснүүдийг шийтгэхтүн" хэмээн зарлигдаад Люсиферийн нандигнан хайрладаг 6 далавчийг өөрийн гараар тас цавчив.

Тэнгэрийн орноос үүрд цөлөгдсөн хүү доод ертөнц рүү унахад түүний өшөө хорсол нь шархалсан нуруун дээр нь бэхжиж урьд өмнө нь огт үзэгдэж харагдаагүй тас хар сарьсан далавч болгон ургах нь тэр.

Үүнийг ажигласан эцэг бурхан ихэд цэрвэн сэжиглэж Люсиферийн талд орсон сахиусан тэнгэрүүдийг үй олноор нь хороогоод тэрхүү яргаллаас нь амьд мултарсан сахиусан тэнгэрүүдийн далавчийг тасдаж хүүгийнхээ араас доод ертөнц рүү цөлж гэнэ.

Гэтэл.

Үймээнээс үүдэж сүйтсэн сахиусан тэнгэрүүдийн тосгонд байрладаг үхлийн үнэр нэвчсэн ойн дунд урсах цусан голоос нярай хүүхдийн уйлах дуу хадах нь тэр.

Тэнгэрийн оронд анх удаагаа час улаан нүдтэй далавчгүй хүүхэд төржээ. Хачирхалтай нь хүүхдэд эцэг эх байсангүй. Нярай гомдол цөхрөл, өвчин зовлон , өшөө хорсол, хагацал гунигийн дундаас бий болж хүн мэт сул дорой ч бурхан адил мөнхийн амьтай байхаар заяагдсан байлаа.

Эцэг бурхан нүглээс төрсөн хүүхдийг хэрхэхээ мэдсэнгүй. Тэгээд тэнгэрийн орныхон 20 жил зөвлөлдөв.

Эцэст нь эцэг бурхан өндөр дуугаар зарлигдлаа.

- Нүглээс төрсөн хүүхдэд "Жуи" хэмээх нэр хайрлаж байна. Түүнийг үхлийн бурханд өргөмжилж эрлэгийн элчүүдийг удирдуулагтун. Тэр хүн төрөлхтний дунд амьдарч тэдний нүглийг дэнслэг. Бузар муу нүгэлтний сүнсийг доод ертөнцөд тушааж Люсиферийн хоол болгоно, харин ачит нэгний сүнсийг дараагийн амьдралд нь замчилна. Жуи 1000 жилд нэг удаа өөрийн биеэр оноогдсон нэгэнтэй хамтран амьдарж амьдралын үнэ цэнийг мэдэрж байг. Түүнийг яг одоо дэлхий рүү явуул. Тэр одооноос үхлийн төлөөлөгч мөн өмч нь.

...

Эргэн тойрон манангаар хучигдсан мөнхийн бүүдгэр хотын төвд орших гантиг чулуун барилгын шатаар нэгэн залуу гартаа бялуу барьсаар хамгийн дээд давхар луу өгсөнө.

Түүнтэй таарсан үйлчлэгчид их л нухацтайгаар "Авхай одоохондоо сэрээгүй байгаа, сэртэл нь хүлээхгүй бол танд аюултай. Ойрд их олон осол тохиож хотод шинэ сүнснүүд ихээр ирэх болсон тул авхай үнэхээр бухимдалтай харагдсан. Тиймээс нойрыг нь тасалдуулаад хэрэггүй л болов уу, бид бүгд авхайг нойрондоо харам гэдгийг мэднэ шүүдээ" хэмээн шивэгнэх аж.

Гэсэн ч залуу тэдний үгийг чихнийхээ хажуугаар өнгөрөөгөөд дээд давхрын гол танхимын хаалгыг сэвхийтэл онгойлголоо.

-Жуи! Өнөөдөр их чухал өдөр байхад одоо хүртэл унтсаар байгаад чинь итгэхгүй нь ээ. Өчигдөр шөнө хүний ертөнцөд онгоцны осол гараад ахиад 300 гаруй сүнс ирчихээд байна, тэднийг бүртгэлжүүлж байх ёстой газар луу нь явуулахгүй бол хотод газар гишгэх зай алга. Эрлэгийн элч нар шөнөжин тэр сүнснүүдийг цуглуулах гэж үйлээ үзсэн болохоор тэдэнд ч гэсэн урамшуулал олгох хэрэгтэй байна.

10 хүн багтахаар том орон дээр ганцаар хэвтэх бүсгүй дуртай дургүй өндийн "хараал идсэн хүний ертөнцийнхөн" хэмээн бувтнаад ширээн дээрээс хундагатай өтгөн улаан шингэн уумагцаа сая л сэргэв үү гэлтэй хувцаслаж эхэллээ.

Там диваажингаас ч ангид газар оршихуй, эс оршихуйн яг голд зах хязгаар нь үл мэдэгдэх сүнсний хот бий. Гэнэтийн осол , өвчин зэрэг жам бус үхлээр үхсэн гомдолтой сүнснүүд энэхүү хотод хүргэгдэх агаад тэдний хувь заяаг хэрхэхийг гагцхүү хотын бүтээгч эзэн болох үхлийн цор ганц төлөөлөгч нүглээс төрсөн хүүхэд Жуи шийдэх аж.

Ямар ч махбодийн сүнсийг тас цавчих чадалтай нүгэлгүй ирт хадуур бүсгүйн эрхшээлд байх ба хэрвээ Жуи хэн нэгний сүнсийг шинжиж үзээд хийсэн нүгэл нь хязгаарыг давсан гэж үзвэл тэрхүү нүгэлт сүнсийг өршөөлгүйгээр хэдэн хэсэг цавчиж доод ертөнц рүү илгээнэ..

Бүсгүй хувцаслаж дуусаад эргэн тойрноо ажсанаа залуугийн авчирсан бялуу руу хяламхийж "Юун хачин юм чирээд авчирчихсан юм?" гэхэд залуу эр инээд алдан "Хачин юм биш чиний төрсөн өдрийн бялуу. Мартчихаа юу, өнөөдөр чиний төрсөн өдөр шүүдээ" хэмээв.

-Бурхан минь гэж, И Дон Хэ..чи бол миний харсан энэ зууны хамгийн мэдрэмжгүй эрлэгийн элч. Ямар эмэгтэй 3000 нас хүрж байгаадаа баярлах юм бэ?

-Ингэж хатуурхах хэрэггүй дээ, бидний ертөнцөд бол 3000 бол цэл залуу авхайн нас шүүдээ. Бас өглөөг битгий өтгөрсөн цусаар эхлүүлээд бай, биед чинь муу. Хэрэгтэй бол би чамд өглөө болгон хүний ертөнцөөс шинэ цус авчирж өгье.

Жуи толгой дохиод орчныг ажиглахаар тагтруу гарахад залуу түүнийг дагалдав.

Хөндлөнгийн хүн харвал энэ газар энгийн л нэг хот. Хүмүүс амьд байсан үеийнхээ ажил мэргэжлийг хийж мөнгөн дэвсгэрт хүртэл ашиглана гээч. Сүнснүүд гомдлоо тайлагдтал..өөрөөр хэлвэл үхэлтэйгээ эвлэртлээ энд аж төрдөг. Тэгээд бэлэн болсон үедээ дараагийн амьдрал руугаа явна.

Жуи хэдийгээр сүнснүүдийг дараагийн амьдралд нь хөтөлдөг ч нүгэлгүй ирт хадуураар шийтгэгдсэн бусармаг этгээдүүд яг хаачдагийг ер мэдэхгүй. Эртний түүхээс үзвэл тэд шууд доод ертөнц рүү унаж мөнхийн галд шатан Люсиферийн хоол болдог гэдэг ч бүсгүй одоог хүртэл доод ертөнцийн тухай домог төдийхнийг сонсож байснаас өөрийн нүдээр үзсэн зүйлгүй аж.

Зарим шөнө тэр танил бус залуу эрийн хоолойг сонсдог "Жуи..Жуи..чи бидний нэг шүүдээ. Чи үхлийн зарц биш, дээд түвшний чөтгөр. Жуи..тэнгэрийн орны тушаалыг дагах хэрэггүй. Доод ертөнцдөө эргээд ир" гээд л.

Харин зарим шөнө зүүд зүүдлэнэ. Царай нь харагдахгүй сарьсан далавчтай залуугийн дэргэд зогсох цусан улаан нүдтэй өөрийгөө хардаг.

Бүсгүй анх төрөхдөө час улаан нүдтэй байснаа мэддэг ч тэнгэрийн орныхон хүч хавсран шившлэг хийж чөтгөрийн хүч давамгайлсан нүдийг нь тамгалж орхисон гэдэг.

Хэсэг хугацааны дараа Донхэ бүсгүйн бодлогшролыг тасалдуулан чангаар хоолойгоо заслаа.

-Тэнгэрийн орноос тушаал ирсэн. 1000 жил тутамд гүйцэтгэх ёстой даалгавар чинь..Жуи, чи өнөөдрөөс эхэлж нэг сарын турш хүний ертөнцөд оноогдсон нэгэнтэй хамтран амьдарна. Хамтран амьдрагчийн чинь үхэл хэдийн төлөвлөгдсөн.

-Хэдийн төлөвлөгдсөн? Өмнөх даалгаврууд дээр би тэдэнтэй хамт амьдраад эцэст нь дурсамжийг нь арчихад л хангалттай байсан шүүдээ. Тэгээд ч үхэл төлөвлөнө гэдэг боломжгүй зүйл. Бид хэнийг хэзээ үхэхийг шийдэж чадахгүй.

Жуи хөмсөг зангидан хариулт нэхэх мэт залуу руу цоргитол ширтэнэ.