Сандалд хүлээстэй суухад гунигтай тал байгаа л даа. Би үргэлж юм бүхнээс эерэг сайхан тал олж харахыг хичээдэг ч энэ удаад бол үүнээс хэчнээн хичээгээд гялбаатай тал нь үл үзэгдэнэ. Магадгүй хэвийн амьдардаг байсан би сандалд хүлүүлснээрээ туршлага сууж байна. Тийм ээ, туршлага, мөн хөлийнхөө хажууд буудуулах, буу тулгуулах саяын хэд хоногт бүр нэг удаа үхээд ч үзлээ. Ингэж бодсоор, одоо бодит байдалдаа эргэн ирэв.

Шаргал үст Лисагаас ч илүү шулганаж, Жэнни болон Лисаг элдэв үгээр идээд сандал дээрээ тохитой суух хэдий ч, бараг үхэх гэж байгаа юм шиг чарлаад байсан тул тэд арга ядаад түүний аманд скотч наав. Энэ нь ногоон өнгийн, хуулрахдаа уруул их өвтгөдөг мөн миний мэдэх ихэнх сериалууд дээр гардаг үзэн ядмаар скотч. Жэнни өөрийн буугаа өвөр дээрээ тавиад алчуураар арчина. Шаргал үст скотчны цаанаас баахан чарласаар эцэст нь нам гүн боллоо. Жэнни бууныхаа хошууг нь арчаад шаргал үст рүү эргэн,

- Түүнд ойлгомжтой байх үүднээс бүхнийг ярьж ойлгуулсан дээр байх гэж хэллээ.

Тэгээд харцаа Лиса руу толгойгоо гилжийлгээд, үүгээрээ чиний ээлж гэж хэлж буй аж. Лиса Стелла Марис болон бид хоёрын хоорондох, түүний хүлээстэй байсан сандлыг өөр лүүгээ татаад, хүзүүгээ нэг дуугарган,

- Эхлээд бид чиний талаар хэр дэлгэрэнгүй мэдэхийг чамд хэлье. Зарим нь би өөрийн таамаглалаараа бодож олсон юм. Ѳмнѳд Солонгосчуудын гурван жилийн ѳмнѳ "Эйсзэл" хэмээх цөмийн зэвсгийн талаарх тѳсѳл энд явагдаж байсан. Хүний биед хор хѳнѳѳлтэй хийнүүдийг судалж, үүгээр химийн элдэв төрлийн хор болон эм, өвчлөл зохионо. Засгийн газраас нууц дэмжлэгтэйгээр явагдаж байсан энэ төслийн багийнхнаас буюу энэ газраас гэнэт л холбоо тасарснаас эцэс болсон. Хайгуул хийхээр ийшээ нэвтэрсэн зургаан хүн эргэж гарч ирээгүй, дроноор шалгатал энд буй бүх хүмүүс үхсэн байсан. Энэ үйл явдал яагаад болсон талаар мэдээлэл хомс, гэхдээ өндөр зэрэглэлтэй ажилладаг байсан лабораториос хий алдагдсан гэдэг их хачин хэрэг. Мөн эндхийн агаарт дэгдсэн хий урьд хаа нэгтээ нээгдээгүй шинэ төрлийнх байсан. Засгийн газар энэ лабораторийг нэг мөсөн орхиж, удалгүй хэн ч тоохоо больсон. Тийм биз? Орхигдсон, өндөр зэрэглэлийн хөл хорио тогтоосон энэ газар чиний хувьд бол төгс нуувч бас оромж байж чадна. Мөн энэ төслийн хүрээнд ажиллаж байсан олон эрдэмтдийн нэгнийх нь туслахын нэр Мари гэх Ирланд хүн гэх статустай эмэгтэй чамайг байсныг олж мэдсэн. Чи ганцаараа амьд үлдсэн, хачин шүү? Одоо Стелла Марис гэх чиний ашигладаг нэр лүү руу оръё. Стелла Марис, хар тамхи, эм мѳн унтуулагч, үнэнийг хэлүүлэгч, мансууруулагч болон өвчний эдгэх хугацааг удаашруулах эм, хийг ѳндѳр үнээр Австралийн засгийн газарт худалддаг байсан гоц ухаантан. Гэхдээ ѳѳрийгѳѳ хэзээ ч илчлэхийг хүсээгүй. Учир нь тэр тухайн үедээ ердөө арван таван настай, гэхдээ тархины өндөр чадамжтай бяцхан охин байсан. Австралийн засгийн газартай үнэхээр нарийн холбоотой байж, байнгын худалдаа явуулдаг байсан. Урт хугацааны турш тэдэнд ажиллаж байгаад хамгийн сүүлд Австралийн загийн газар чамайг Африк луу явуулахыг хүссэн. Учир нь Австраличуудын далд хар засгийн газрын үйлдвэрлэлт, өртөг бага худалдаа, хар бор ажил гээд мөн хар тамхины үйлдвэрлэлтийг хариуцдаг байсан хэдэн улсад тахал тархсан. Урьд илэрч байгаагүй дархлаа хомстлын эсрэг вирус байсан тул чи их сонирхсон. Удалгүй ч энэ бүхний эсрэг зүйл зохиож, гэвч бүх нэр хүндийг Африкт хамт ажиллаж байсан гурван эрдэмтэн авсан. Үүнээс болоод чи хоёрыг нь хѳнѳѳж, нэгийг нь тахир дутуу болгоод гэнэт л алга болсон. Австраличууд чамайг хѳлѳѳ цуцтал эрээд, сүүлд нь тэд үхсэн гэж тэмдэглэсэн. Конго мѳрний хавцалд чиний цогцос байгааг харж, дулаан мэдрэгчээр шалгаж үзсэн, хүний хѳл хүрэх газаргүй газарт унасан гэсэн баримт Австралийн архивд байсан. Ямар ч эргэлзээгүй чи үхсэн гэж үзэгдсэн. Энэ үед чиний арван хоёр настай байхдаа Өмнөд Солонгос уруу илгээсэн нэг төсөл чинь эрдэмтдийн дунд авч үзэгдэж, мөн чиний төрөлх иргэншил чинь Солонгос байсан тул засгийн газар чиний талаар судалж байсан. Яг үүнтэй зэрэгцээд чи Солонгост Пак Чэёон гэх өөрийн төрсөн нэрээрээ ирж суурьшин, засгийн газраас хоёр удаа санхүүжилт хүсээд бүтэхгүй болохоор нь удалгүй усанд хаясан чулуу шиг л алга болсон. Учир нь тэр үед чамайг Стелла Марис гэж таниагүй, чиний төсөл дэх амьтад дээр хийж байсан харгис туршилтуудаас чинь болоод чамайг зүгээр л нэг галзуу амьтан байна гэж бодсон, мөн судласан ч чиний талаарх мэдээлэл олдоогүй. Хэрвээ чамайг яаж олж, энэ бүхнийг мэдсэн талаар асуух гэж байгаа бол л энэ энгийн хүний хувьд бол хэзээ ч боломжгүй ч, Жэнни эгчийн ажиглалтын чадвар болон миний таамаглал, зөн совин болон чадварууд төгс хосолж, энэ бүхнийг мэдсэн. Стелла Марис болон Пак Чэёон ба Ирланд Мари ч нэг хүн тийм биз? Ойролцоогоор гурван сарын өмнө Ким эрдэмтэн рүү чиний илгээсэн төслийн талаар засгийн газар мэдэж, чамайг амьд байж магадгүй гэж үзсэн. Чи ч үнэхээр баригдахад хэцүү, хаанаас ч хаана хүрч хүмүүсийг хуурч, ул мөрөө баллаж чаддаг. Ким Согжин эмчийг ч гэсэн Солонгосчууд анхааралдаа авсан байгаа.

Лиса огтхон ч түгдэрч гацсангүй, цэвэрхэн болон бүх зүйл ойлгомжтойгоор түүнд ярьж өгөөд, Жэнни рүү харцаа чулуудлаа. Харин би өнөөх хөвөн чихэр мэт үүлс дунд төөрч, бас Лисагийн хэлсэн үгсийг нэг бүрчлэн толгойдоо тогтоож, бас дунд нь хольж хутган байлаа. Хараад байхад Лиса болон Жэнни хоёрт шаргал үстийн цацсан хий тийм ч их сүртэй нөлөөлөөгүй юм шиг байна. Жэнни хоолойгоо бага зэрэг засаад санаа алдаад,

- Лиса хэлэхдээ чамайг өөрийгөө бусдаас тусгаарлаж, гаднах ертөнцөөс бараг л холбоо тасарсан гэж хэлсэн. Мөн зөрүүд, хувиа хичээсэн, ааш зан нь тогтворгүй. Тэр их газар хѳдлѳлт энэ лабораторид чичирхийлж мэдэгдэх ч сүртэй гэмтэл учруулахгүй гэж хэлсэн. Энэ газар бүрэн хамгаалалтад, сүйрлээс ангид байхуйц баригдсан хэдий ч би чамайг энэ бүхний дараа энэ торноос нэг ч цухуйхгүй гэдэгт итгээгүй.

Жэнни хэлж дуусаад баруун гараараа духаа бариад, доошоо шувтраад үргэлжлүүлэн,

- ...Газар хѳдлѳлт дэлхий даяар болсон. Зѳвхѳн хуурай, эх газрын хувьд гэхэд л нийт есѳн ялгаатай газар, гэхдээ нэг цэгт төвлөрсөн биш дэлхийн нийт хүрээнд тархмал байдлаар болсон. Олон улсын галт уул судлалын эрдэмтэд болон суурилуулсан багажуудаас огтхон ч энэ талаар мэдээлэл ирээгүй. Ердөө сүйрлээс хоёр минутын өмнө л долгион ирж, анхааруулахад хангалттай хугацаа хүрэлцээгүй юм. Жижиг, том олон галт уулс дэлбэрч үүнээс гарсан галт уулын үнс агаарт тогтож дэлхийн агаар мандлыг бүрхэж дэлхийд гурван ѳдѳр шѳнѳ болсон. Үнс нарыг хааж, үүний шалтгаанаас агаарын дундаж температур багасаж, ихэнх амьтад дасаж чадалгүй үхэж, одоо ч амьтдын тоо толгой багассаар байгаа. Мөн далайн төвшин нэмэгдэж, хиймэл дагуулаас авсан зургуудад зарим жижиг арлууд усанд автаж, хэд хэдэн төрөл зүйл устсан. Гэхдээ сүйрэл үүгээр дуусаагүй, энэ ердөө л байгалийн хүрээнд болсон гамшгийн өчүүхэн хэсэг. Гурван өдөр шөнө болж, засгийн газар, улсууд ямар ч арга хэмжээ авч чадаагүй байсан ба нар дэлхийг урьдынх шигээ ээж эхлэхэд дэлхий даяар үхдлүүд тархчихсан байсан юм. Япон улсын Хоккайдогоос энэ үхдэл болох вирус тархсан гэж үзэж байгаа. Гурван өдрийн харанхуйн турш хүн төрөлхтний дунд энэ вирус алгуурхнаар тарж, энэ нь цусаар үхдлээс хүн рүү халдварласаар дэлхий хүнд байдалд орчихсон байсан. Ази, Европ болон Хойд Америк, Африк гээд хаана ч ялгаагүй хүнд байдалд байна. Ийм учраас дэлхийн ѳнцѳг булан бүрээс нууцаар, хуль бусаар ажилладаг гоц ухаантнуудыг цуглуулах даалгаврууд авсан. Тэдний нь Пак Чэёон, чи.

Би хэдий бодлоороо тэнүүлчин хийж, манарсаар байгаа ч тэдний үг болгон дээр тогтож, хэлсэн бүгдийг нь ойлгож авлаа. Тэдэнд анзаарагдахгүй мэт суух нь яг л адал явдалтай киног чанх хажуугаас нь үзэх мэт мэдрэмж төрүүлнэ. Сүйрэлд өртсөн дэлхий, эрдэмтэн эмэгтэй мөн хакер бас мэргэн буудагч. Тэд шаргал үстэд хамаг анхаарлаа хандуулж, түүнийг ятгахыг эсвэл зүгээр л нөхцөл байдалд танилцуулахыг оролдож байгаа ч тэдний анхаарал тун удалгүй над уруу эргэнэ гэдгийг би мэдэж байлаа. Энэ надад муу зөн совин төрүүлж, өнөөх аз жаргалын хийний нөлөөгөөр би хамаг юмаа дэлгэхдээ бэлдэнэ. Би бол үхдлүүдийн хувьд харагддаггүй. Би үхээд амилсан гэвэл эргэлзээгүй буудуулах л байх даа.

Пак Чэёоны аман дахь ногоон скотчийг аваагүй, түүний урд Лиса зөөврийн компьютероо өргөж үхдлүүдийн талаар мэдээ, тэдний гудамжаар явж байгаа бичлэг болон гадаад байдал, сансраас авсан зарим газруудын зургийг үзүүлж байлаа. Эрдэмтэн эмэгтэй гайхсан ч шинжгүй тайван, бүхнийг ширтэж үзэж дууссаны дараа Жэнни түүний скотчийг хуулж авав.

- Та нарын миний тухай таамаглаж, хайж мэдсэн мэдээллийн чинь хувьд дунд нь алдаа согог олон байсан хэдий ч ерөнхийдөө бол үнэн. Миний талаар ийм их зүйл мэдсэн чинь гайхалтай юм. Би ойлгосон ч, хэрвээ намайг эндээс авч явна гэж бодож байгаа бол үгүй, хэрвээ оролдвол би хэлээ залгиж үхнэ шүү.

Би шүлсээ залгилаа.