2018.12 сар, JYP entertainment

Зул сарын баяр дөхчихсөнийг ч хэлэх үү, алдартнууд шинэ жилийн баярт зориулсан тоглолтдоо бэлдээд тун чиг завгүй. Арын ажилчид ч нойр хоолоо хасан гүйлдэж энэ их ажлаас бэлтгэгдэгчид хүртэл бултаж чадалгүй тоглолтын арын бүжигчнээр сонгогджээ.

Өглөө 6 цагаас эхэлсэн бүжгийн бэлтгэл үд дунд өнгөрөхөд ч завсарласангүй. Өглөөнөөс хойш тасралтгүй хөдөлсөөр хөлсөндөө нэвт норсон жаалхан охин гэнэтхэн зөвшөөрөл ч асуулгүй угаалгын өрөө лүү гүйлээ.

Рюжин сөгдөж суугаад суултуур түшин хий огиулан ханиалгасаар арайхийн хөл дээрээ эргэн тогтохдоо тосгуур луу бүдчин алхаж эцэст нь хүйтэн усаар нүүрээ шавшив.

Өглөөний цай уугаагүй ирсэн болохоор ингээд байгаа юм байхдаа? Галзуурах нь ээ, ядаж ус уух ч амралт өгөхгүй юм. Би яагаад ингэж сульдаад байна аа..Ахх, тамхи..тамхи татахаа болих хэрэгтэй.

Жаалхан охин хана налан өөртэйгөө ярингаа амьсгалаа тогтворжуулахаар хичээх зуур найдлага тавин утсаа шалгасан ч хүлээж байсан зурвас одоо хүртэл ирээгүй нь хачин.

Жимин сар хагасын өмнө Америк руу үйл ажиллагаанд оролцохоор явсан ч өдөр ирэх тутам Рюжины зурваст хариулах нь цөөрсөөр байгаа билээ. Залуу эр хичнээн завгүй байсан ч цагийн зөрүүг ч үл хайхран шөнө бүр бүсгүйд юу хийсэн талаараа, өдөр ямархуу өнгөрсөн тухайд уртаас урт зурвас үлдээдэгсэн.

Гэтэл ахиад л алга. Бүтэн 3 хоног өнгөрчихөөд байхад хариу алга.

Бүсгүйн бодлыг тасалдуулан угаалгын өрөөнд энтертайментэд 2,3 сарын өмнө шинээр орж ирсэн эгчмэд бэлтгэгдэгч эмэгтэй орж ирснээ мэндийн зөрөөгүй "Юу вэ? Чамайг хүмүүс удахгүй дебют хийнэ гэж цуураад байхаар нь тийм сайн юм байхдаа гэтэл ганц өдрийн бэлтгэл даахааргүй амьтан юм шивдээ. Азтай юм аа, Пак Жимины амраг болохоор нэг их зовоод байхгүй шууд мөрөөдөлдөө хүрчихнэ." гэх нь тэр.

-Амаа мэдээрэй. Чи хэдхэн сарын өмнө бэлтгэгдэгч болчихоод юу мэддэг гэж миний тухай дураараа чалчаад байгаа юм?

Хорон үгтэй эмэгтэй Рюжин рүү нэг хялалзчихаад будгаа сэргээхээр толь руу дөхлөө.

-Надруу асаж байхаар найз залуудаа анхаарвал яасан юм? Ингэхэд чи зүгээр л Жимины зугаа юм биш үү? Тэр найз охинтой байсан бол шөнө бүр модел эмэгтэйчүүдтэй зугаацахгүй л болов уу.

Жаалхан охин хөмсөг зангидан уруулаа будаж байсан эмэгтэйг хана руу түлхэв.

-Чи ер нь юу ярьж байгаагаа мэдэж байна уу? Худал үгэнд ч бас хариуцлага хүлээлгэж болдог юм!

-Шин Рюжин, энд ганц юу ярьж байгаагаа мэдэхгүй байгаа хүн нь чи л байна. Амтай болгон нь л Жиминтэй шөнийг өнгөрүүлсэн америк охидын тухай ярьж байхад чи одоо хүртэл юу ч мэдээгүй юм шивдээ. Юу гээч? эрчүүдтэй зугаацаж хялбар аргаар амьдарч байгаа юм бол ядаж бусдад битгий төвөг удаад бай за юу. Чамайг зөвшөөрөлгүй гарснаас болж бусад бэлтгэгдэгч нар шийтгүүлж байхад чи энд амраад л. Хий огиулж байгааг чинь сонссон..Жирэмсэн болчихоогүй л гэж найдъя, бяцхан өлөгчин минь.

Эгчмэд бүсгүй Рюжиныг мөрлөн гарахад жаалхан охин хэсэг тээнэгэлзэж зогссоноо ум хумгүй дээд давхрын булангийн студи руу гүйлээ.

Хонгилд зөрсөн болгон юунд ч юм бэ тэвдэн гүйх алдартай бэлтгэгдэгч охин руу гайхшран ширтэнэ.

Яагаад ийм үед хүртэл чи л толгойд минь орж ирдэг юм бол? Яагаад миний зугтах зүг, тэмүүлэх цэг үргэлж чи байдаг юм бол?

Хаалга онгойх дуунаар анхаарал нь сарнисан залуу өөрлүү нь ирнэ гэж огтхон ч төсөөлөөгүй танил төрхийг танимагцаа үл ялиг балмагдсан ч түүнийгээ нуун тайвнаар нүүр будагч, стилистүүдээ өрөөнөөс нь гарахыг эелдгээр гуйлаа.

Югём рекламны зураг авалтаа дуусгачихаад студидээ түр амрах зуураа тайзны будалтаа сэргээлгэж байсан нь энэ.

Зүүд нойрондоо л учирдаг хайртай эмэгтэйнх нь нүдэнд нулимс хуржээ.

Залуу эр Рюжины хацрыг илбээд юу ч асуулгүйгээр уйлж дуустал нь халуун энгэртээ наан тэвэрж алгуурхнаар нурууг нь илбэн аргадна.

-Югёмаа, гэнэт ирчихээд ийм зүйл гуйж байгаад уучлаарай. Гэхдээ бэлтгэгдэгчдийг зул сарын тоглолт болтол энтертайментаас гарахыг хориглочихсон..Надад чиний тусламж хэрэгтэй байна.

-Юу юм? зүгээр хэл, би чиний төлөө юу ч байсан хийж өгнө.

Цэлмэг тэнгэрээс цас хаялна. Өвлийн анхны цас очиж очиж энэ өдөр орох гэж.. Ямар их догдолж хүлээсэн билээ дээ, ямар олон төлөвлөгөө зохиосон билээ дээ.

Бүсгүй гүнзгий амьсгаа аван залуутай харц тулгарахдаа ахиад л уйлчих гээд байгаагаа анзаарав.

-Надад жирэмсний тест хэрэгтэй байна.

Хэдхэн хормын дотор залуугийн царайнд ямар олон сэтгэл хөдлөл ажиглагдсаныг дурдах нь зүйтэй. Баярласан, бухимдсан, гайхширсан, гунигласан.. Түүний хувьд цаг хугацаа зогсчихсон гэхэд ч хилсдэхгүй нь.

-Ойлголоо. Би 5 минутаас хэтрэхгүй хүрээд ирэх болохоор энд суугаад хүлээж бай.

...

Хэсэг хугацааны дараа бүсгүй тестээ атгасаар студи доторх угаалгын өрөөнөөс гарж ирэхэд Югём амттан бэлдчихсэн хүлээж байлаа.

-Хариу..хариу нь юу гэж байна?

Залуу эр хэрэндээ л юу ч болоогүй мэтээр асуухыг хичээсэн ч хоолой нь өөрт нь захирагдалгүйгээр чичирхийлж орхих нь тэр.

-Мэдэхгүй ээ, заавар дээр нь 5 минут хүлээх ёстой гэчихсэн байсан.

Тэд хэсэг чимээгүй суусны дараа Югём бүсгүйн гараас атган "Үнэхээр хүүхэдтэй болчихсон байвал чи айдол болох боломжгүй болно. Цаашид яаж амьдрах бодолтой байна" гэхэд Рюжин дэмий л толгой сэгсэрлээ.

-Үнэнийг хэлэхэд хүүхэдтэй болсон байлаа ч эцэст нь тээж төрүүлсэн ч ..би эцэг нь Жимин үү эсвэл чи юу гэдгийг ч мэдэхгүй байна. Новш гэж, энэ зүгээр л миний ичгүүргүй аашилсны шийтгэл байх..Хамгийн инээдтэй нь юу гээч? Жимин гадаадад байхдаа нилээд олон бүсгүйчүүлтэй зугаацсан бололтой. Тэр одоо амжилтынхаа оргил дээр яваа алдартан, тийм байж хүүхэдтэй болсноо хүлээн зөвшөөрнө гэж үү? Үгүй л болов уу.

Югём толгой гудайлгаснаа төдөлгүй дорвитой шийдвэр гаргасан мэт зөөлнөөр мишээв.

-Хэрвээ..жирэмсэн болчихсон байвал, тэгээд чи төрүүлнэ гэж шийдвэл би алдартан байхаа болиод хариуцлагаа хүлээх болно. Жимины хүүхэд байсан ч хамаагүй, би хариуцлага хүлээе.. Чамайг хайрлаж чадаагүйд, тавьж явуулсандаа, байдлыг энэ хүртэл лавшруулсандаа би бүгдэд нь хариуцлага хүлээмээр байна. Намайг уучлаарай.

Түрүүхэн орж эхэлсэн цас одоо цонхны тавцан дээр хунгарлажээ.

Югём бүсгүйн уруул дээр зөөлнөөр үнсээд тэд догдлол мөн айдас дүүрэн сэтгэлээр тестийн хариуг шалгав.

Нэг зураас. Тодоос тод нэг зураас.

Бүсгүй санаа нь амарсан аятай буйдангийн түшлэг налахад залуу эр түүнд амттан дөхүүлэв.

-Асуудал хүндрээгүй нь сайн ч гэлээ, чи ойрын хугацаанд Жиминтэй ярилцсан нь дээр байх. Араар тавилтыг хүлээн зөвшөөрнө гэдэг амаргүй эд. Ялангуяа мэдсээр байж чимээгүй өнгөрнө гэдэг чамд л хэцүү болно гэсэн үг. Би чамд энтертайментаас гарах зөвшөөрөл олоод өгье.

Рюжин өрөвдөлтэй нь аргагүй инээд алдаад "Энтертайментаас гарлаа ч Солонгост байхгүй хүнийг хаанаас олж уулзах вэ дээ" гэхэд гэнэтхэн орчныг аниргүй бүчих нь тэр.

Бүсгүй гайхан Югём руу харахад залуу эр өөдөөс нь хөмсөг зангидан ширтэх аж.

Югёмын дотор ямар нэг этгээд уур хилэн буцлах агаад тэр нь бүсгүйгээс бус хамгийн сайн найзаасаа болсон бухимдал ажгуу.