Khudko aksar rok liya krti hu tumhe yaad krne se ,

Ye keh kr Samjha leti hu ki tum bhi yaad ni karte honge mujhe.

Khudko behla leti hu ye kehke ki akele bhi khush hu,

Lambi raaton me, haan kabhi ek aadh aansu mere baalo me simat jayaa karta hai.

Khudko keh deti hu khubsoorat aksar jab aaine me dekhti hu,

Ab phone ka camera khi kone me dhul khaya krta hai.

Khudko nihaar leti hu ek bar aur bahr nikalne se pehle,

Par kajal ka teeka mujhe muh chidaya karta hai.

Khudko saja leti hu jhumke aur kangan se,

Par wo mathe ki bindiya ab tedhi hi reh jati hai.

Khudko sambhal leti hu dukh ki ghadi me,

Ab tumhari shirt ki baanh(sleeve) nahi, mere dupatte ka kona hi kaam aata hai.

Khudko sula leti hu man hi man lori gaa kar,

Lekin tumhare hotho se nikle geet , gunguna na du yahi dar lga rehta hai.

Khudki taareef bhi kr leti hu jab kuch khas kiya ho maine,

Par peeth pr shabashi ki thappi ab meri hi hoti hai.

Khudko hasa deti hu apne hi chutkulo pr,

Ha thodi khokhli lgti hai hasi, pr kam se kam aankhein nam ni hain abhi.

Khudko khila deti hu kabhi kuch meetha kabhi tikha,

Pr wo adrak wali chai aaj bhi tumhari raah takti hai.

Khudko hi suna deti hu meri nayi kavitayein aur shayriyan,

Aur khud hi unpr shrma jati hu , jse tum shrmaya karte the.

Khudko thoda chahne bhi lgi hu phle se zyada,

Par pyar se ab koi daatata ni mujhe.

Khudko ab tumhare hisse ka laad bhi de deti hu,

Kyunki sirf mera kam pad jata hai.

Khudko saawan ki barish me bhigo bhi leti hu,

Par mere baal ab der tk geele hi reh jate hain.

Khudko girne pr utha bhi leti hu,

Pr ab kharonch ka marham dabbe me band hi reh jata hai.

Khudko jaga bhi leti hu ab sardi ki subah mai,

Par ab mere hath din bhar thande hi reh jate hain.

Khudko hi sunaya hai jo maine naya geet likha apna,

Par tumhare guitar ki dhun k bina thoda besura sa lagta hai.

Khudko nikhar liya hai tumhare bina bhi maine,

Par wo aankhon ki chamak thodi feeki hi reh jati hai.

Khudko aksar rok leti hu tumhe yaad krne se,

Yeh keh kar ki ab to tum kisi aur ko yaad kiya krte honge.

Do let me know if you liked it!